Ձեր վստահելի աղբյուրը

ՀՀ ԱԺ «Իմ քայլը» խմբակցության պատգամավոր Արմեն Խաչատրյանը շրջանառության մեջ է դրել ՀՀ Քրեական օրենսգրքում լրացում կատարելու մասին նախագիծը: Նա առաջարկում է քրեականացնել իշխանության ներկայացուցչին հրապարակային վիրավորելու կամ նրա ծառայողական պարտականությունների կատարմանը խոչընդոտելու նպատակով գործողություններ կատարելը, պատժել տուգանքով կամ կալանքով՝ առավելագույնը մեկ ամիս ժամկետով:

Panorama.am-ի հետ զրուցում Ինֆորմացիայի ազատության կենտրոնի հիմնադիր նախագահ Շուշան Դոյդոյանը նման նախագիծն անթույլատրելի է համարում, հետընթաց քայլ։

«Վաղուց անցել ենք, հաղթահարել ենք այդ փուլը, հիմա նորից վերադարձ է նախորդ կարգավորումներին, ինչի դեմ անընդհատ պայքարել ենք։ Հիմա ոնց որ այդ մարդիկ նոր են հայտնագործել։ Չեմ հասկանում այդ թեման։ Անթույլատրելի է, անհարիր մեդիազարգացումներին, ազատ արտահայտման զարգացումներին, նույնիսկ առկա կարգավորումներին։ Հետընթաց է»,- ասաց նա։

Շ. Դոյդոյանի խոսքով, ցանկացած նպատակ, ինչ էլ հետապնդի այդ նախագիծը, անթույլատրելի է. «Ամեն ինչ պետք է անել, որ նման նախագծերի մասին ընդհանրապես  խոսք չգնա, նման թեմաներ չքննարկվեն մեր հանրույթում։ Իզուր հետընթաց թեմաների վրա էներգիա ենք ծախսում, անիմաստ ժամանակ ենք ծախսում։ Պետք է առաջավոր մտքերը քննարկեինք, մտածեինք, որը որտեղ պետք է իրացնենք, որ ավելի զարգացում լինի, հիմա մտածում ենք՝ ինչպես անենք, որ հանկարծ այդ վատ բաները կյանքի չկոչվեն, էլի մի բան չխախտվի»։

Ինֆորմացիայի ազատության կենտրոնի հիմնադիր նախագահը նշեց, որ մեդիաոլորտի առաջնահերթությունները լուծելու փոխարեն արթնացնում են տարիներ առաջ մոռացված կարգավորումները։

«Չեմ հասկանում՝ նստում-նստում մտածում են, ոնց անեն ավելի բարդացնե՞ն։  Ավելի լավ չի  նախ քննարկել, թե որոնք ենք մեդիաոլորտի առաջնահերթությունները, դրանք լուծելու համար ինչ իրավական կարգավորումներ են անհրաժեշտ ու փորձեն իրենց ջանքերն ուղղորդել այդ առաջնահերթությունների բավարարմանը, ոչ թե անիմաստ, տասնամյակներ առաջ մոռացված կարգավորումները նորից արթանացնել»,- ասաց Շ. Դոյդոյանը։

Արդարադատության նախկին փոխնախարար, Արցախի նախկին ՄԻՊ Ռուբեն Մելիքյանի խոսքով, հերթական օրինակն է, մեկը մեկի հետևից բացահայտվում են կոնկրետ «Իմ քայլը» խմբակցության առանձին պատգամավորների ոչ կեմպետենտությունը։

«Նման նախագիծ առաջադրելն ինքնին շատ խոսուն է։ Վստահ եմ, որ այս նախագիծը կենսունակ չի լինելու, բայց միայն այն հանգամանքը, որ պատգամավորը նման նախաձեռնությամբ է  հանդես գալիս, նշանակում է, որ պատգամավորը չի պատկերացնում ժամանակակից իրավական պետություններում առկա խնդիրները»,- ասաց նա։

Ռ. Մելիքյանի խոսքով, Հայաստանում եղել է իրավիճակ, երբ զրպարտությունը, վիրավորանք առհասարակ բոլորի նկատմամբ քրեականացված է եղել։

«Առավել ևս նույն «Քաղաքացիական պայմանագիր»  կուսակցությունը իր ղեկավարով  ամեն ջանք գործադրում է դատական իշխանության նկատմամբ վերահսկողություն սահմանելու համար։ Եթե ունենանք  այս երկու գործոնների հանրագումարը, կտեսնենք, որ դրա արդյունքում մարդիկ կվախենան քննադատել գործող իշխանությանը՝ հաշվի առնելով այն հանգամանքը, որ կարող է նրանց քննադատությունը դիտվի որպես վիրավորանք։ Շատ սուբյեկտիվ երևույթ է վիրավորանքը»,- ասաց Ռ. Մելիքյանը։