Ձեր վստահելի աղբյուրը

ՀՀ վերաքննիչ քրեական դատարանում ընթանում է Աժ նախկին պատգամավոր, ԵԿՄ նախկին ղեկավար, գեներալ Մանվել Գրիգորյանի խափանման միջոցի հարցով բողոքի քննությունը: Մ. Գրիգորյանի պաշտպանները պահանջում են Մ. Գրիգորյանի նկատմամբ խափանման միջոց կալանավորումը վերացնել կամ որպես այլընտրանքային խափանման միջոց կիրառել գրավը։

Մեղադրող դատախազ Վահե Դոլմազյանը նշեց, որ կան  փաստական տվյալներ, որոնք հիմք են տալիս կասկածել Մանվել Գրիգորյանի կողմից գործի քննությանը խոչընդոտելու համար. «Արձանագրված  փաստ կա, որ Մանվել Գրիգորյանը նախաքննության ընթացքում զանգի միջոցով ըստ էության հարկադրում է, որպեսզի իր ենթական վերցնի այն ամենն իր վրա, ինչ իր կողմից չի կատարվել։ Այդ փաստական տվյալներն առկա են գործի նյութերում»։ 

Խոսելով  Մանվել Գրիգորյանի հիվանդությունների մասին, դատախազը նշեց, որ Մ. Գրիգորյանի մոտ առկա հիվանդությունները թվարկված չեն կառավարության կողմից նախատեսված պատժի կրման հետ անհամատեղելի հիվանդությունների ցանկում։ Վահե Դոլմազյանն ասաց, որ պաշտպանական կողմի ներկայացմամբ 30  հիվանդություն ունի Մ. Գրիգորյանը, սակայն 10 հավելյալ հիվանդության մասին որևէ փորձագիտական տվյալ չկա, դա պաշտպանության կողմից ներկայացվող տեղեկություն է։  Նա նշեց, որ հիվանդություններից որևէ մեկը խոչընդոտ չէ, որպեսզի Մանվել Գրիգորյանը պահվի քրեակատարողական հիմնարկում։ Հաշվի առնելով Մանվել Գրիգորյանի մոտ առկա հիվանդությունները և դրանց կլինիկական ընթացքը, դրանց պատշաճ հսկողությունը հնարավոր է իրականացվել քրակատարողական հիմնարկներում։

«Մարդը գիտակցաբար դեղորայք չի ընդունում։ Այսօր այդ ռիսկերը, որոնք առաջացել են, բերել ու դնել պետության, դատարանի առաջ, որ պետությունը խոշտանգում է Մանվել Գրիգորյանին, դա  պաշտպանական կողմի որևէ կերպ չհիմնավորված, չփաստարկված դիրքորոշումն է։  Մարդը դեղարայք չի ընդունում, վիճակը ծանրանում է, պաշտպաններն ասում են  պետությունը խոշտանգում է։ Հետևաբար պաշտպանների կողմից ներկայացված հիմնավորումները չեն բխում սույն գործի հանգամանքներից, առավել ևս չեն բխում այն փաստական տվյալներից, որոնք հիմք են հանդիսացել առաջին ատյանի դատարանի կողմից խափանման միջոցի հարցը քննարկելու ժամանակ։ Առաջին ատյանի դատարանի որոշումը օրինական ու հիմնավորված է, հետևաբար վերաքննիչ բողոքները  ենթակա են մերժման»,- ասաց դատախազը։

Մ. Գրիգորյանի պաշտպանն ասաց, որ «Նաիրի» բժշկական կենտրոնի  պատասխանում նշված էր, որ նրան պետք է ստացիրոն և բազմապրոֆիլ բուժում. «Դատարանում հայտնել, որ քրեակատարողական հիվանդանցոն ունի այդ պայմանները, մեղմ ասած էլի, մեղմ ասած։ Եթե այդպես է, ինչո՞ւ  «Կենտրոն»  քրեակատարողական կենտրոնը չընդունեց, չպահեց։ Օրենքով չպահեց չէ՞»։  

Նա նշեց, որ երբ հիմքեր կան ենթադրելու, որ անձը կարող է խոչընդոտել  գործի քննությանը, ապա խոչընդոտելու հիմքով պայմանավորված գրավը չի կարող պատշաճ երաշխիք հանդիսանալ, հետևաբար գրավի միջնորդությունը նույնպես ենթակա է մերժման։ 

Հիշեցնենք, որ հունիսի 5-ին «Դատապարտյալների հիվանդանոց» ՔԿՀ–ում վատացել էր Մանվել Գրիգորյանի ինքնազգացողությունը, նա տեղափոխվել էր «Գրիգոր Լուսավորիչ» բժշկական կենտրոն։

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր,ինչպես նաև կատարել է տարբեր տեսակի հափշտակություններ։
Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։ Պաշտպանների  մի քանի անգամ դիմել են խափանման միջոց կալանքը գրավով փոխելու միջնորդությունները, սակայն մերժվել են։