Ձեր վստահելի աղբյուրը

Աբովյանի քաղաքապետի ՔՊ-ական թեկնածուի նախընտրական շտաբի ղեկավարի մեքենան հրկիզելու  դեպքով դեռ որևէ կասկածյալ ներգրաված չէ։ Ազգային ժողովում լրագրողների հետ զրույցում ասաց Քննչական կոմիտե նախագահ Հայկ Գրիգորյանը։ Նա հայտնեց,  որ Քրեական օրենսգրքի 185-րդ  հոդվածի 2-րդ մասով (Գույքը դիտավորությամբ ոչնչացնելը կամ վնասելը, որը կատարվել է հրկիզման, պայթյունի կամ հանրավտանգ այլ եղանակով)  քրգործ է հարուցվել, ճանաչվել է տուժող, հարցաքննվել է շուրջ 20 հոգի որպես վկա, նշանակվել է
դատահրդեհատեխնիկական և դատաապրանքագիտական փորձաքննություն։ Նախաքննությունը շարունակվում է։

Խոսելով «Հյուսիս–Հարավ» ճանապարհային միջանցքի հետ կապված քրեական գործի մասին, նա ասաց, որ այն իր ծավալով աննախադեպ է։

««Հյուսիս–Հարավ» ճանապարհաշինական միջանքի հետ կապված հարուցվել է քրեական գործ, այն իր ծավալով աննախադեպ է։ Գործի քննության ընթացքում հարուցվել են գործի նյութերով նոր քրեական գործեր, որոնք միացվել են մեկ վարույթ։ Այս պահի դրությամբ ունենք հսկողություն իրականացնող ինժեներին առաջադրված մեղադրանք, կան նաև առաջադրված մեղադրանք մեկ այլ անձի։ Քննչական խումբ է կազմել քննությունն իրականացնելու համար, նշանակվել են մի շարք փորձաքննություններ, որոնց եզրակացություններով նոր գնահատականներ և նոր անձանց մեղադրանք առաջադրման խնդիրներ կլինեն»,- նշեց ՔԿ նախագահը։

Հարցին, թե ի՞նչ նկատի ունենք աննախադեպային ասելով, նա ասաց. «Ճանապարհային միջանցքի շինարարությանը ներգրավված են շուրջ 50 կազմակերպություններ,  պատկերացնում եք՝ ինչ մեծ ծավալի փաստաթղթեր են առգրավվել, դրանք զննել է պետք»։

Հարցին՝ հնարավո՞ր է  բարձրաստիճան պաշտոնյաների մեղադրանք առաջադրվի, Քննչական կոմիտեի նախագահն ասաց. «Կստանանք փորձաքննության եզրակացությունը, դրանցով տարբեր անձանց արարքներին կտրվեն իրավական գնահատականներ»։

Անդրադառնալով ԱԱԾ տնօրենի և ՀՔԾ պետի հեռախոսազրույցի գաղտնալսման գործին, ՔԿ նախագահն ասաց. «Գաղտնալսման առումով նշեմ, որ այսօր հայտնի է տեխնիկապես 6 եղանակ, որը թույլ կտար գաղտնալսել ցանկացածին։ Բոլոր ուղղություններով քննություն է կատարվել, ուղարկվել են մի շարք հարցումներ, այդ թվում նաև արտասահմանյան երկրներ։ Քննությամբ այս պահին կան ձեռքբերված տվյալներ, որոնք հնարավոր է ապագայում հիմնավորեն, որ հարևան երկրներից մեկից է տարածում ստացել այդ գաղտնալսման բովանդակությունը։ Այդ ուղղությամբ քննությունն ակտիվ իրականացվում է, նշանակվել է մի շարք փորձաքննություններ»։

Հարցին՝ հարևան երկրներից մեկից, բայց հայերի կողմից կազմակերպվա՞ծ, հիմնական վարկածը ո՞րն է, Հ. Գրիգոյանը պատասխանեց. «Վարկածներից մեկը, այո, նաև դա է։ Այդ հարցին կպատասխանենք այն ժամանակ, երբ կհայտնաբերենք այդ անձին, ով տարածել է այդ գաղտնալսումը»։

Նա նշեց, որ եթե բավարար ապացույցներ լինեին որպես կասկածյալ, մեղադրյալ ներգարվվելու,  իրենք դա կանեին։ Փորձաքննությամբ հերքվել է ԱԱԾ-ի աշխատակիցների կողմից գաղտնալսում իրականացնելու հանգամանքը։

Պատասխանելով հարցին, թե միշտ կասկած են հայտնում, որ ՀՀ գաղտնալսող սաքեր ունեցել են բարձրաստիճան նախկին պաշտոնյաներ, օլիգարխները,  հնարավո՞ր է հենց նրանց միջից լինեն, Հ. Գրիգորյանն ասաց. «Մենք համապատասխան հարցումներ և այդ ուղղությամբ քննություն իրականացրել ենք, նման ապացույցներ կամ ապացույցների համակցություններ այս պահին չունենք»։