Ձեր վստահելի աղբյուրը

Վերաքննիչ քրեական դատարանում ՀՀ երկրորդ նախագահ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի վերաբերյալ բողոքի գործով քննությանը   նախագահող դատավոր Արմեն Դանիելյանը նկատողություն արեց Յուրի Խաչատուրովի պաշտպան Միհրան Պողոսյանին։

Մ. Պողոսյանը ցանկանում էր հայտարարությամբ հանդես գալ, սակայն դատավորն ասաց, որ այժմ այդ փուլում չեն, պատեհ պահին թույլ կտա ներկայացնել իր դիտարկումները։ 

«Պարոն Պողոսյան խանգարում եք դատարանին բնականոն գործունեությունը ծավալելու առումով։ Հնարավոր է  ձեր նկատմամբ քննարկվի դատական սանկցիա»,- ասաց դատավոր Արմեն Դանիելյանը։

Այնուհետև նա դիմելով Ռ. Քոչարյանի պաշտպաններից Հայկ Ալումյանին՝ ասաց. «Որևէ մեկի հրճվանքը չեմ առաջացնում, ինչ որ բան եմ ասում, որ ծիծաղելի՞ է»։

Հ. Ալումյանը ասաց, որ առարկում է դատարանի գործողությունները։

«Հրճվել բառն իմ նկատմամբ չկիրառեք։ Առաջին անգամ եմ ասում, նուրբ եմ ասում, մեղմ եմ ասում։ Այս դատավարությունը դարձրել եք մի հատ կրկես»,- ասաց Ալումյանը։

«Ում վրա եք մատ թափ տալիս պարոն Ալումյան»,-արձագանքեց դատավորը։

Ալումյանը կրկնում էր, որ իրավունք ունի առարկել դատարանի գործողությունները։ Դատավորն էլ  կրկնում՝ պարոն Ալումյան նստեք, այդ փուլը չէ, խանգարում եք դատարանի աշխատանքը։

«Նկատի ունենալով, որ պարոն Ալումյանը զուգահեռ խոսում է նախագահող դատավորի հետ, դատական նիստը վարել թույլ չի տալիս, հայտարարվում է 10 րոպե ընդմիջում»,- ասաց դատավորը։