Ձեր վստահելի աղբյուրը

«Ռոբերտ Քոչարյանի խափանման միջոցի վերաբերյալ առաջին ատյանի դատարանի դատական ակտի վերլուծությունն ակնհայտորեն վկայում է, որ առաջին ատյանի դատարանը խուսափել է սեփական գնահատականները հնչեցնել հիմնավոր կասկածի առնչությամբ»,- ՀՀ երկրորդ նախագահ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի վերաբերյալ վերաքննիչ բողոքի քննությունը հայտարարեց ՀՀ գլխավոր դատախազ Արթուր Դավթյանը։

Նա նշեց, որ առաջին ատյանի դատարանում շուրջ երեք օր քննություն է եղել, բավականին խորությամբ, առանձին ապացույցները վերլուծելով ներկայացվել է,  դատարանն ընդամենն իր որոշումներում արձանագրումներ է անում նախկինում խափանման միջոցին անդրադարձած դատարանների դիրքորոշումներին։

«Մեր գնահատմամբ,  սա ոչ այլ ինչ է, քան տվյալ գործով  արդարադատություն իրականացնելուց խուսափելու միտում»,- ընդգծեց դատախազը։

Նա նաև նշեց, որ դատարանն իր ձեռքի տակ ուներ գործի ողջ նյութերը, իրենք մանրամասն ներկայացրել են  մեղադրյալին մեղսագրված արարքներով հիմնավոր կասկածի առկայությունը, փաստարկված ու մանրամասն ներկայացվել է  սահմանադրական կարգը  տապալելու մեղադրանքի նկարագրությունը, հանցավոր սխեմայի առանձին փուլերով և դրանք վկայող ապացույցներով։

«Նույն մեղադրյալին մեղսագրված հաջորդ հանցագործության՝ կաշառքի դրվագով մանրամասն ներկայացվել էր գործում առկա ապացույցները, դրանց տրամաբանական կապն ու վերլուծությունը, մասնավորապես, կաշառք տվողի կաշառք տալու գործընթացին տեղյակ անձանց ցուցմունքները։ Այս պայմաններում դատարանը բացարձակ սեփական դիրքորոշումը չի հայտնել այս հարցի առնչությամբ՝ արձանագրվելով միայն մինչդատական վարույթի վերահսկողության տիրույթում հիմնավոր կասկածը մերժած դատարանների դիրքորոշումները՝ կրկին մոռանալով, որ նախորդ փուլերում դատարաններն այդչափ նյութ չէին ունեցել իրենց ձեռքի տակ»,- ասաց Ա. Դավթյանը։

ՀՀ գլխավոր  դատախազի խոսքով, մեղադրյալին մեղսագրված արարքները բարդ, կազմակերպված, հստակ դերաբաշխմամբ հանցավոր սխեմայի դրսևորում է, որի դերակատարները տվյալ պահին ծառայողական ուղղակի կախվածություն են ունեցել մեղադրյալից, պետական ապարատի մի զգալի հատված անմիջական ներգրավածություն է  ունեցել հանցավոր գործունեությանը։

«Նման բարդ սխեմայի պայմաններում,  մյուս կողմից էլ  քննության ակտիվ ընթացքի առկայությամբ  ակնհայտ չէ արդյո՞ք դրանում ներգրավված անձանց փոխադարձ շփումների, օբյեկտիվ քննությանը  խոչընդոտներ ստեղծելու մոտիվացիան։ Առավել քան ակնհայտ է,- ասաց Ա. Դավթյանը։

Նրա խոսքով, մեղադրյալին մեղսագրված իրադարձությունների հանցավոր բնույթի գիտակցումը դրանում ներգրաված անձանց ստիպել է ակտիվորեն հնարավոր բոլոր միջոցներով քողարկել այդպիսիք։

«Հիմա, երբ շղթայական բացահայտվում է  ինչպես հանցավոր գործունեության դետալները, այնպես էլ հատկապես դրանց քողարկման մեխանիզմները, տրամաբանական է արդյո՞ք այդ գործընթացին խոչընդոտելը։ Միանշանակ այո։ Առավել քան մեծ է փաստարկված հավանականությունը  մեղադրյալի կողմից գործի օբյեկտիվ քննությանը խոչընդոտելու ռիսկը»,- հայտարարեց Արթուր Դավթյանը։

ՀՀ գլխավոր դատախազի ներկայացմամբ, առաջին ատյանի  դատարանն ապօրինի և անհիմն դատական ակտ է կայացրել՝ մեղադրյալ Ռոբերտ Քոչարյանի նկատմամբ խափանման միջոց  ընտրելով  անձնական երաշխավորությունը. «Գտնում ենք, որ այդ խափանման միջոցն անհամաչափ է, ենթակա է բեկանման, ստեղծված իրավիճակում մեր կողմից  ներկայացված հիմնավորումներով  միակ համաչափ խափանման միջոցը մեր օրենսդրությամբ նախատեսված կալանավորումն է»։

Նա նշեց, որ առաջին ատյանի դատարանն ամեն ինչ արել է այս գործով քննությունից խուսափելու համար։

«Իրավաչափորեն բացառվում էր անհրաժեշտությունը Սահմանադրական դատարան դիմելու, այն էլ ընթացակարգային խախտումներով,  հետևաբար բացակայում է  սույն գործի վարույթը  կասեցնելու հիմնավորվածությունը»,- ասաց Արթուր Դավթյանը։

Հիշեցնենք, որ Վերաքննիչ քրեական դատարանում՝ նախագահությամբ Արմեն Դանիելյանի,  քննվում է Հայաստանի  երկրորդ նախագահ Ռոբերտ Քոչարյանի, նաև՝ Սեյրան Օհանյանի, Յուրի Խաչատուրովի և Արմեն Գևորգյանի վերաբերյալ գործով Գլխավոր դատախազության ինչպես նաև տուժողների իրավահաջորդների ներկայացուցիչ Վահե Գրիգորյանի և տուժողի ներկայացուցիչ Սեդա Սաֆարյանի կողմից ներկայացված վերաքննիչ բողոքները։  Դատախազությունը և տուժող կողմը բողոքարկել են  մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20-ի՝ քրեական գործի վարույթը կասեցնելու և Սահմանադրական դատարան դիմելու որոշումը։

Երևանի ընդհանուր իրավասության դատարանի դատավոր Դավիթ Գրիգորյանը մայիսի 18-ին որոշել էր ՀՀ երկրորդ նախագահ Ռ. Քոչարյանին ազատել կալանքից՝ ԼՂՀ ներկայիս  և նախկին նախագահներ Բակո Սահակյանի և Արկադի Ղուկասյանի անձնական երաշխավորությամբ:
Մայիսի 20-ին նույն դատավորը որոշել էր կասեցնել Ռոբերտ Քոչարյանի և մյուսների գործի վարույթն ու այն ուղարկել Սահմանադրական դատարան` պարզելու առաջադրված մեղադրանքների համապատասխանությունը Սահմանադրության պահանջներին:

Ռոբերտ Քոչարյանին մեղադրանք է առաջադրվել այն բանի համար, որ նա 1998թ․ ապրիլի 9-ից մինչև 2008 թվականի ապրիլի 9-ը զբաղեցնելով ՀՀ Նախագահի պաշտոնը, ՀՀ Սահմանադրության ուժով հանդիսանալով պետության գլուխը և կրելով ՀՀ Սահմանադրությանը հետևելու, օրենսդիր, գործադիր և դատական իշխանությունների բնականոն գործունեությունն ապահովելու պարտականություններ, ինչպես նաև օժտված լինելով մշտապես կազմակերպչական-տնօրինչական և վարչատնտեսական, գործառույթներ իականացնող պաշտոնատար անձի լիազորություններով, այլ անձանց հետ հանցակցությամբ, տապալել է ՀՀ սահմանադրական կարգը, ինչպես նաև իր պաշտոնեական դիրքն օգտագործելով «Թի Էս Էս Սի Արմենիա» ՍՊ ընկերության միակ մասնակից և տնօրեն Սիլվա Համբարձումյանի օգտին գործողություններ կատարելուն նպաստելու, այն է՝ այդ ընկերությանը տրամադրված ընդերքն օգտակար հանածոների շահագործման նպատակով ուսումնասիրության հատուկ լիցենզիաներով ընկերության 100 տոկոս բաժնեմասը ՀՀ-ում ոչ ռեզիդենտ ընկերությանը վաճառելու գործարքին չխոչընդոտելու համար, 2008 թվականի փետրվարին և մայիսին Սամվել Մայրապետյանի օժանդակությամբ նրանից ստացել է առանձնապես խոշոր չափերով՝ 927․000․000 ՀՀ դրամին համարժեք 3․000․000 ԱՄՆ դոլար կաշառք։