Ձեր վստահելի աղբյուրը

«Համահարթ տոկոսադրույքի վերաբերյալ դժգոհությունները հիմնականում կայանում են նրանում, որ հարկման հավասարության սկզբունքը չի պահպանվում, այսինքն՝ ավելի մեծ և նվազ եկամուտ ստացողները նույն դրույքաչափով են հարկվում, և այստեղ կա սոցիալական անարդարություն»,- այս մասին այսօր խորհրդարանում լրագրողների հետ զրույցում ասաց Պետական եկամուտների կոմիտեի նախագահ Դավիթ Անանյանն՝ անդրադառնալով Հարկային օրենսգրքի փոփոխություններին։

ՊԵԿ նախագահը նշեց, որ այդ տեսակետի հետ համաձայն է, բայց ամբողջ աշխարհում կա հարկման երեք տեսակի համակարգ։ Առաջին համակարգն այն է, որ սահմանվում է համահարթ մեկ միասնական տոկոսադրույք, ոչ թե սանդղակ, բայց միաժամանակ սահմանում է չհարկվող շեմ: Այդպես, ըստ նրա, պահում ես փոքր եկամուտ ստացողին քիչ հարկելու գաղափարը։

Երկրորդ տարբերակի համաձայն՝  չհարկվող շեմ չկա, բայց կա սանդղակ, ինչն այսօր գործում է Հայաստանում, իսկ երրորդ տարբերակն այն է, որ սանդղակի հետ միասին կա նաև շեմ:

«Այս բոլոր երեք տարբերակները քննարկվել են կառավարությունում։ Քննարկումների արդյունքում ընտրվել է այն, ինչը ներկայացվել է ԱԺ: Ես չեմ հավակնում ասել, որ դա ամենալավն է, բայց պետք է նաև հանրությանը մի շատ կարևոր բան ասենք՝ անձի հարկումը պետք է նայել եկամուտների և գույքի միասնական հարկման տեսանկյունից։ Եթե մենք այս ամբողջականության մեջ ենք նայում խնդիրը, ես այդտեղ որևէ մասնագիտական խնդիր չեմ տեսնում, ուղղակի հանրությանը պետք է կարողանանք սա ներկայացնել: Այսինքն՝ բարձր եկամուտ ստացողն իր տնտեսված միջոցներով գույք է ձեռք բերում, որը հարկվում է շուկայական արժեքից անգամներով ավելի, քան գույք չունեցողը կամ պակաս եկամուտ ունեցողը»,- ասաց Դավիթ Անանյանը։

Նա միաժամանակ նշեց, որ համահարթ եկամտային հարկի կիրառման արդյունքում հարկային եկամուտները, ըստ գնահատականների, կնվազեն 17-19 մլրդ դրամով, սակայն, ըստ նրա,  տարբերակներից ընտրվել է այն, որը պակաս ազդեցություն ունի բյուջեի վրա:

Հիշեցնենք, որ Հարկային օրենսգրքում փոփոխություններ և լրացումներ կատարելու մասին օրենքի նախագծով և հարակից նախագծերի փաթեթով առաջարկվում է անցում կատարել եկամտային հարկի համահարթեցված դրույքաչափի:

Նախագծով առաջարկվում է 2019թ. սեպտեմբերի 1-ից անցնել եկամտային հարկի համահարթեցված 23 տոկոս դրույքաչափի: Եթե այժմ գործում է եկամտային հարկի եռաստիճան դրույքաչափերի համակարգը՝ 23 տոկոս մինչև 150 հազար դրամ աշխատավարձ ստացողների համար, 28 տոկոս՝ 150 հազար դրամից մինչև 2 միլիոն դրամ և 36 տոկոս՝ 2 միլիոն դրամից բարձր, ապա այս  նախագծով առաջարկվում է բոլորին հարկել 23 տոկոս եկամտային հարկով։ Նախագիծը  ենթադրում է եկամտային հարկի դրույքաչափը մինչև 2023 թվականը աստիճանաբար նվազեցնել՝ հասցնելով 20 տոկոս: