Ձեր վստահելի աղբյուրը

Ազգային ժողովն այսօր արտահերթ նիտում քննարկման ներկայացրեց «ՀՀ  հարկային օրենսգրքում փոփոխություններ և լրացումներ կատարելու մասին և կից ներկայացված օրենքի նախագծերի փաթեթը։

Հիմնական զեկուցող Ֆինանսների նախարար տեղակալ Արման Պողոսյանն ներկայացերց, որ ընդհանուր երեք հիմական նպատակադրումներ ունեն՝ ազգային տնտեսության մրցունակության և ներդրումային գրավչության բարձրացման համար հարկային բեռի վերաբաշխմանն ուղղված փոփոխությունների իրականացումը, միկրոձեռնարկատիրության հարկման արտոնյալ համակարգի կատարելագործումն ու կիրառության շրջանակի ընդլայնումը և գործունեության առանձին ոլորտներում առկա` հարկային համակարգին առնչվող խնդիրների լուծումը:

«Մինչև փաթեթի մշակումը բազմակողմ և խորքային վերլուծություններ են կատարել՝ նպատակ ունենալով ախտորոշել տնտեսության առկա վիճակը։ Պետք է զեկուցեմ, որ վերջին տարիներին տնտեսության զարգացման միտումները  երկու անհանգստացնող դրսևորումներ են ունեցել՝ առաջինը, որ տնտեսության արտահանմանը կողմնորոշված ոլորտներում շահութաբերությունը շուրջ 40-50 տոկոսով ցածր է, քան երկրի ներքին սպառմանը կողմնորոշված ոլորտներում։ Որպես ուղղակի հետևանք ներդրումները հոսում են ավելի շահութաբեր ոլորտներ և արդյունքում կա իրավիճակ, որ արտահանման  ոլորտներում 4-4,5 անգամ ավելի քիչ ներդրումներ են կատարվում, քան երկրի ներքին սպառմանը կողմնորոշված ոլորտներում։ Փոքր և բաց տիպի տնտեսությունների համար սա իրապես մարտահրավեր է»,- նշեց փոխնախարարը։

Նրա խոսքով՝ սրա լուծման համար պետք է ապավինել ուղղակի հարկերին։

«Այս տրամաբանության ներքո առաջարկվում է 2 տոկոսային կետով նվազեցել շահութահարկի դրույքաչափը և ներդնել եկամտային հարկի համահարթ դրույքաչափ՝ սկսելով 23 տոկոսից 2020 թվականի համար և այնուհետև երեք տարիների համար շարունակաբար նվազեցնելով մինչև 20 տոկոս։ Զուգահեռաբար նախատեսվում է վերականգնել սոցիալական վճարի մասնակից և պետության միջև նախկինում ունեցած 5տոկ/-5տոկոս հարաբերակցությունը՝ եկամտահարկի իջեցմանը զուգահեռ»,-ասաց նա։

Նա նշեց,  որ սա հարկային եկամուտների որոշակի կորուստ է ենթադրում՝ մասնավորապես եկամտահարկի գծով կորուստը 27,5 մլրդ դրամ է գնահատվել, շահութահարկը 11 մլրդ դրամ։

Պողոսյանը հայտնեց, որ կառավարությունն ավելացված արժեքի հարկի դրույքաչափի բարձրացում չի նախատեսում, քանի որ այն բնույթով ընդգծված ռեգրեսիվ հարկատեսակ է, որը աղքատությանը հարված կհասցնի։

«Այս համատեքստում ամենից օպտիմալ լուծումը, որը կառավարությունը գտել է՝ ակցիզային հարկի գծով բեռի որոշակի բարձրացումն է, ընդորում՝ հիմնավորվում է նրանով, որ համադրելի երկրների փորձի ուսումնասիրությամբ գալիս ենք համոզման, որ ակցիզային հարկի բեռը մեր երկրում բավական ցածր է»,- ասաց նա։

Փոխնախարարը հավելեց, որ փոփոխությունների հաջորդ խումբը համակարգային նշանակության են, որտեղ իրենք առաջարկում են սկզբունքային պարզեցման գնալ։
«Հինգ աստիճանի հարկային համակարգի փոխարեն ունենալ ընդամենը երեքը, ըստ որի՝ արտոնագրային, ինքնազբաղված, ինչպես նաև ընտանեկան հարկման համակարգերի փոխարեն կգործի մեկ միասնական միկրոձեռնարկատիրության հարկ՝ արտոնյալ պայմաններով»,- հավելեց նա։