Ձեր վստահելի աղբյուրը

«Ինչպե՞ս կարելի է օկուպացնել ինչ-որ տարածք այն մարդկանց կողմից, ովքեր այնտեղ ծնվել են, ում պապերն ու պապերի պապերն են այդտեղ ծնվել են ու ապրել։ Ինչպե՞ս կարելի է այդ տարածքն օկուպացնել։ Տարածք, որտեղ այս մարդիկ սերնդեսերունդ, դարերով ապրել են. ինչպե՞ս կարելի է դա ընդհանրապես պատկերացնել»,- «Արմենպրեսի» հաղորդմամբ նախօրեին Սանկտ Պետերբուրգի միջազգային տնտեսական համաժողովի 23-րդ լիագումար նիստից հետո կազմակերպված մամուլի ասուլիսին ասել  ՀՀ վարչապետ Նիկոլ Փաշինյանը՝ պատասխանելով ադրբեջանցի լրագրողի ԼՂ հակամարտությանը վերաբերող հարցին,  որն օգտագործել է «օկուպացված տարածքներ» արտահայտությունը։

Փաշինյանը նշել է, որ ԼՂ հակամարտության սկսվելուց ի վեր Հայաստանը հայտարարել է, որ երաշխավորում է Արցախի անվտանգությունը. «Եթե այդ անվտանգության երաշխիքը չտրվեր, ապա, դժբախտաբար, որևէ այլ երաշխիք Լեռնային Ղարաբաղի քաղաքացիներին չէր տրվի»։

ՀՀ վարչապետը ադրբեջանցի լրագրողին ասել է, որ Հայաստանի Հանրապետության կառավարությունը և Արցախի Հանրապետության իշխանությունները պատրաստ են արցախա-ադրբեջանական  շփման գծում ներդնել միջադեպերի հետաքննության մեխանիզմ։

«Որպեսզի խուսափենք վեճերից, թե ով, որտեղ և երբ է կրակել, անհրաժեշտ է քննարկել այն համաձայնությունները, որ  ձեռք էին բերվել դեռ 2016 թ-ին Վիեննայում: Խոսքը վերաբերվում է հետաքննությունների մեխանիզմի ստեղծմանը հակամարտության գոտում»,- նշել է Ն. Փաշինյանը:

Անդրադառնալով «Արսենալ» ֆուտբոլային ակումբի կիսապաշտպան, Հայաստանի ազգային հավաքականի ֆուտբոլիստ   Հենրիխ Մխիթարյանի՝ Բաքու չմեկնելու թեմային՝ Փաշինյանը հիշեցրել է, որ համացանցում տեսանյութ էր տարածվել, որում երևում էր, թե ինչպես էին ադրբեջանցի ոստիկանները մոտենում Մխիթարյանի անունով վերնաշապիկ կրող երկրպագուներին։

«Պատկերացրեք՝ երկրպագուները հայտնվում են ադրբեջանական ոստիկանության ուշադրության կենտրոնում՝ ընդամենը Մխիթարյանի անունով վերնաշապիկ կրելու համար: Կարծում եմ՝ դա ամեն ինչի մասին խոսում է»,-ասել է Փաշինյանը:

Նրա խոսքով, եղել են դեպքեր, երբ ծագումով հայ Ռուսաստանի քաղաքացին ցանկացել է այցելել Բաքու, սակայն թույլտվություն չի ստացել իշխանությունների կողմից:

«Դա շատ վատ նշան է: Կարծում եմ՝ նմանատիպ դեպքերը պետք է բացառել, որովհետև դրանք լարում են իրավիճակը: Հայաստանում նման խնդիր չկա: Վերջերս ադրբեջանական «Թուրան» գործակալության  լրագրողներից մեկն այցելել է Հայաստան, և, գիտեմ՝ որևէ խնդիր նա չի ունեցել, անվտանգության որևէ հարց նույնիսկ չի էլ բարձրացվել»,-ասել է Ն. Փաշինյանը:

Խոսելով ԵԱՏՄ-ից դուրս համագործակցության մասին, ՀՀ վարչապետն ասել է, որ չի կարծում, որ Հայաստանի ձգտումը համագործակցելու Չինաստանի և ԵԱՏՄ-ից դուրս երկրների հետ կարող է հակադրվել ԵԱՏՄ-ին: Նա նշել է, որ Եվրասիական տնտեսական միության երկրները հարաբերություններ են պահպանում բազմաթիվ այլ երկրների հետ և, երբեմն, այդ հարաբերությունները միատեսակ չեն, նույն այն երկրների հետ չեն, որոնց հետ համագործակցում է Հայաստանը, ուստի  չի տեսնում որևէ հակասություն դրանում:

«Լիագումար նիստում ես նշել եմ, որ այդօրինակ համագործակցությունը միայն ի շահ կլինի Եվրասիական տնտեսական միությանը»,- ասել է Փաշինյանը:

Վարչապետի խոսքով, Ռուսաստանի նախագահը նույնպես նշել է, որ Ռուսաստանի Դաշնությունը տնտեսական և քաղաքական կապեր է զարգացնում Չինաստանի հետ:

«Պուտինը ասել է, որ Չինաստանը Ռուսաստանի համար ռազմավարական գործընկեր է: Հայաստանը և Ռուսաստանը նույնպես ռազմավարական գործընկերներ են: Երկու ռազմավարական գործընկերություն և Ռուսաստանի, և մեր դեպքում կարող են իրար հակամերժ չլինել, այնպես որ սա նորմալ գործընթաց է»,- ասել է Ն. Փաշինյանը:

ՀՀ վարչապետ Նիկոլ Փաշինյանը հուսով է, որ գազի սակագնի վերաբերյալ Ռուսաստանի հետ ձեռք կբերվի համաձայնություն, և գինը կլինի այնպիսի, որը չի խոչընդոտի Հայաստանի հետագա տնտեսական զարգացմանը: Նա նշել է, որ Ռուսաստանի նախագահի հետ պայմանավորվել է  ինտենսիֆիկացնել բանակցությունները՝ միասնական որոշման հանգելու համար:

«Ես ասացի իմ ելույթում, որ ներկայումս Հայաստանում բավական լավ տնտեսական դինամիկա է նկատվում, բարձրաձայնեցի վիճակագրական տվյալները:  Սա կարևոր է ոչ միայն երկկողմ հարաբերությունների, այլև Եվրասիական տնտեսական միության համատեքստում, քանի որ ԵԱՏՄ-ն միասնական շուկա է և միասնական տնտեսական տարածք: Այն գործոնները, որոնք ազդում են ապրանքների և արտադրանքի ինքնարժեքի վրա, պետք է հավասարակշռված լինեն»,- նշել է Փաշինյանը:

Վարչապետի խոսքով, օրինակ, եթե գազի սակագինը ԵԱՏՄ տարածքում մի վայրում ցածր լինի, մեկ այլ վայրում՝ բարձր, ապա դա կխախտի հավասարակշռությունը և կհարվածի Միության բովանդակությանը: