Ձեր վստահելի աղբյուրը

Գործադիրի այսօրվա նիստում Արտակարգ իրավիճակների նախարար Ֆելիքս Ցոլակյանն հայտնեց, որ Ալեքսանդր Մյասնիկյանի արձանամերձ տարածքը  վերանորոգման կարիք ունի։

«Սալիկների հետ կապված խնդիր կա, ԱԻՆ-ի աշխատակիցները գնացել, ուսումնասիրել են։ Մենք մասնագիտական ուսումնասիրություն չէինք կարող անել, դրա համար դիմեցինք Մշակույթի նախարարությանը, որպեսզի մասնագիտական ուսումնասիրություն կատարվի ու հարցը լուծվի»,- ասաց Ցոլակյանը՝ հավելելով, որ ԱԻՆ աշխատակիցները արձանի շրջակա տարածքը ժապավենով սահմանազատել են, բայց ժապավենը երկար չի կարող մնալ։

Վարչապետ Նիկոլ Փաշինյանն էլ նշեց, որ Մյասնիկյանի արձանի հարևանությամբ գտնվող այգու բացման օրը Վարդանյան եղբայրները տեղեկացրել են, որ իրենք առաջարկել են այգու հետ նաև այդ արձանը նորոգեն, բայց ասվել է՝ դա մշակութային արժեք է։

«Ես էլ ասացի՝ մշակութային արժեք է, թողեք հանգիստ քանդվի, պետք չէ նորոգել, հանկարծ չկպնեք, մշակութային արժեքը պետք է ավերակ լինի»,-հեգնեց  վարչապետը։

Նրա խոսքով՝ երբ տեսել է, որ արձանից քարեր են կախված, զգուշացրել է՝ տեսականորեն վտանգ կա, քանի որ այգին մարդաշատ է լինելու և պետք է արագ միջոցներ ձեռնարկել։

«Դրանից հետո ես անցնում եմ և ի՞նչ եմ տեսնում. տեսնում եմ, որ բերել են էդ արձանը ժապավենով փաթաթել են, ընդ որում, էն հայտնի շաբաթօրյակի օրը, երբ Սոս Սարգսյանի թատրոնը պիտի բացվեր։ Այդ օրը Երևանի քաղաքապետին ու մյուս պատասխանատուներին ասացի, որ ճանապարհը, օրինակ, փակում են, ինչ-որ բան են կապում, ինչո՞ւ պետք է այդ  փակելը արվի 1973 թվի արտադրած ցելոֆանի ժապավենով՝ 25 տեղից կապած։ Այսինքն՝ պրիմիտիվ բաներ են և ժապավենը կապած մարդիկ չեն հասկանում, թե իրենք ինչով են զբաղվում», - ասաց Նիկոլ Փաշինյանը։

Վարչապետը նշեց, որ պետք է ժապավենը հանվի ու ամեն ինչ արվի պատշաճ. «Չի կարելի գնալ աղբանոցից հանել օգտագործած ժապավեն, բերել փաթաթել։ Այսօր իմացա, որ էդ այգում արդեն ջարդուփշուրի պրոցես է սկսվել, ի՞նչի է դա տեղի ունենում, պարոն Մովսիսյան», - դիմելով ՀՀ փոխոստիկանապետ Վարդան Մովսիսյանին՝ ասաց վարչապետը։

Վարդան Մովսիսյանը նշեց, որ տեղյակ չեն՝ ով է կապել ժապավենը, բայց աշխատանք են իրականացնում՝ պարզելու, թե արձանը վնասողն ով է։

«Բայց տեսախցիկներ կան, չէ՞», - նշեց վարչապետը։

Ոստիկանապետը հաստատեց՝ նշելով, որ նաև տվյալ անձն է երևում։

«Մինչև հիմա հայտնաբերված չէ՞»,- ասաց վարչապետը և ստանալով բացասական պատասխան՝ շարունակեց. «Երկու օր անցել է և շատ վատ է, որ չեք հայտնաբերել։ Եթե մարդը երևում է, երկու օր չեք կարողանում հայտնաբերել, բա որ տեսախցիկ չլիներ, քանի՞ օր չեք կարա հայտնաբերեք»։

Նիկոլ Փաշինյանը հանձնարարեց շատ արագ հայտնաբերել արձանը վնասողին։

Վարչապետը նաև կոչ արեց լուծել ժապավենի հարցը. «Ինձ համար տարբերություն չկա՝ ով է, լուծեք էդ հարցերը»։

Հիշեցնենք, որ երկու օր առաջ վնասվել է Երևանի 2800-ամյակի այգու  թղթե նավակով տղայի արձանիկը։