Ձեր վստահելի աղբյուրը

Ազգային ժողովի նախագահ Արարատ Միրզոյանի նախաձեռնությամբ այսօր մեկնարկել են խորհրդարանական լսումներ` «Անցումային արդարադատության գործիքների կիրառման հեռանկարները Հայաստանում» խորագրով:

Լսումների ընթացքում նախատեսված են ելույթներ, մասնավորապես, անցումային արդարադատության ինստիտուտի միջազգային իրավական հիմքերի, մեխանիզմների, գործիքների վերաբերյալ, քննարկումներ:

ԱԺ նախագահ Արարատ Միրզոյանն իր ելույթում նշեց. «Անցումային արդարադատությունը եռյակ դատարանների ձևավորումը չէ, արտակարգ դատարանների ձևավորումը չէ, երբ զանազան մարդիկ կարող են հավաքվել և վճիռներ կայացնել։ Անցումային արդարադատությունը պիտի օրենսդրական, օրնական ճանապարհով աջակցի, մաքրի, զտի, կայացնի գործող դատական համակարգը։ Սա թերևս ամենաէական ուղերձն է, որը պետք է մտքներումս պահենք»։

«Այս լսումները մի շարք հարցերի պատասխաններ պետք է տան, մասնավորապես ի՞նչ է ի վերջո անցումային արդարադատությունը, ինչպիսի՞ գործիքներ ունի, որքանո՞վ է անհրաժեշտ ՀՀ-ում այս փուլում կիրառել անցումային արդարադատության գործիքները, այդ գործիքներից ո՞րն է անհրաժեշտ կիրառել, ի՞նչ չափով, ո՞րն է վերջնանպատակը, ինչպիսի՞ն է միջազգային փորձը և այլն»,- այս ասաց Միրզոյանը։

Նրա խոսքով՝ բոլորիս համար փաստ է, որ դատական համակարգն ունի լրջագույն խնդիրներ, որոնք այս մեկ տարում ոչ միայն չեն լուծվել, այլև պատուհաս են դարձել և իբրև հսկա ժայռ կանգնած են հետագա ժողովրդավարության կայացման ճանապարհին։
«Կիսում եմ այն գնահատականները, որ այժմ պետք է կիրառվի անցումային արդարադատությունը, հիմա լավ ժամանակ է, չէր կարելի անել ավելի շուտ և ուշացնել»,- հավելեց նա։

Լսումների օրակարգը՝ այստեղ։