Ձեր վստահելի աղբյուրը

«Ներկայացվում են թեկնածուներ, լինում է ելույթ, հարց ու պատասխան, եզրափակիչ ելույթ, որից հետո պատգամավորները գալիս են և իրենց ստացած տպավորությունն արտահայտում են քվեարկության տեսքով»,- այս մասին այսօր խորհրդարանում լրագրողների հետ զրույցում ասաց ԱԺ նախագահ Արարատ Միրզոյանը՝ պատասխանելով հարցին, թե ինչու՞ պատգամավորները չեն կարողանում ՍԴ անդամ ընտրել։

Նրա խոսքով՝ հավանաբար չընտրվելու պատճառն այն է, որ թեկնածուները չեն բավարարում պատգամավորներին:

Արարատ Միրզոյանը նշեց, որ այս գումարման խորհրդարանում սա երկրորդ դեպքն է. «Կտեսնենք, առայժմ օրինաչափություն տեսնելու անհրաժեշտություն չկա»:
Նա միաժամանակ ասաց, որ ՍԴ դատավորի թեկնածու Արթուր Վաղարշյանից  դրական տպավորություն ունի։

Անդրադառնալով ՍԴ նախագահ Հրայր Թովմասյանի հնարավոր հրաժարականին՝ Արարատ Միրղզոյանը նշեց, որ չի կարծում ԱԺ նախագահը պետք է հայտարարություն անի ՍԴ որևէ անդամի, այդ թվում՝ նախագահի վերաբերյալ։

Խոսելով վեթինգի մասին օրենսդրական նախաձեռնության մասին, նա ասաց, որ  անցումային արդարադատության վերաբերյալ ամիսներ շարունակ քննարկումներ են ունեցել։

«Նկատի ունեցեք՝ խոսքը մի թեմայի մասին է, որը բոլորովին կամ մեծամասամբ անծանոթ է լայն հանրությանը, նույնիսկ քաղաքական ու մասնագիտական շրջանակներին։ Եվ մենք մեծ հաշվով կարողացել ենք ծանոթանալ դրան, ինչն անվանում են անցումային արդարադատություն, այդ թվում՝ վեթինգի գործիքին: Եվ հիմա արդեն որոշումներ կայացնելու ժամանակն է»,- ընդգծեց Արարատ Միրզոյանը։

Լրագրողներն Արարատ Միրզոյանից նաև հետաքրքրվեցին՝ եթե վարչապետը չի մասնակցում խորհրդարանում Կառավարության հետ հարց ու պատասխանին, դա օրենքի խախտո՞ւմ է, ԱԺ նախագահը հարցով պատասխանեց. «Վարչապետը երկրո՞ւմ է»։

Այնուհետ նա ավելացրեց, որ օրենքի խախտում չէ։

Լրագրողների դիտարկմանը, թե նախկինում Նիկոլ Փաշինյանը քննադատել էր Կարեն Կարապետյանի բացակայությունը, Արարատ Միրզոյանն ասաց. «Օրենքը կարդացեք, եթե Կառավարության անդամը, այդ թվում՝ վարչապետը երկրում չի, ապա նա չի կարող այստեղ լինել»:

Երբ լրագրողները հիշեցրեցին Փաշինյանի պատգամավոր եղած ժամանակ հնչեցրած արտահայտությունը, որ եթե որևէ մեկը վարչապետ է, ապա աշխարհի որ կետում լինի պարտավոր է ներկա լինել հարց ու պատասխանին, Արարատ Միրզոյանը պատասխանեց. «Օրենքի աբսուրդ մեկնաբանություն է, ես չեմ հիշում կոնկրետ կոնտեքստն ու դրվագը։ Եթե մարդը երկրում չէ, գործուղման մեջ է, ո՞նց կարող է գալ»։