Ձեր վստահելի աղբյուրը

«Ինձ համար մեծ նշանակություն ունի վերադառնալ «Փյունիկ», որտեղից սկսել եմ ֆուտբոլային կարիերաս: Ցանկանում եմ շնորհակալություն հայտնել գլխավոր մարզիչ Ալեքսանդր Տարխանովին և պարոն Սողոմոնյանին, ովքեր վստահեցին ինձ, հույսեր կապեցին ինձ հետ և հրավիրեցին «Փյունիկ»»,-ֆուտբոլային ակումբի մամուլի ծառայությանը տված հարցազրույցում ասել է ակումբի նորեկ Էդգար Մանուչարյանը:

Նրա խոսքով, իր համար  անսովոր է, երբ «Փյունիկին» տեսնում է նույնիսկ երկրորդ հորիզոնականում, որովհետև «Փյունիկն» այնպիսի թիմ է, որը պետք է միշտ չեմպիոն լինի:

«Պետք է այնպես անենք, որպեսզի առաջիկա մրցաշրջանում «Փյունիկը» զբաղեցնի առաջին հորիզոնականը: Դժվար մրցաշրջան է սպասվում, բայց ես վստահ եմ, որ մենք կարող ենք դառնալ չեմպիոն»,-ասել է նա:

Հարցին, թե որ համարի մարզաշապիկով հանդես կգա, Մանուչարյանն ասել է`  երբեք համարին ուշադրություն չի դարձնում, կընտրի այն համարը, որը կառաջարկեն:

Ֆուտբոլիստն ասել է, որ վերջին շրջանում բավականին լավ մարզավիճակ է ձեռք բերել, թե’ հոգեբանորեն, թե’ ֆիզիկապես:

«Հիմա պահպանում եմ մարզավիճակս և վստահ եմ, որ լավ մարզավիճակում կներկայանամ հավաքներին և պաշտոնական խաղերին»,-ասել է նա: