Ձեր վստահելի աղբյուրը

«Ինստիտուտները կարող են միմյանց նկատմամբ ազդեցություն ունենալ տարբեր դրսևորումներով, այն փափուկ է և իրավաչափ, հարիր է քաղաքական մշակույթին,  եթե այդպիսին գնաատվում է դեմ քվեարկելը»,- ԱԺ-ում լրագրողների հետ զրույցում ասաց արդարադատության նախարար Արտակ Զեյնալյանը՝ պատասխանելով  հարցին, թե ՝ «ասում են, որ ճնշեցին նախագահ Արմեն Սարգսյանին, որ նա ի վերջո Վահե Գրիգորյանի թեկնածությունն առաջադրի  ՍԴ դատավորի պաշտոնում»։ 

Հարցին, թե արդյոք քաղաքական որոշում էր, նա պատասխանեց. «Իհարկե, քաղաքական որոշում էր, իրավաքաղաքական որոշում էր, չէր կարող քաղաքական չլինել»:

Նա նշեց, որ ճանաչում է Վահե Գրիգորյանին, իրավունքի կատեգորիաներով մտածող անձնավորություն է, կարծում է՝ անաչառ է և կաշկանդված չէ որևէ կարգավիճակով, նա լավագույն իրավաբաններից մեկն է:

Հարցին, այն հանգամանքը, որ  Վահե Գրիգորյանը նախկինում կալանավորված  է եղել, իրավաբանորեն չի խանգարում այդ պրոցեսներին, Ա. Զեյնալյանն ասաց. «Վահե Գրիգորյանն ամբողջությամբ արդարացվել է և ռեաբիլիտացվել է։ «Վահե Գրիգորյանն ընդդեմ Հայաստանի» գործով ՄԻԵԴ վճիռ կա, որով հաստատված է նրա անմեղությունը։ Սա չի կարող շահարկման թեմա դառնալ։ Նա արդար է և անմեղ է, շատ կարևոր ներդրում է կատարել իրավունքի զարգացման ոլորտում նաև իր գործով։

Հիշեցնենք՝ խորհրդարանն արդեն մեկ անգամ մերժել էր Վահե Գրիգորյանի թեկնածությունը, սակայն նախագահ Արմեն Սարգսյանը կրկին առաջադրել է նրա թեկնածություն այն բանից հետո, երբ առաջդրված մի քանի այլ թեկնածուի խորհրդարանը մերժել էր։ ՍԴ անդամն ընտրվում է փակ-գաղտնի քվեարկությամբ՝ պատգամավորների երեք հինգերորդի ձայներով: