Ձեր վստահելի աղբյուրը

«Սա նախ ցույց է տալիս Հատուկ քննչական ծառայության  հետևողական աշխատանքը և բոլորս ենք հասկանում, որ վերջին 10 տարում ոչ թե քննություն է տեղի ունեցել, այլ ամեն ինչ արվել է, որ բոլոր հնարավոր փաստերը կոծկվեն»,- ԱԺ-ում լրագրողների հետ զրույցում նշեց Հայաստանի վարչապետ Նիկոլ Փաշինյանը՝ խոսելով Մարտի 1-ի քրեական գործի շրջանակներում նախօրեին  ձերբակալված ՀՀ ոստիկանության զորքերի հրամանատարի տեղակալ, շտաբի պետի պաշտոնը զբաղեցրած Գեղամ Պետրոսյանի մասին։

Նրա խոսքով, այն փաստը, որ պարկուճները փոխված են, նշանակում է՝ ամեն ինչ է փոխված՝ մարդիկ, դեմքերը, դեպքերը։

«Այս պայմաններում եթե ՀՔԾ-ն կարողացել է հասնել նրան, որ կոնկրետ մարդ ձերբակալի, ես ուղղակի այդ լուրը իմանալուց հետո, բնականաբար, շատ նաև էմոցիոնալ պահեր եմ ապրել»,- նշեց վարչապետը։ Նա նշեց, որ խոսքը դեռ ձերբակալության մասին է, չգիտեն՝ մեղադրանք կառաջադրվի, չի առաջադրվի:

«Բայց որ մարտի 1-ի բոլոր սպանությունները պետք է բացահայտվեն և այն, որ ակնհայտ է, որ քննությունը հենց 2008-ի մարտի 1-2-ից սկսած տարվել է կոծկելու ուղղությամբ, դա ակնհայտ է»,-ասաց Նիկոլ Փաշինյանը:

Անդրադառնալով ՀՀ երկրորդ նախագահ Ռոբերտ Քոչարյանի և մյուսների գործին, վարչապետն ասաց. «Ինքներդ էլ հասկանում եք, որ չեմ կարող իրավական գնահատականներ տալ, բայց ընդհանուր առմամբ կարող ենք արձանագրել, որ ամեն ինչն ընթանում է բնականոն ընթացքով, այսինքն բոլորի իրավունքները պաշտպանված են: Իրավական հարցերի լուծումը պետք է տրվեն համապատասխան ընթացակարգերով։ Վարչապետի լիազորությունների մեջ չի մտնում այդպիսի հարցեր լուծելը»:

Նիկոլ Փաշինյանն ասաց, որ դատական համակարգի վերաբերյալ իր գնահատականը տվել է. «Ես ասել եմ, որ չեմ կարող գնահատել որևէ դատական ատյանի որևէ որոշման օրինականությունը կամ ապօրինությունը: Դա իմ իրավասության մեջ չի մտնում և  զերծ եմ մնում:

Հայաստանում դատական համակարգի իշխանությունը չի բխում ժողովրդից և լեգիտիմության խնդիր ունի։  Այսօր Հայաստանի դատական համակարգը չունի ժողովրդի վստահությունը, այն չի ներկայացնում ժողովրդին, հետևաբար դատաիրավական բարեփոխումների ամբողջ պրոցեսի տրամաբանությունը պետք է լինի այն, որ դատական համակարգը պետք է ներկայացնի ժողովրդին: Մեզ պետք է այնպիսի դատական համակարգ, որի կայացրած որոշումները ոչ վարչապետը, ոչ ընդդիմությունը, ոչ իշխանությունը, ոչ քաղաքացիները չքննարկեն, որ դատական համակարգի որևէ որոշում հանրության մեջ մեջ ցնցումներ չառաջացնի: Ասեն՝ դատարանը որոշել է։ Մեր խնդիրը դա լուծելն է»։ 

Նիկոլ Փաշինյանն ասաց, որ պետական համակարգի վեթոինգը գործնականում սկսված է։ Նա նշեց, որ Հայաստանի դատական համակարգում ճգնաժամ կա։

«Վճռաբեկ դատարանը հայտարարություն է անում Սահմանադրական դատարանի դեմ, Դատարանների խորհուրդը հայտարարություն է անում Բարձրագույն դատական խորհրդի դեմ։ Այսինքն՝ դատական համակարգն ինքն ընդունում է, որ ճգնաժամ կա։ Դատարաններն իրար չեն վստահում։ Բայց մեր խնդիրը չէ գերանդին առնել և բոլորին հնձել, ամենքին, ամեն տեղ։ Մեր խնդիրն է ունենալ ժողովրդի վստահությունը վայելող անկախ դատական համակարգ», - ասաց վարչապետը։

Նիկոլ Փաշինյանն ասաց, որ առաջիկայում կստեղծեն հակակոռուպցիոն դատարան։ Նա նաև նշեց, որ առանց դատավորների աշխատավարձի լրջորեն բարձրացման չեն կարող ունենալ անկախ դատական համակարգ։ 

«Մեզ, ինձ պետք չի մարիոնետային դատական համակարգ։ Եթե ինձ պետք լիներ այդպիս դատական համակարգ,   այն  պատրաստ դրած էր։ Ինչի այսօր Հայաստանում դատավոր կա, որ վարչապետի ասածը կարողա չանի՞»,- նշեց կառավարության ղեկավարը

Ն. Փաշինյանի խոսքով, այսօր ունեն բյուջետային հնարավորություն դատավորների աշխատավարձը բարձրացնելու համար, բայց եթե բարձրացնեն, հանրությունը իրենց չի հասկանա՝ «կասի այս սոցիալական իրավիճակում փոխանակ այս կամ այն խնդիրը լուծեք, բռնում եք էդ դատավորների աշխատավարձն եք բարձրացնում, թեկուզև նոր դատավորների»։ 

«Բայց եթե դատավորի աշխատավարձը բարձր չլինի, լուրջ մասնագետը չի ուզի գա և դատավոր չի աշխատի՝ իմանալով, որ կաշառք չի վերցնելու։

Մենք մեր միջազգային գործընկերների հետ շփումների մեջ ենք, և իրենց ասում ենք, որ հիմա չենք կարող դատավորների աշխատավարձերն էականորեն բարձրացնել։ Եթե մեր միջազգային գործընկերները մեզ աջակցեն, որպեսզի 3 տարվա կտրվածքով նոր դատական համակարգ ստեղծենք, օրինակ, հակակոռուպցիոն դատարան ստեղծենք,  ինչ-որ ձև գտնենք բարձր աշխատավարձերով նոր, լուրջ մասնագետներ ներգրավվենք, որոնց վստահությունը կլինի բարձր, և 3 տարի հանրությունն, ընդդիմությունն էլ, իշխանությունն էլ տեսնի, որ իրոք անկախ դատական համակարգ ունենալը լավ է, օգտակար է պետությանը, բոլորին,  տնտեսությանը, 3 տարի հետո մենք կարող ենք մեր ժողովրդին համոզել, որ մենք բյուջեից կարող ենք վճարել», - նշեց Ն. Փաշինյանը։
Նա ասաց, որ  մոդելը հետևյալն է. «Հակակոռուպցիոն դատարանը ստեղծում ենք, միջազգային դոնորներին փորձում ենք համոզել, որ ամբողջ ֆինանսական բեռն աշխատավարձի մասով վերցնեն  իրենց վրա, հանրությունը տեսնի, որ անկախ դատական համակարգն օգուտ է պետությանը, յուրաքանչյուր քաղաքացու, 3 տարվա ընթացում թոշակ էլ կբարձրացնենք, ամեն ինչ էլ կանենք, կասենք՝ ժողովուրդ, հիմա դատավորները պետք է ստանան ամսական 2,5-3 միլիոն դրամ աշխատավարձ, որովհետև դա բոլորիս է պետք։ Այս խնդիրը քննարկել ենք միջազգային գործընկերների հետ։  Նրանք սա ի գիտություն են ընդունել, հիմա այդ աշխատանքը պետք է շարունակվի, որպեսզի նրանք այդ աջակցությունը ցուցաբերեն Հայաստանին», - ասաց վարչապետը։

(լուսանկարը՝ «Ազատության» արխիվից)