Ձեր վստահելի աղբյուրը

Հայաստանում մինչև 16-18 տարեկան տղաներն են շատ լինում, իսկ վերարտադրողական տարիքում պատկերը լրիվ այլ է լինում՝ կանայք շատ, տղամարդիկ քիչ։ Panorama.am-ի հետ զրույցում ՄԱԿ-ի Բնակչության հիմնադրամի հաղորդակցության պատասխանատու Մհեր Մանուկյանը ներկայացրեց տվյալներով, այսօր ծնունդների մեջ սեռերի համամասնությունը կազմում է՝ 111 տղա 100 աղջկա դիմաց, մինչդեռ նորման է՝ 106 տղա 100 աղջկա հաշվով։ Նա նշեց, որ Հայաստանում միգրացիան հիմնականում արական է,  հենց մի քիչ հասակ են առնում, ստացվում է այնպես, որ տղաները պակասում են։

Ներկայացված տվյալներով, Հայաստանում 20-40  տարեկան  տարիքային խմբում 44 հազարով կանայք ավելի շատ են, քան տղամարդիկ, 15-49 տարիքային խմբում՝  55 հազար 600–ով կանայք ավելի շատ են։

«Վերարտադրողական տարիքում մենք ունենք այդպիսի խզում, ինչը նշանակում է, որ վերարտադրողական տարիքի 44 հազար կանայք ուզում են ամուսնանալ, ընտանիք կազմել, մեխանիկական խնդրի առաջ են կանգնում։ Այդ առումով կարելի է ասել, որ ժողովրդագրության համար որոշակի խնդիր է»,- ասաց Մ. Մանուկյանը։

Նրա խոսքով, նախընտրելին այն է, որ բնակչության ներքին ժողովրդագրական կառուցվածքը քիչ թե շատ համաչափ լինի, մեծ խզում չլինի կանանց և տղամարդկանց թվաքանակների մեջ, դա խնդիր է առաջացնում։ Չնայած բնականորեն կանայք աշխարհում ավելի երկարակյաց են, քան տղամարդիկ, տարիքային ամենավերջին խմբում միշտ կանանց թիվը շատ է, ինչը բնական է, քանի որ  տղամարդկանց կյանքի միջին տևողությունն ավելի կարճ է։