Ձեր վստահելի աղբյուրը

Վերաքննիչ քրեական դատարանում ՀՀ երկրորդ նախագահ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի վերաբերյալ բողոքի գործով քննությանը  Ռոբերտ Քոչարյանի պաշտպաններից Հայկ Ալումյանը հայտարարեց, որ դատարանն իրենց չի պարզաբանում իրենց իրավունքները, ունե՞ն միջնորդություններ ներկայացնելու իրավունք, եթե այո, ո՞ր փուլում։

«Ես ընդմիջում տվեցի, որպեսզի լարվածությունը թուլանա։ Բոլոր դեպքերում չենք եկել այստեղ, անձամբ ես, վեճի, վիճաբանության մեջ մտնելու։  Բոլորիդ հորդորում եմ  պահպանել համատեղ հարգանքը, կարգը դատական նիստում, ինչը պետք է քննարկենք, համատեղ փոխադարձ հարգանքի  մթնոլորտում քննարկենք։ Որևէ մեկին նեղացնելու որևէ միտում չունեմ։ Եթե փոքր ինչ լարվածություն է առաջացել, հայցում եմ  բոլորիդ ներողամտությունը»,-  հայտարարեց Ա. Դանիելյանը։

Հայկ Ալումյանը հիշեցրեց, որ ինքնաբացարկի միջնորդություններից այն կողմ, դատավարությունն այլ փուլեր չի անցել։

«Մենք ակնկալում էինք, որ ինքնաբացարկի վերաբերյալ հարցերին անդրադառնելուց հետո դատարանը մեզ կպարզաբանի մեր իրավունքներն ու պարտականություններն այս դատավարությանում, որովհետև առանձնահատկություններ ունի»,- ասաց փաստաբանը։

Հիշեցնենք, որ Վերաքննիչ քրեական դատարանում՝ նախագահությամբ Արմեն Դանիելյանի շարունակվում է Հայաստանի  երկրորդ նախագահ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի վերաբերյալ գործով Գլխավոր դատախազության ինչպես նաև տուժողների իրավահաջորդների ներկայացուցիչ Վահե Գրիգորյանի և տուժողի ներկայացուցիչ Սեդա Սաֆարյանի կողմից ներկայացված վերաքննիչ բողոքների քննությունը։

Հայկ Ալումյանը հետաքրքրվեց, թե առանձին դատական ակտե՞ր են կայացվելու, թե՞ ոչ։

«Չի լինելու չէ՞ այնպես, որ խափանման միջոցի և Սահմանադրական դատարան դիմելու ու գործի վարույթը կասեցնելու մասին որոշումների վերաբերյալ մեկ դատական ակտով անդրադառնաք»,- հարցրեց փաստաբանը։

Դատավորը պատասխանեց. «Իհարկե, ոչ»։

Նա պարզաբանեց, որ վերաքննիչ դատարանում, երբ ուղարկվել է այդ գործը,  մուտքագրվել է մեկ գործ, մեկ քրեական գործի  շրջանակում վիճարկվել է մեկից ավելի դատական ակտեր։

«Այդ դատական ակտերն ընդունվել են վարույթ, նշանակվել է քննություն։ Բոլոր դեպքերում առանձին դատական ակտեր են կայացվելու, ըստ իմ պատկերացման»,- ասաց Ա. Դանիելյանը։

Տուժողի ներկայացուցիչ Սեդա Սաֆարյանը դիմեց դատարանին. «Ոնց հասկացա, այս դատական նիստն այսպես ձգձգելու, անիմաստ հարցեր բարձրացնելու հնարավորություն եք տվել պաշտպանության կողմին։ Քիչ է մնում ակտն էլ ասեք»։

Դատավորն ասաց, որ ոչ մեկին հնարավորություն չի տվել, ապա խնդրեց նստել։

«Զուտ կազմակերպչական բնույթի հարցեր են»,- նշեց դատավորը։

Սեդա Սաֆարյանը խնդրեց թույլ տալ մի քանի րոպեով դուրս գալ։

«Լավ չեք զգո՞ւմ տիկին Սաֆարյան, ասենք ջուր տան»,- հարցերց դատավորը։

«Չէ, ես կգնամ, կխմեմ»,- պատասխանեց Ս. Սաֆարյանը։

Դատավորը հետաքրքրվեց, թե արդյոք կարող են իր բացակայության ժամանակ շարունակել նիստը, թե սպասեն։

«Շարունակեք, շարունակեք»,- ասաց տուժողի պաշտպան Ս. Սաֆարյանը և դուրս եկավ։

Երբ Սեդա Սաֆարյանը վերադարձավ, դատավորը  թույլ տվեց խոսել։

«Այսօր, այն, ինչ որ արվում է երկու կողմերից էլ՝ թեկուզ ես, թեկուզ պաշտպանական կողմը, մեղավորը դուք եք։  Չգիտեմ ինչու, այս գործով մի տեսակ տպավորություն է, որ առանձնահատկություն կա։ Ինչպես քննվել է խափանման միջոցի բողոքարկումները, նույնկերպ էլ սա պետք է քննարկվի։ Խնդրում եմ կանոնակարգել այս գործի քննության ընթացքը։ Եթե ոչ, ամեն մեկս մեր տեղից կկանգնենք ու ձեր գործողություններին գնահատական կտանք։ Դուք սահմանեք այն  ընթացակարգը, որով պետք է քննեք այս բողոքները հերթականությամբ»,- ասաց տուժողի ներկայացուցիչը։