Ձեր վստահելի աղբյուրը

Մայիսի 22-23-ը պրոբացիայի ծառայողները հնարավորություն են ունեցել  ուսումնասիրել գերմանական փորձը, որը միջազգային  հաջողված օրինակներից է:   «Պրոբացիայի ծառայության էությունը խնդիրները, զարգացման հնարավորությունները՝ գերմանական փորձի հիման վրա» երկօրյա աշխատաժողովն իրականացվել է Միջազգային իրավական համագործակցության գերմանական հիմնադրամի և Ան իրավասության տակ գործող «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի և ՀՀ ԱՆ Պրոբացիայի ծառայության կողմից:

Ինչպես հայտնում են կազմակերպիչները, գերմանացի մասնագետները ներկայացրել են Գերմանիայում պրոբացիայի ծառայության գործունեությունը, պատմել, թե ինչ մասնագիտական հմտություններ են օգտագործում դրական արդյունքի հասնելու համար և ինչ մոտեցումներ են հարկավոր շահառուին (պրոբանտ) հասցնելու համար լիակատար վերասոցիալականացման և այդպիսով կասեցնում կրկնահանցագործության ռիսկերը:

Միջոցառմանը  մասնակցել են դատախազներ, դատավորներ, փաստաբաններ, Արդարադատության ակադեմիայի աշխատակիցներ,  «Քաղաքացիական հասարակության ինստիտուտ» (CSI) հասարակական կազմակերպության ներկայացուցիչը:

Աշխատաժողովի ընթացքում կարևորվել է դատարանների և դատախազության  պրոբացիայի ծառայության հետ  համագործակցությունը,  հատկապես՝ անչափահասների  վճիռների մասով, որոնց կայացման արդյունքում դատապարտյալը  անցնում է  պրոբացիայի ծառայության հսկողության ներքո և կարևոր են նրա վերահսկողության մեխանիզմները ծառայողի կողմից: