Ձեր վստահելի աղբյուրը

Ազգային ժողովի կողմից այսօր Սահմանադրական դատարանի դատավոր  ընտրված Վահե Գրիգորյանն Արարատ Միրզոյանին խնդրել է հետաձգել իր երդման արարողությունը, որպեսզի մինչ այդ հրաժարվի որոշ գործերից:

Լրագրողների հետ զրույցում Վահե Գրիգորյանն ասաց, որ Մարդու իրավունքների եվրոպական դատարանում մոտ 80 գործերով մասնակցում է վարույթներին:

«Ես դրանց մի զգալի մասից արդեն դուրս եմ եկել վերջին օրերին, նախնական նամակներն ուղարկել եմ՝ դատարանին տեղեկացնելով: Ես խնդրել եմ Ազգային ժողովի նախագահին, որպեսզի հետաձգի իմ երդման արարողությունը, որ մինչև այդ հասցնեմ ոչ միայն ՄԻԵԴ-ին, այլև ՀՀ ներպետական դատարաններին, ինչպես նաև  միջազգային քրեական դատարանին տեղեկացնել իրենց ցուցակներից  դուրս գալու մասին», - ընդգծեց նա:

Այսպիսով, ըստ Վահե Գրիգորյանի, այդ ժամանակահատվածում պետք է հասցնի դատարաններին տեղեկացնել բոլոր գործերից հրաժարվելու մասին:

Նրա խոսքով՝ այդ գործերը վերցնելու են այլ իրավաբաններ,  այդ թվում՝ Մարտի 1-ի գործը:

«Բոլոր այն գործերով, որտեղ ես կամ, դուրս եմ գալու: Թողնելու եմ ողջ զբաղվածությունը, դադարեցնելու եմ  ցանկացած ներգրավվածություն որևէ գործում՝ լինի դա միջազգային փորձագետի կարգավիճակում, թե այլ»,- ասաց նա:

ՍԴ նորընտիր դատավորն անդրադարձավ նաև ՍԴ նախագահ Հրայր Թովմասյանի հետ համատեղ աշխատանքին:

«Որքան էլ որ Ձեզ համար հիմա տարօրինակ կհնչի, ես այն պատկերացնում եմ բացառապես արդյունավետ՝ ինչ կարգավիճակում և ինչ տևողությամբ էլ որ դա լինի: Ես հուսով եմ, որ դա լինելու է արդյունավետ»,- նշեց Վահե Գրիգորյանը: