Ձեր վստահելի աղբյուրը

Ա. Սպենդիարյանի անվան օպերայի և բալետի ազգային ակադեմիական թատրոնի կոլեկտիվն աշխատանքային ժողով է հրավիրել։ Նրանց իրենք դժգոհություն են հայտնում, որ ՀՀ մշակույթի նախարարի պարտականությունները կատարող Նազենի Ղարիբյանն ընտրվել է օպերային թատրոնի կառավարման խորհրդի նախագահ։

«Նազենի Ղարիբյանը բոլոր կամուրջները վաղուց վառել է, նա աշխատում է հայ մշակույթի դեմ։ Փափուկ բարձ է դրել ձեր գլխի տակ»,- հայտարարեց օպերային թատրոնի դիրիժոր Հարություն Արզումանյանը՝ դիմելով թատրոնի կոլեգիալ կառավարման մարմնի խորհրդի անդամներին, որոնք էլ ընտրել են  Ն. Ղարիբյանին։

«Ժամանակին կառավարման խորհրդի նախագահն է եղել Հասմիկ Պողոսյանը։ Հիմա դեռ նոր կառավարությունը ձևավորված չէ, ինչումն էր խնդիրը, որ  շտապ կերպով տեղի ունեցավ ընտրություն ու ընտրվեց Նազենի Ղարիբյանը։ Կառավարման խորհուրդը  թատրոնի տնօրենի հետ իրականացնում է  թատրոնի ղեկավարությունը, մեր  խնդիրներն է հասցնում կառավարություն։    Չեմ պատկերացնում, թե ինչպես է տիկին Ղարիբյանը, որ այդպիսի դիրքորոշում է բռնել, պատրաստվում աշխատել օպերայի հետ, ինչպես է պատկերացնում իրեն այդ պաշտոնում»,- ասաց դիրիժորը։ 

Դիրիժոր Ռուբեն Ասատրյանը նշեց, որ  խորհրդի նախագահն ընտրվում է ոլորտի ամենապրոֆեսիոնալ, տասնամյակներով փորձառություն անցած մասնագետը։

Օպերայի աշխատակիցներից մեկն ասաց, որ չի հասկանում, թե ինչպես կոլեգիալ կառավարման մարմնի խորհրդի այն անդամներին՝ Պերճ Քարազյանին և  Սերգեյ Սաֆարյանին, որոնց իրենք են ընտրել, կարող էին ընտրել  Նազենի Ղարիբյանին։ 

«Նազենի Ղարիբյանի ազդեցությունը կլինի այն, որ ինչպես  ազատել է Կոնստանտին Օրբելյանին տնօրենի պաշտոնից, կազատի նաև գեղարվեստական ղեկավարի պաշտոնից, կքանդի մեր թատրոնը» -ասաց նա։

Պերճ Քարազյանը չհամաձայնվեց. «Ես պաշտպանում եմ թատրոնի շահերը։ Մենք բոլորս համակարծիք էինք, որ մեր աշխատանքը միայն ու միայն լինելու է թատրոնի բարօրության համար։ Շատ ժամանակ խորհրդի անդամները մեզ են հարցնում, թե ինչ խնդիրներ կան թատրոնում, որոնք են հրատապ, ինչպես կարելի է լուծել, միայն կընդունվեն  այն որոշումները, որոնք ամենակառուցողականը կլինեն թատրոնի համար»։

Իսկ Ն. Ղարիբյանի ընտրության հետ կապված՝ նա ասաց. «Այդ խորհրդի ամենաազդեցիկ մարդը, որ շփում ունի կառավարության հետ, չեմ կարող ասել, կարող է վաղը չլինի,  բայց տվյալ պահին Նազենի Ղարիբյանն է ներկայացնում մշակույթը կառավարությունում, ամենաշուտը մեր խնդիրները կհասցնի  կառավարություն,  որպեսզի հնարավորինս շուտ լուծում ստանան»։

Սերգեյ Սաֆարյատ վստահեցրեց, որ խորհուրդը չի կարող ընդունել այնպիսի որոշումները,  որոնք կարող են հակասել որևէ ցնցման, փորձության ենթարկել  օպերայի թատրոնը։ Ես այստեղ երկար տարիներ աշխատում եմ, թատրոնի հետ կապված ցանկացած ոտնձգություն  համարում եմ իմ անձի դեմ»։

Ալ. Սպենդիարյանի անվան օպերայի և բալետի ազգային ակադեմիական թատրոնի երիտասարդական ծրագրի ղեկավար Լևոն Ջավադյանը լրագրողներին ասաց, որ գրավոր դիմելու են հենց խորհրդին, այդպես ցույց տալով, որ օպերային թատրոնի կոլեկտիվը դեմ է Նազենի Ղարիբյանին։