Ձեր վստահելի աղբյուրը

Կոտայքի մարզպետ Ռոմանոս Պետրոսյանը Աբովյան քաղաքում քաղաքապետի ընտրությունները համարում է Հայաստանի հաղթանակը:

«Իրեն ընդդիմության հռչակած քաղաքական ուժն իր հովանավորյալ թեկնածուով հաղթանակ տարավ այսօրվա Հայաստանում, ինչը բնորոշ չէր մինչհեղափոխական Հայաստանին, երբ կառավարող ուժը գերխնդիր էր դնում տոտալ վերահսկողության տակ առնել բոլոր համայնքները»,- այսօր խորհրդարանում լրագրողների հետ զրույցում ասաց Ռոմանոս Պետրոսյանը: 

Նրա խոսքով՝  իրենց քաղաքական թիմն ընդունում է պարտությունը Աբովյան քաղաքում, որը բացառապես պայմանավորված է քաղաքացու քվեով. «Դա Աբովյանի արժանապատիվ քաղաքացու պարտությունն էր: Արժանապատիվ քաղաքացու պարտությունն այն է, որ եթե մեր թիմը քարոզարշավը կազմակերպել է բացառապես նոր քաղաքական մշակույթի, ինչպես նաև ազնիվ քաղաքական դիսկուրսի դաշտում, ապա հաղթող թեկնածուն և իր հովանավոր «Բարգավաճ Հայաստան» կուսակցությունն այդ հաղթանակին հասնելու համար բազմաթիվ փորձեր են արել՝ կիրառելու հին գործիքակազմեր, քրեաօլիգարխիկ գործիքակազմերի կիրառումներ են թույլ տվել, որոնց մասին բարձրաձայնել ենք և իրավապահները զբաղվում են դրանցով»:

Հարցին, թե քրեաօլիգարխիկի հետ կապված փաստեր ունի՞, Ռոմանոս Պետրոսյանը նշեց, որ օրինակ, քաղաքապետի իրենց թեկնածուն և նրա շտաբը կառավարվում էր անմիջապես Գագիկ Ծառուկյանի մերձավորների կողմից, Ծառուկյանի ամբողջ թիկնազորն էլ տեղամասերում էր ու դրանց շրջակայքում:

«Քրեաօլիգարխիկն այն արտահայտությունն է, որ ԱԺ պատգամավոր Էդուարդ Բաբայանն ասում է՝ Աբովյանը չենք ուզում գործ տվողների քաղաք դարձնենք, ի՞նչ է դա նշանակում։ Գործ տվողն այն քաղաքացի՞ն է, որն իրավապահ մարմիններին է ահազանգում իր անվտանգության համար, թե՞ այն համայնքապետն ու մարզպետն է, որ հնարավոր իրավախախտումները բացահայտելու համար ներգրավում է իրավապահ մարմիններին: Գուցե քրեաօլիգարխիայի կարկառուն ներկայացուցիչը ցանկանում է Աբովյանում հարցերը լուծել գողականով։ Ես այդ հարցի շուրջ պետք է խոսեմ ԱԺ նախագահի հետ և մտադիր եմ էթիկայի հանձնաժողով հրավիրելու խնդրանքով հանդես գալ, որ հանձնաժողովը հավուր պատշաճի քննի այդ ձևակերպումը և պատգամավորը բացատրություն ներկայացնի»։

Դիտարկմանը, թե պարտության պատճառը միգուցե այն էր, որ մարզպետն է վատ աշխատել, Ռոմանոս Պետրոսյանն ասաց, որ չի բացառում. «Գուցե ես էլ, մեր թիմն էլ վատ է աշխատել, չեմ բացառում, բայց այն, որ  ԲՀԿ-ն պաշտոնապես հերքում էր, որ աջակցում է այդ թեկնածուին, նա նույնպես հերքում էր, որ կապ ունի այդ կուսակցության հետ, բայց ընտրությունների օրը ԲՀԿ-ի բազմաթիվ պատգամավորների այն գերակտիվությունը, ինչպես նաև հետընտրական փարթիների մասին ինչո՞ւ  չեն խոսում»:

