Ձեր վստահելի աղբյուրը

Ազգային Ժողովը հինգերորդ անգամ Սահմանադրական դատարանի անդամ չընտրեց։ Վերջին քվեարկությունը երեկ էր։ Նախագահ Արմեն Սարգսյանի կողմից առաջադրված թեկնածու Արթուր Վաղարշյանը  չընտրվեց 30 կողմ, 53 դեմ ձայների հարաբերակցությամբ։

Թե քանի անգամ դեռ խորհրդարանը կմերժի ՍԴ անդամի թեկնածությունը, մեծապես կախված է Հանրապետության նախագահի որոշումից։ Հայտնի է, իշխող ուժը՝ ԱԺ «Իմ քայլը» խմբակցությունն ուզում է ՍԴ կազմում տեսնել փաստաբան Վահե Գրիգորյանին։

Սահմանադրագետ Վարդան Այվազյանը Panorama.am-ի հետ զրույցում ասաց, Սահմանադրությունը, օրենքները ՍԴ անդամի թեկնածուի առաջադրման թվի հետ կապված որևէ սահմանափակում չեն նախատեսում։

«Թեկնածուի առաջադրումը ՀՀ նախագահի բացառիկ իրավունքն է, իսկ 3/5-ով հաստատումը՝ Ազգային Ժողովինը։ Սահմանադրությունը առաջադրումների սահմանափակման վերաբերյալ դրույթ չպետք է նախատեսեր, քանի որ այն ելնում է քաղաքական ուժերի խելամտության և ոչ թե սեփական, անձնական ամբիցիաների կանխավարկածից։ ՍԴ անդամ ընտրելու հերթական ձախողումը վկայում է այն մասին, որ ըստ էության, մեր Ազգային ժողովին թեկնածուի արժանիքներ, գրագիտություն ու այլ բաներ չեն հետաքրքրում։ Հետաքրքրում է միայն իրենց սեփական թիմակիցը լինելու հանգամանքը»,-կարծիք հայտնեց Վարդան Այվազյանը։

Սահմանադրագետի խոսքով, պետականության որակականության համար մեծ սպառնալիք է, երբ թեկնածուի արժեքային համակարգը, մասնագիտական որակները մղվում են երկրորդ պլան։
Նա եկել է համոզման, որ գործող նախագահի ու իշխող քաղաքական ուժի միջև անհամաձայնություն կա այս խնդրի վերաբերյալ։

«Եթե ԱԺ մեծամասնությունը հիմնավորի, թե ինչու է նման որոշում կայացրել, միգուցե կարելի է ասել, այո, օբյեկտիվ են եղել։ Բայց նման հիմնավորում չկա, ու միակ վարկածը մնում է ՀՀ նախագահի ու իշխող ուժի միջև առկա անհամաձայնությունը»,-ասաց նա։

Կողմերից ո՞վ կզիջի, կառաջադրի՞ Արմեն Սարգսյանը Վահե Գրիգորյանի թեկնածությունը։ Այս հարցին ի պատասխան սահմանադրագետն ընդգծեց.

«ՍԴ անդամի թեկնածուի առաջադրումը նախագահի իրավունքն է։ Եթե ես լինեի նրա փոխարեն, այդ քայլին միանշանակ չէի գնա։ Նորից եմ կրկնում, նախագահի բացառիկ իրավասության տիրույթում է որոշել, թե ում առաջադրել։ Եթե նախագահը պետք է շարժվի իշխող ուժի կամ խորհրդարանական մեծամասնության թելադրանքով, ուրեմն ավելի լավ կլինի, այդ ինստիտուտն ընդհանրապես չլինի։ Նախագահի ինստիտուտը նրա համար է, որպեսզի ապահովի պետական իշխանության ամբողջականությունը և հետևի Սահմանադրության պահպանմանը։ Եթե նախագահը պետք է քաղաքական ուժի կապրիզներին տեղի տա, ուրեմն այդ ինստիտուտը կդառնա անիմաստ մի բան։ Այնպես որ ես գտնում եմ, որ Հանրապետության նախագահը շատ ճիշտ է վարվում, և ողջունում եմ նրա սկզբունքայնությունը»։

Հիշեցնենք՝ խորհրդարանը նախորդ տարվա մայիսից սկսած մերժել է 5 թեկնածուի,  ՍԴ անդամ դառնալու համար անհրաժեշտ թվով ձայներ չեն ստացել Էմիլ Բաբայանը,  Ելիզավետա Դանիելյանը, Վահե Գրիգորյանը, Գոռ Հովհաննիսյանը, Արթուր Վաղարշյանը։

ՍԴ անդամն ընտրվում է փակ-գաղտնի քվեարկությամբ՝ պատգամավորների երեք հինգերորդի ձայներով: