Ձեր վստահելի աղբյուրը

Բարձրագույն դատական խորհրդի անդամի թեկնածու Գրիգոր Բեքմեզյանն այսօր խորհրդարանում փակ հանդիպում է ունեցել «Իմ քայլը» խմբակցության պատգամավորների հետ։

Հանդիպումից հետո լրագրողների հետ զրույցում նշեց, որ հանդիպման արդյունքները դրական է գնահատում։

«Հարցերի լայն շրջանակ ենք քննարկել և իմ անձի, և իմ պատկերացումների մասին, թե ինչպիսին պետք է լինի դատական համակարգի բարեփոխումը։ Այսինքն՝ այնպիսի հարցերի շրջանակ, որը հնարավորություն կտա իրենց պատկերացում կազմել իմ մասին»,- ասաց թեկնածուն։

Ի պատասխան հարցին, թե իր կարծիքով, ԲԴԽ-ն ինչպե՞ս է աշխատել նախկինում, ասաց. «Հրաժարականների շարանը արդեն իսկ հուշում է՝ ինչպես է աշխատել։ Եթե իրենք էլ հասկանային, որ լավ ու արդյունավետ են աշխատել մինչ այժմ, ապա հրաժարականների շարան չէր լինի։ Այնուամենայնիվ, գտնում եմ, որ ԲԴԽ-ն վերջին ժամանակահատվածում դատական համակարգում մեծ գործ կատարել է, բայց մեկ տարին դեռևս բավարար չէ՝ վերջնական գնահատական տալու համար։ Փաստն այն է, որ մենք ունեցանք դատական համակարգի ճգնաժամ, և դրա մեջ մեղադրում են նաև ԲԴԽ-ին։ Ամբողջովին արդյունավետ համարել ԲԴԽ-ի աշխատանքը մենք չենք կարող», - հավելեց թեկնածուն։

Լրագրողի հարցին, թե անկախ չի՞ եղել ԲԴԽ-ն, ինչի հետևանքով նման խնդիրներ են ծագել, նա  պատասխանեց. «Հակառակը, անսպասելի անկախ է եղել, միգուցե, դրա համար չի հասկացել՝ ինչ անի։ Երկրում փոխվեց իշխանական համակարգը, ինչի արդյունքում փոխվեցին մոտեցումները դատական համակարգի նկատմամբ։ Այն, որ մեր դատական համակարգը ունի խնդիրներ, բոլորս գիտեինք։ Այդ խնդիրները գալիս էին իշխանություններից ու իշխանափոխությունից հետո դատական համակարգի ու իշխանությունների միջև անջրպետ առաջացավ, այսինքն՝ դատական համակարգը սկսեց այլևս ցուցումներ չստանալ նոր իշխանություններից, որի հետևանքով դատական համակարգը սկսեց մտածել՝ բա ումից ստանա հանձնարարականներ»։

Նրա խոսքով՝ ԲԴԽ անդամ ընտրվելու դեպքում առաջին հերթին պետք է կարգավորել Դատական խորհուրդ և Բարձրագույն դատական խորհուրդ հարաբերությունները։

«Ես ունենալու եմ իմ անկախությունը: Բոլոր խմբակցությունների, ինչպես նաև «Իմ քայլը» խմբակցության հետ հանդիպման ժամանակ նրանց առաջ էլ պայման եմ դրել, որ ԲԴԽ չեմ գնում որպես «Իմ քայլը» խմբակցության ներկայացուցիչ, ես գնում եմ՝ որպես ԱԺ-ից ընտրված անդամ: Այն հանգամանքը, որ իշխանությունները չեն ազդում դատական համակարգի վրա, ինձ հույս է տալիս հավատալու, որ եթե նշանակվեմ ԲԴԽ անդամ, իշխանությունները չեն փորձելու իմ վրա ազդել: Եթե փորձ արվի իմ վրա ճնշում գործադրելու, ես առաջինն եմ դրա մասին ասելու, ես թույլ չեմ տա իմ հեղինակությունը նսեմացվի»,- նշեց նա: