Ձեր վստահելի աղբյուրը

«Ադեկվադ» կուսակցության նախաձեռնող խումբը քիչ առաջ շտապ մամուլի ասուլիս էր հրավիրել՝ ՀԿ փոխնախագահ, նախաձեռնող խմբի անդամ Ազատ Ադամյանի և նրա տան հետ կատարված միջադեպի  հետ կապված:

«Այս շարժումը փորձում են զրպարտել տարատեսակ ձևերով՝ փորձելով մեզ պիտակավորել որպես դավաճաններ, բռնարարներ, հրահրիչներ, սա փորձ է մանիպուլատիվ միջոցներով բացասական շաղարշ ստեղծել շարժման շուրջ և ներկայացնել մեզ նեգատիվ տեսանկյունից, ինչը չի համապատասխանում իրականությանը»,- այս մասին նշեց նախաձեռնող խմբի անդամ Լիկա Թումանյանը:

Տեղի ունեցածը նա բնութագրեց հետևյալ կերպ. «Փաստացի ստացվում է, որ Նիկոլ Փաշինյանի իշխանությունը չի կարող ունենալ ընդդիմություն: Բոլոր նրանք, ովքեր հանդես են գալիս որպես ընդդիմախոսներ, ներկայացվում են կամ նախկին իշխանությունների հետ կապված մարդիկ, կամ ինչ-որ պատվերներով աշխատող մարդիկ, կամ դավադիրներ»:

Լիկա Թումանյանի խոսքով՝ այս ձևով չի կարող կառուցվել քաղաքական համակարգ, ինչն էլ զրկում է իրենց քաղաքական դիսկուրսի հնարավորությունից:

«Պետք է արձանագրենք, որ ոստիկանության կողմից ադեկվադների՝ շինծու ահազանգերով բերման ենթարկելու մարտավարությանը ավելացել է նաև քրեածին տարրերի ներգրավմամբ միջամտություններն ու սադրանքների կազմակերպումը»,- հավելեց նա:

Նա շեշտեց, որ փորձում են սուտ հայտարարություններ անել, թե բերման ենթարկելը տեղի է ունեցել ինչ-ինչ պատճառներով, որոնք իրենք թաքցնում են.  «Անշուշտ, այս ամենը պետք է դիտարկել Նիկոլ Փաշինյանի այն հայտարարության ծիրի ներքո, որ սևազգեստ մարդիկ ահաբեկում են հանրությանը: Այսինքն՝ սկսած շորի գույնից, վերջացրած այլ դրվագներով, մեր քաղաքացիները այլևս չեն կարող իրենց պաշտպանված զգալ այս քաղաքում, քանի որ եթե դու ընդդիմախոս ես, կարող է բերման ենթարկելու պատճառ հանդիսանալ ամեն ինչ: Մենք ոստիկանությունից պահանջելու ենք ներկայացնել ահազանգերի իսկությունը»:

Նախաձեռնող խմբի հիմնադիրներից Արթուր Դանիելյանն էլ պատմեց. «Երեկ, երբ որ մենք կազմակերպել էինք ճաշկերույթ, նախապես ստացել էինք օդում կախված տեղեկություններ, որ հնարավոր է իրավապահ մարմիններն ինչ-որ գործողությունների դիմեն: Ակնկալում էինք, որ ինչ-որ նման պրոցես տեղի կունենա, բայց անակնկալի եկանք, երբ որ իրավապահները այդ միջոցներին դիմեցին, երբ մեր պլանավորած բոլոր միջոցառումներն ավարտված էին: Եվ տներով գնալու պահին, ենթադրում եմ, մեդիա ուշադրությունից խուսափելու նպատակով, իրավապահները դիմեցին այդ քայլին:
Ասեմ ավելին՝ մենք այս նախապես պլավանորված լինելու մասին տեղեկությունն ունեինք դեռ մինչև Նիկոլ Փաշինյանի հայտնի հայտարարությունը՝ սևազգեստ մարդկանց մասին: Այն ինչ որ տեղի է ունենում նրա ելույթից հետո սկսած, ինչ-որ գործողության փուլեր են, որի տրամաբանությունը մինչ օրս դժվարանում եմ հասկանալ»:

Նրա խոսքով՝ նույն շղթայի մեջ է նաև այսօր վաղ առավոտյան տեղի ունեցածը:

«Այսօր առավոտյան տեղի ունեցածն ինձ համար միանշանակ հատուկ գործողություն է: Ընդ որում՝ սա առաջինը չէ, առաջինը Մարալիկում տեղի ունեցած հատուկ գործողությունն էր: Սրա իմաստն այն է, որ մեզ սադրեն՝ հետագայում որի համար մեզ հնարավոր կլինի պատասխանատվության կանչել, քանի որ այս պահին ողջ իրավական համակարն ամեն ինչ անում է՝ իրավական ճնշումներ գործադրելու համար»:

«Ակնկալիք չունեմ, որ իրավական համակարգը պատշաճ արձագանք կտա տեղի ունեցածին, քանի որ վստահ եմ՝ այս գործողությունները կազմակերպված են հենց իրավական համակարգի կողմից: Սա է նաև պատճառը, որ Ազատ Ադամյանը հրաժարվել է համագործակցել իրավապահների հետ: Փաշինյանը փաստացի ահաբեկում է մարդկանց, բայց մեզ են բռնել տալիս դրա համար: Հիմա ես ասում եմ՝ մենք իր այդ հանցագործության մասին հաղորդում ենք տալու ոստիկանություն, պահանջելու ենք, որ իրավապահ համակարգը առնվազն նույն վերաբերմունքը դրսևորի նաև քաղաքացի Փաշինյանի նկատմամբ»,- նշեց Դանիելյանը:

Ինչ վերաբերում է կուսակցության ստեղծմանը՝ նա շեշտեց, որ իրենց որոշումն անբեկանելի է:

Ամփոփելով ասուլիսը՝ Լիկա Թումանյանն ասաց. «Իրականում իշխանությանը պետք է ոչ թե արդարադատություն, այլ գրպանային հարմար գործիքներ, որոնք որ կկիրառվեն սեփական ռեժիմն ամրապնդելու համար, և գլխավոր նպատակն է՝ թույլ չտալ ուժեղ ընդդիմություն ձևավորել: Այս ամենը որևէ կերպ չի կարող խանգարել կուսակցության կայացմանը, մենք շարունակելու ենք մեր գործուներությունը»: