Ձեր վստահելի աղբյուրը

«Մարտի» 1-ի սպանությունների մասով ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանի ենթադրությամբ  պետք է սպասել նոր բացահայտումների։ 

«Նախաքննական մարմինը ցույց տվեց, որ ինքը հետևողական մեծ ծավալի աշխատանք է կատարում: Եվ այդ աշխատանքի արդյունքում կունենանք ոչ միայն քաղաքական պատվերների ընդհանրապես մեկուսացում ապագայում, այլ կունենանք նաև պրոֆեսիոնալ քննիչների այն խումբը, որն ի վիճակի են բացահայտել այն մնացած հանցագործությունները, որոնք սպասում են իրենց բացահայտման հերթին»,- ԱԺ-ում ճեպազրույցի ժամանակ ասաց Անդրանիկ Քոչարյանը:

Խոսելով կոնկրետ «Մարտի 1»-ի քրեական գործի շրջանակներում նախօրեին  ձերբակալված ՀՀ ոստիկանության զորքերի հրամանատարի տեղակալ, շտաբի պետի պաշտոնը զբաղեցրած Գեղամ Պետրոսյանի մասին, Ա. Քոչարյանը նշեց, որ Գեղամ Պետրոսյանին Փաստահավաք խումբը հանդիպել է երկու անգամ, առաջին բացատրությունները չեն բավարարել, երկրորդ անգամ են կանչել. «Մեզ մոտ կասկածներ եղել են, թե զինված ապօրինի խմբավորումների, թե ապօրինի և անհամաչափ ուժերի կիրառման, թե այն կադրերի, որոնք այսօր գտնվում են նախաքննական մարմնի տրամադրության տակ»։

Ա. Քոչարյանն ասաց, որ նախկին Գլխավոր դատախազ Աղվան Հովսեփյանը նույնպես պետք է բացատրություններ տա, եթե չի տվել,  թե ինչպես է նրա՝ գլխավոր դատախազի պաշտոնը զբաղեցնելու պայմաններում հնարավոր եղել այդպիսի լայնածավալ գործի կոծկումները:

Խոսելով վերջերս հնչող բռնության կոչերի մասին, ասաց նշեց. «Վերջերս տեսա, թե ոնց էր կոնկրետ անձնավորությունը  խոսում, որ կգտնվեն մարդիկ, որոնք ինչ-որ մարդկանց կկանգնեցնեն: Դա, ըստ էության, ոչ թե բռնության կոչ էր, այլ գործողության կոչ էր»։

Նրա խոսքով, պետք է դատապարտել ցանկացած բռնության կոչ. «Մենք Հոկտեմբերի 27 տեսած երկիր ենք, պետք է լինենք շատ ուշադիր։ Ես կարծում եմ, որ մեր իրավապահ մարմինները պետք է մամուլի հրապարակումները հիմք  ընդունեն և իրականացեն օրենքով սահավա իրենց գործառույթները»։