Ձեր վստահելի աղբյուրը

2019թ․-ի սկզբից Հայաստանում ինտերնետ օգտագործողներից յուրաքանչյուր 6-րդը ենթարկվել է կիբերհարձակումների, իսկ յուրաքանչյուր 2-րդը՝ այսպես կոչված, տեղական հարձակումների․ այնպիսիք, ինչպիսիք են տեղական հարձակումները՝ կատարված ոչ թե ցանցից, այլ տարբեր USB կրիչներից։ Այսպիսին է «Կասպերսի լաբորատորիայի» հետազոտության արդյունքները հունվարի 1-ից ապրիլի 30-ն ընկած ժամանակահատվածի համար։ Այս մասին հայտնում է Panorama.am-ի լրագրողը, ով մայիսի  23-ից 25-ը Սանկտ Պետերբուրգում մասնակցում էր «Կասպերսկի լաբորատորիայի» տարեկան համաժողովին։

Ինչպես նշում են «Կասպերսկի լաբորատորիայի» փորձագետները, փողը շարունակում է մնալ կիբերհանցագործների հիմնական դրդապատճառը, հետևաբար հարձակումների հիմնական գործիքն է բանկային տրոյական ծրագրերի գրոհները: Նրանց օգնությամբ հարձակվողները ձեռք են բերում մարդկանց ֆինանսական բնույթի անձնական տվյալները, օրինակ, քարտի մանրամասները, առցանց բանկային հաշվի տեղեկությունները, մուտքի տվյալները և այլն:
Ինչպես պարզել է «Կասպերսկի լաբորատորիան», Հայաստանում այս տարվա սկզբից մոտավորապես յուրաքանչյուր 185-րդ բաժանորդ ենթարկվել է բանկային տրոյացիների հարձակման, որոնց թվում  են նաև կազմակերպությունների աշխատակիցները։

Բանկային տրոյացիներին ու վնասակար ծրագրերը քողարկելու համար «չարագործները» ակտիվ օգտագործում են առաջադեմ ինժեներական տեխնիկան, մասնավորապես, ֆիշինգը՝ կեղծ ինտերնետային էջեր, հաղորդագրություններ, որոնք ուղարկվում են էլեկտրոնային փոստով, սոցիալական ցանցերով ու մեսենջերով: Այս դեպքում կարևոր է օգտատերերի զգոնությունը ստացված նամակների նկատմամբ, որպեսզի նրանք չներբեռնեն չարամիտ հավելվածներն ու դրանով չտրամադրեն իրենց անձնական տվյալները։ «Կասպերսկու լաբորատորիայի» տվյալներով, այս տարվա առաջին եռամսյակում Հայաստանում ֆիշինգ հարձակման է ենթարկվել ինտերնետ օգտատերերի 8%-ը։

Միևնույն ժամանակ, փորձագետները նշում են, որ հարձակումների վեկտորը հիմնական ուղղված է կազմակերպություններին, մասնավորապես, փոքր ու միջին բիզնեսի հատվածին, քանի որ նրանց պաշտպանությունը կիբերհանցագործներից ավելի թույլ է, քան մեծ ընկերություններինը։ Առևտրային ընկերությունների նկատմամբ կիբերհանցագործների հետաքրքրությունը նրանով է պայմանավորված, որ նրանք անմիջապես հասանելիություն են ստանում կազմակերպությունների ֆինանսական միջոցներին։

Կորպորատիվ օգտատերերի վրա հարձակման համար հանցագործներն ընտրում են այսպես կոչված թիրախային ֆիշինգը, երբ էլեկտրոնային նամակներն ուղարկվում են պաշտոնական նամակներին հնարավորինս նման տեսքով՝ ստացողի անուն, ազգանունով, ուղարկողի ստորագրությամբ, պաշտոնով։

«Ֆիշինգն ու այլ կիբերվտանգները մեծ վնաս են հասցնում ինչպես ընկերություններին, այնպես էլ մասնավոր օգտատերերին։ Մարդիկ ու կազմակերպությունները կորցնում փող, արժեքավոր տվյալներ, վտանգվում է նրանց հեղինակությունը, գումարներ են ծախսում համակարգի աշխատանքի վերականգնման համար։ Ֆիշինգի զոհ չդառնալու համար մենք խորհուրդ ենք տալիս օգտատերերին ընտրել հակաֆիշինգային պաշտպանական ֆունկցիաներ և, բնականաբար, չկորցնել զգոնությունն ինտերնետում․ ստուգել նամակն ուղարկողի էլեկտրոնային հասցեն, նամակի բովանդակությունը, նրանում եղած հղումները, չբացել կցված հղումները, եթե դրանք կասկածներ են առաջացնում, չթողնել անձնական տվյալները կասկածելի էջերում»,-այս մասին Panorama-ին ասաց «Կասպերսկի լաբորատորիայի» կոնտենտային վերլուծաբանների բաժնի ղեկավար Կոնստանտին Իգնատևը։

«Կասպերսկի լաբորատորիան» կազմակերպություններին նաև խորհուրդ է տալիս աշխատակիցների համար անցկացնել կիբերգրագիտության ու թվային միջավայրի վերաբերյալ թրեյնինգներ, ունենալ ֆայլերի լրացուցիչ կրկնօրինակներ, պարբերաբար թարմացնել ծրագրային պաշտպանությունները, ընտրել պաշտպանության ճիշտ որոշումներ ու փորձված ֆունկցիաներ։