Նա անդրադարձավ նաև Լուսավոր Հայաստան» խմբակցության ղեկավար Էդմոն Մարուքյանի հայտարարությանը, թե քվեարկության օրը Կոտայքի մարզպետն իր վարքագծով փչացրել է ընտրությունները, երևի լավ կանի` հրաժարական տա:

«Մարզպետի կարգավիճակում  ես որևէ գործողություն  չեմ ձեռնարկել: Մինչ մարզպետի կարգավիճակը ստանձնելը ես հանդիսացել եմ Աբովյանի քաղաքացի, ընտրող, ինչպես նաև ընտրությունների օրը ես հանդիսացել եմ քաղաքական կուսակցության հիմնադիր անդամ, գործող վարչության անդամ, իսկ վերջին մի քանի տարիներին ընդդիմադիր գործունեություն եմ ծավալել: Իսկ Աբովյանի քաղաքապետի ընտրությունները ես չէի կարող բաց թողել, և դրա համար արձակուրդի մեջ գտնվելու ռեժիմում եղել եմ Գրիգոր Գուլյանի նախընտրական շտաբի ներկայացուցիչ»,- նշեց նա:

Դիտարկմանը, թե անկախ ամեն ինչից, իրեն ընկալում են որպես մարզպետի, Ռ.Պետրոսյանը պատասխանեց. «Այսինքն, եթե մենք մեր կարգավիճակով մարզպետ ենք, պետք է դադարենք լինել արժանապատիվ քաղաքացի, մարդ, հայր, որդի, եղբա՞յր: Ընտրական պրոցեսում ես որևէ գործիքակազմ չեմ կիրառել որպես մարզպետ: Դա պաշտոնապես եմ ասում»:

Մարզպետը նաև հաստատեց մամուլում շրջանառվող այն լուրերը, թե ՔՊ վարչության նախագահ Սասուն Միքայելյանը Աբովյանի ընտրություններում իրենց չի աջակցել:

Դիտարկմանը, թե նրա հարցը քննարկվելո՞ւ է վարչությունում, մարզպետը պատասխանեց. «Կարծում եմ, որ նորմալ է ընտրություններից հետո քննարկում ունենալը: Քննարկում կլինի, բայց հարցն անձնավորված չէ: Վարչությունում քննարկվելու է այն իրավիճակը, որն արձանագրել ենք Աբովյանում, այդ թվում՝ բազմաթիվ մտահոգություններ, ինչպես նաև այդ դրվագը:

ՔՊ վարչության մակարդակով որոշում էր կայացվել, որ Գրիգոր Գուլյանը կուսակցության անունից առաջադրվի Աբովյանի քաղաքապետի թեկնածու: Կուսակցության վարչության որոշումներն, իմ ընկալմամբ, պարտադիր են կուսակցության ու վարչության բոլոր անդամների համար»:

Անդրադառնալով Աբովյանի քաղաքապետի թեկնածու Գրիգոր Գուլյանի գրասենյակի ղեկավարի մեքենայի հրկիզմանը, մասնավորապես, ԲՀԿ խմբակցության պատգամավոր Գագիկ Ծառուկյանի հայտարարությանը, թե մեղավորները պետք է բացահայտվեն, միաժամանակ նա չէր բացառել, որ «դա շինծու սարքած գործ է», Ռոմանոս Պետրոսյանն ասաց, որ եթե նա ինչ-որ բան գիտի, ապա պետք է դիմի իրավապահներին. «Եթե չգիտի և պարզապես հայտարարում է, ապա զրպարտում է մեզ, մեր թիմին, մեր թեկնածուին: Ես խնդրելու եմ պարոն Ծառուկյանին դադարեցնել այդ հայտարարությունները, քանի դեռ չի դիմել ոստիկանություն»: