Ձեր վստահելի աղբյուրը

Երևան քաղաքի ընդհանուր իրավասության դատարանում, դատավոր Մնացական Մարտիրոսյանի նախագահությամբ, շարունակվում է ԱԺ նախկին պատգամավոր,  գեներալ Մանվել Գրիգորյանի և նրա կնոջ՝ Նազիկ Ամիրյանի գործով դատական նիստը։  Մանվել Գրիգորյանը չի ներկայացել դատարան։ Պաշտպանների խոսքով, առողջական վիճակի պատճառով։

Նախագահող դատավոր Մնացական Մարտիրոսյանի խոսքով, քանի որ ամբաստանյալը ներկա չի, նիստը ենթակա է  հետաձգման, բայց   նշեց, որ հայտարարություն ունի անելու։

Դատավորը տեղեկացրեց, որ  դատարանը ստացել է Պետական գույքի կառավարման կոմիտեի նախագահ Նարեկ Բաբայանի գրությունը, որը վերաբերում է արգելադրված գույքին։ 

Գրության մեջ նշել է, որ Մ. Գրիգորյանի պաշտպան Լևոն Բաղդասարյանը  վարչապետին ուղղված 2018թ. հոկտեմբերի 17–ին գրությամբ  ցանկություն է հայտնել  «Ակնալճի կուղբաբուծական տնտեսություն» ընկերության պատկանող անշարժ գույքը նվիրաբերել  Հայստանի Հանրապետությանը։ Ամիսներ անց դիմումատուն կրկին դիմել է վարչապետին առ այն, որ պետությանը  պատճառված վնասը ցանկանում է հատուցել այդ ընկերության 100 տոկոս բաժնեմասով, որի սեփականության ներքո գտնվող գույքը մի քանի անգամ գերազանցում է  հանցանքի հետևանքով պետությանը պատճառված վնասի գումարի չափը, որի հիմքով էլ խնդրել է «Քաղաքացիական օրենսգրքի» 605 հոդվածի ուժով նշված ընկերության 100 տոկոս բաժնեմասն ընդունել որպես նվիրատվություն։

Պետական գույքի կառավարման կոմիտեն հետաքրքրվել է, թե որքա՞ն է կազմում պետությանը պատճառված վնասի չափը, ընկերությանը պատկանող շարժական և անշարժ գույքի, բաժնետիրոջը պատկանող բաժնետոմսերի նկատմամբ արգելանք կիրառված են, թե ոչ։

Դատավորն ասաց, որ դեռևս քրեական գործի նյութերը չեն հետազոտել, սակայն տեղեկացրեց,  որ արգելանք է դրված Մ. Գրիգորյանի ամբողջ գույքի՝  այդ թվում բաժնետոմսերի, տրանսպորտային միջոցների վրա։ Մ. Գրիգորյանի պաշտպաններից  Լևոն Բաղդասարյանը հայտարարեց, որ այժմ ճշտված է վնասի չափը,  գույքն արգելանքի տակ է։

«Մեր կողմից փոխհատուցման կամարտահայությունը կա, բայց տեխնիկական պատճառով կառավարությունը չի կարողանում իրագործել, որովհետև գույքը գտնվում է արգելանքի տակ։ Այսօր սահմանափակված է օրենքի ուժով վնասը փոխահոտցելու մեր իրավունքը։ Օրենսդիրը թույլ է տալիս վնասը փոխհատուցել, գործը կարճել, բայց մենք այսօր չենք կարողանում այդ գործառույթն իրականացնել։ Իմ պաշտպանը զրկված է օրենքով նախատեսված՝ վնասի չափը փոխհատուցելու իրավունքից»,-ասաց Լ. Բաղդասարյանը։

Նիստի ընթացքում մեղադրող դատախազ Վահե Դոլմազյանը միջնորդություն ներկայացրեց Մ. Գրիգորյանի նկատմամբ նշանակել միջգերատեսչական հանձնաժողովային դատաբժշկական փորձաքննություն՝ նշելով, որ այն բխում է Գրիգորյանի շահերից: Նրա խոսքով, եթե առողջական վիճակի պատճառով կարող է դատական նիստերին չներկայանալ, ամեն անգամ հետաձգվեն, հետևաբար ցանկացած միջնորդություն կարող է քննության առարկա չդառանալ։

Փորձագիտական հանձնաժողովը պետք է տա հետևյալ հարցերի պատասխամը՝ ի՞նչ հիվանդություններով է տառապում Մանվել Գրիգորյանը, այդ հիվանդությունները կամ դրանցից որևէ մեկը տեսակով, ծանրության աստիճանով համապատասխանում է արդյո՞ք  ՀՀ կառավարության 2006 թվականի որոշման հավելվածում նախատեսված պատիժը կրելուն  խոչընդոտող ծանր հիվանդություններին, հնարավո՞ր է այդ հիվանդությունների դեպքում պատշաճ հսկողություն իրականացնել ՔԿՀ-ում պահվելու դեպքում, թե ոչ։

Մանվել Գրիգորյանին մեղադրանք է առաջադրվել այն բանի համար, որ նա ապօրինի կերպով՝ «Զենքի մասին» ՀՀ օրենքով նախատեսված սահմանափակումների շրջանցմամբ, կնոջ՝ Նազիկ Ամիրյանի, որդու՝ Արման Գրիգորյանի և քննությամբ չպարզված այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող երեք տներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր,ինչպես նաև կատարել է տարբեր տեսակի հափշտակություններ։
Մ.Գրիգորյանը  կալանավորվել էր 2018 թ. հունիսի 19-ին, սակայն դեկտեմբերի 21-ին Երևան քաղաքի ընդհանուր իրավասության դատարանի որոշմամբ 25 միլիոն դրամ գրավի դիմաց ազատ էր արձակվել։ Նրա նկատմամբ այլընտրանքային խափանման միջոց գրավը կիրառելու վերաբերյալ առաջին ատյանի դատարանի որոշման դեմ  դատախազությունը վերաքննիչ բողոք էր ներկայացրել: Բողոքը բավարարվել էր, և Մ. Գրիգորյանը հունվարի 22-ին կրկին կալանավորվել է։ Պաշտպանների  մի քանի անգամ դիմել են խափանման միջոց կալանքը գրավով փոխելու միջնորդությունները, սակայն մերժվել են։