Ձեր վստահելի աղբյուրը

«Բռնության ցանկացած դրսևորում չի կարող արդարացնել կոնկրետ երևույթը, ցանկացած այդպիսի դրսևորում պետք է բացառել։ Այս ամենը տեղավորվում է այն մտայնության մեջ, որի մասին մենք բազմիցս խոսել ենք: Այսինքն՝ հասարակության մեջ որոշակի անհանդուրժողականության մթնոլորտի ձևավորման պատճառահետևանքային կապի տրամաբանության մեջ է տեղավորվում»,- այսօր խորհրդարանական ճեպազրույցների ժամանակ այս մասին նշեց «Բարգավաճ Հայաստան» կուսակցության պատգամավոր Իվետա Տոնոյանն՝ անդրադառնալով ակտիվիստ Վարդան Հարությունյանի հետ կապված միջադեպին։

Նա հույս հայտնեց, որ եթե կլինեն նման կարգի դրսևորումներ, ապա հնարավոր կլինի հարթել առանց բռնության կիրառման»:

Խմբակցության քարտուղար Վահե Էնֆիաջյանն էլ հավելեց, որ օրենքի առջև բոլորն են հավասար և տեղի ունեցածը բացառապես պետք է տեսնել այս տիրույթում:

Ինչ վերաբերում է վեթթինգի վերաբերյալ «Իմ քայլի» նախագծին՝ Տոնոյանն ասաց. «Մեզնից ոչ ոք չի քննարկում, որ իսկապես դատաիրավական համակարգում կան շատ լուրջ խնդիրներ, որ դատաիրավական համակարգի հանդեպ կա վստահության շատ լուրջ դեֆիցիտ և չկա վստահություն այդ համակարգի նկատմամբ, սակայն վեթինգի գործընթացը պետք է իրականացվի բացառապես օրենսդրության և սահմանադրական նորմերին համապատասխան պայմաններում և կրի քաղաքակիրթ բնույթ»։
Նա նշեց, որ իրենց համար անակնկալ էր խորհրդարանական մբիոնից լսել  «Իմ քայլը» խմբակցության ղեկավար Լիլիթ Մակունցի այն հայտարարությունը, որ վեթինգի հետ կապված օրենսդրական նախաձեռնություն կա, որի աշխատանքները տևական ժամանակ է իրականացվում է:

«Այդ մասին լսել ենք ԱԺ ամբիոնից: Մեզ ու ԼՀԿ մեր գործընկերներին կոչ է արվում ներկայացնել առաջարկություններ մեկշաբաթյա ժամկետում: Առաջարկություններ ներկայացնել մի նախագծի վերաբերյալ, որը մենք չենք տեսել, չգիտենք՝ ինչ տեսք ունի, չգիտենք, թե կոնկրետ իրականացման ինչ մեխանիզմներ է ենթադրում, դա մեզ համար անհասկանալի գործելաոճ էր»,- նշեց նա:

Անդրադառնալով Սահմանադրական դատարանի դատավորի թեկանծու Վահե Գրիգորյանին՝ Էնֆիաջյանն ասաց. «Վահե Գրիգորյանը իր հարցազրույցներում ոչ լեգիտիմ է որակել գործող նախագահի ոչ լեգիտիմ լինելու հանգամանքը: Եվ եթե առաջնորդվենք այս հանգամանքով, ստացվում է՝ ոչ լեգիտիմ նախագահը առաջադրել է լեգիտիմ թեկնածուի՞։

Իվետա Տոնոյանն էլ հավելեց. «Վստահ եմ, որ իմ բոլոր գործընկերները ունեն փայլուն հիշողություն, ընդամենը մեկ տարի առաջ Վահե Գրիգորյանը նախագահ Արմեն Սարգսյանին որակում էր որպես տխմարագույն ճառեր արտաբերող դեմագոգ, ոչ լեգիտիմ նախագահ: Այս դեպքում մենք պետք է հասկանան՝ իր ձևակերպմամբ ոչ լեգիտիմ նախագահի կողմից ներկայացված թեկնածությունը արդյոք լեգիտիմ է համարվում, թե ոչ»։