Ձեր վստահելի աղբյուրը

2019 թվականի հունվար-ապրիլին Հայաստանում արտադրվել է 2 մլրդ 422.2 մլն կՎտ ժամ էլեկտրաէներգիա, ինչը նախորդ տարվա նույն ժամանակահատվածի համեմատ նվազել է  9.2%-ով։ Այս մասին տեղեկանում ենք ՀՀ վիճակագրական կոմիտեից:

Վիճակագրության համաձայն, այս տարվա չորս ամիսներին  ՋԷԿ-երի արտադրության ծավալը նվազել է 31.2%-ով և կազմել 676.6 մլն կՎտ ժամ,  ջերմային էներգիայի արտադրությունը՝ 42.5%-ով՝ կազմելով 12.3 հազար հեգաջոուլ:

Ինչ վերաբերում է ՀԷԿ-երին, ապա արտադրության ծավալներն այստեղ նվազել են 0.7%-ով՝  կազմելով 693.0 մլն կՎտ ժամ։

Վիճակագրության համաձայն՝ այս տարվա հունվար-ապրիլին Հայաստանի ատոմային էլեկտրական կայանն (ՀԱԷԿ) արտադրել է 1 047.8 մլն կՎտ ժամ էլեկտրաէներգիա, ինչը 2018թ-ի նույն ժամանակահատվածի համեմատ ավելացել է 6.5%-ով:

Նշենք նաև, որ այս տարվա առաջին չորս ամիսներին 1.8 անգամ ավելացել է  հողմային էլեկտրակայանների կողմից արտադրված էլեկտրաէներգիայի ծավալը՝ կազմելով  1.4 մլն կՎտ ժամ էլեկտրաէներգիա:

Նշված ժամանակահատվածում էլ արևային էլեկտրակայաններն արտադրել են  3.4 մլն կՎտ ժամ էլեկտրաէներգիա՝ նախորդ տարվա հունվար-ապրիլի համեմատ 2.8 անգամ ավելի: