Ձեր վստահելի աղբյուրը

Երևանում գտնվող Ֆրանսիայի Բուշ-դյու-Ռոն դեպարտամենտի խորհրդի նախագահ Մարտին Վասալը և նրա գլխավորած պատվիրակությունը հանդիպել են «Ազնավուր» հիմնադրամի  համահիմնադիր Նիկոլա Ազնավուրի և գործադիր տնօրեն Կրիստինա Սարկիսյանի հետ։

Հիմնադրամի մամուլի ծառայության փոխանցմամբ, հանդիպումը տեղի է ունեցել Երևանում՝ ապագա «Ազնավուր» կենտրոնում, որտեղ հյուրերին ներկայացվել է կենտրոնի նախագիծը։ Կասկադի բարձունքում գտնվող «Ազնավուր» կենտրոնն իր դռները կբացի 2021 թվականին՝ շենքի վերակառուցումից ու ամբողջական համալրումից հետո։ Այն կներառի Շառլ Ազնավուրի ինտերակտիվ, նորարարական թանգարանը, ինչպես նաև կրթամշակութային կենտրոն երիտասարդների համար, որտեղ ծրագրեր կիրականացվեն երեք ուղղությամբ՝ կինո, երաժշտություն, ֆրանսերենի ուսուցում։ Կենտրոնում կգործի նաև Ֆրանսիական ինստիտուտը (Institut français), որը ֆրանսիական մշակույթի տարածման կարևոր հարթակ կհանդիսանա՝ համալրված ընդգրկուն մեդիադարանով ու դասասենյակներով։

Հանդիպման ընթացքում համագործակցության հուշագիր է ստորագրվել «Ազնավուր» հիմնադրամի, Բուշ-դյու-Ռոն դեպարտամենտի և Մարսելում գտնվող Բյուզին դղյակի (Château de la Buzine) միջև: Կողմերը պատրաստակամություն են հայտնել նպաստել հայ-ֆրանսիական մշակութային կապերի հետագա զարգացմանը՝ համատեղ նախագծերի իրագործմամբ։

Համագործակցության շրջանակում իրականացվող առաջին նախագիծը Բյուզին դղյակում բացված «Ազնավուր» ցուցադրությունն է, որն այնտեղ կգործի մինչև հոկտեմբերի վերջ՝ ներկայացնելով Շառլ Ազնավուրի որոշ անձնական իրեր, արխիվային լուսանկարներ, արժեքավոր այլ նյութեր։

Ազնավուր ընտանիքը հօգուտ Հիմնադրամի հրաժարվել է ցուցադրված լուսանկարների հեղինակային իրավունքի հոնորարից, որը որպես նվիրատվություն փոխանցվել է «Ազնավուր» հիմնադրամին։ Բյուզին դղյակը նաև պատրաստակամություն հայտնել իր փորձն ու հնարավորությունները ներդնել «Ազնավուր» կենտրոնի մշակութային ծրագրերի նախագծման գործում։

Բացի սրանից, Բուշ-դյու-Ռոն դեպարտամենտի ղեկավարության ջանքերի և հատկապես Մարսելի փոխքաղաքապետ Դիդիե Փարաքյանի աջակցության շնորհիվ Շառլ Ազնավուրին նվիրված մեծ համերգ էր կազմակերպվել Մարսելում ապրիլի 30-ին։ Տեղացի այլ անհատներ և կազմակերպություններ ևս աջակցել էին համերգի կազմակերպմանը, իսկ ստացված ողջ հասույթը կուղղվի «Ազնավուր» հիմնադրամին։