Ձեր վստահելի աղբյուրը

ԱԺ նախկին պատգամավոր, գեներալ Մանվել Գրիգորյանի նկատմամբ տոտալ հաշվեհարդար է կատարվում։ Լրագրողների հետ հանդիպմանը նման կարծիք հայտնեց նրա պաշտպան Լևոն Բաղդասարյանը։

Նա հիշեցրեց, որ իր պաշտպանյալն ունի մոտ 30 հիվանություն, որոնք ձեռք է բերել կալանքը կրելու ընթացքում, քաղաքացիական հիվանդանոցից հարկադրաբար տեղափոխել էին «Դատապարտյալների հիվանդանոց» ՔԿՀ, որտեղից էլ կոմայի մեջ կրկին տեղափոխել են քաղաքացիական հիվանդանոց։

Փաստաբանն ասաց, որ երեկ «Սուրբ Գրիգոր Լուսավորիչ» ԲԿ բժիշկների և առողջապահության նախարարության կողմից  լիազորած բժիշկների մասնակցությամբ  տեղի է ունեցել կոնսիլիում: Եզրակացության համաձայն, եղած ծանր հիվանդություններին ավելացել է ևս երեք ծանր հիվանդություն։ Նա չբարձրաձայնեց, թե որոնք են, միայն նշեց. «Հիվանդությունների այդ տեսակը, որը նոր է հայտնաբերվել, հետևանքը լինելու է անձի որոշակի անդամահատություն»։

Լ. Բաղդասարյանը նշեց, որ չնայած դրան, այս ընթացքում ՔԿՀ-ի համապատասխան ծառայությունը  կրկին գրություն է գրել, որ այն հիվանդությունները, որոնք ունի Մանվել Գրիգորյանը,  «Դատապարտյալների հիվանդանոցում» բոլոր պայմանները կան բուժման համար։

«Այսքանից հետո, եթե պետական լիազոր մարմինները գնահատական չտան տվյալ պաշտոնատար անձի ստահոդ հայտարարություններին, հետևությունս լինելու  է այն, որ ուղղակի հրահանգ կա վերջինս նկատմամբ իրականացնել հաշվեհարդար։ Հակառակ պարագայում տվյալ անձը  չէր ունենա այդ համարձակությունը կառավարության դիրքորոշումից, նոր հայտնաբերված հիվանդությունից հետո նման հայտարարություն անել։ Հետամուտ եմ լինելու, եթե առաջիկա կարճ ժամանակահատվածում պատասխանատվության չենթարկեն անօրինականություն կատարող լիազոր մարմնի պաշտոնատար անձանց, դիմելու եմ ՄԻԵԴ»,- ասաց փաստաբանը։