Ձեր վստահելի աղբյուրը

«Պարոն Քոչարյանի խափանման միջոցի հարցի քննարկում առհասարակ տեղի չի ունեցել։ Դատախազությունը ներկայացրել է իր դիրքորոշումը,  դատարանը զրկել է մեղադրյալին իր ազատության վերաբերյալ հարցի քննարկմանը մասնակցություն ունենալուց»,- լրագրողների հետ հանդիպմանն ասաց ՀՀ երկրորդ նախագահ Ռոբերտ Քոչարյանի պաշտպաններից Հովհաննես Խուդոյանը։

Փաստաբանի գնահատմամբ, դատարանն այդ քայլով կոպտագույն  կերպով խախտել է թե մեղադրյալի  կոնվենցիոն իրավունքները, թե, ընդհանրապես, քրեական դատավարությունում մրցակցության սկզբունքը։

«Նաև գործընկերներից եմ հետաքրքրվել՝ հայկական քրեական դատավարության պատմության մեջ  նման բան հիշո՞ւմ են, թե ոչ։ Նման դեպք որևէ մեկը չկարողացավ մտաբերել։ Սա ծայրահեղ խայտառակ քայլ էր, որը դեռ իր լուրջ հետևանքներն ունենալու է մեր դատական համակարգի համար»,- ասաց Հ. Խուդոյանը։

Հիշեցնենք, որ նախօրեին դատական նիստի ժամանակ  Վերաքննիչ քրեական դատարանի դատավոր Արմեն Դանիելյանն անսպասելի հայտարարել է, որ ավարտվում է բողոքների դատական ստուգումն ու  դատարանը հեռանում է խորհրդակցական սենյակ՝ դատական ակտեր կայացնելու, մինչդեռ Ռ. Քոչարյանի պաշտպանները հանդես չեն եկել ելույթով մեղադրող և տուժող կողմերի բողոքների վերաբերյալ։ Դատախազությունը և տուժող կողմը բողոքարկել են  մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20-ի՝ քրեական գործի վարույթը կասեցնելու և Սահմանադրական դատարան դիմելու որոշումը։

Ռ. Քոչարյանի պաշտպաններից Ռուբեն Սահակյանը նշեց, որ առաջին ատյանի դատարանի դատավոր Դավիթ Գրիգորյանի իրավունք էր դիմել ՍԴ, ո՞վ իրավունք ունի բռնանալ իր վրա։

«Ո՞վ իրավունք տվեց բողոքարկել այդ որոշումը, ո՞վ իրավունք տվեց դատավոր Դանիելյանին այդ բողոքն ընդունել վարույթ։ Միայն նրա անձը, որի մասին մեր կարծիքը հայտնեցինք, որը ոչ միայն Ռոբերտ Քոչարյանի պաշտպանների կարծիքն է  նրա մասին, այլ Հայաստանի փաստաբանների 90  տոկոսի կարծիքը։ Մեզ միացավ նաև տուժողների իրավահաջորդների ներկայացուցիչ Սեդա Սաֆարյանը, իր մեկնաբանությունը  դատավոր Դանիելյանի անձի վերաբերյալ, որպես մասնագետի, հայտնեց։  Ընդ որում, ես այն կարծիքին եմ, որ դատավոր Դանիելյանը բավականին բարձր պրոֆեսիոնալ է իր մասնագիության մեջ, այլ հարց է մարդկային հատկանիշները, կարողանո՞ւմ է ճիշտը օրենքի տառին համապատասխան կիրառել, թե անընդհատ քիթը պահում է այն ուղղությամբ,  թե ինչպես է մտածում իշխանությունը՝ ժամանակին Ռոբերտ Քոչարյանի, հետո Սերժ Սարգսյանի, այսօր է՝ այսօրվա իշխանության։

Այս մարդը կատարում է  հիմնականում պատվեր, կարող է պատվերն իրեն իջեցված չլինի, հիմնականում այդպես է, բայց բավական է զգա, թե ինչպես է մտածում դատախազությունն այդ մասին, անմիջապես արձագանքում է»,-ասաց Ռ. Սահակյանը։

Նա նշեց, որ իր տպավորությամբ երեկվա տեղի ունեցածը նախապես պլանավորված, որոշված գործողություն էր. «Չէի պատկերացնում, որ այս աստիճանի լկտիություն կլինի Վերաքննիչ դատարանի անդամի կողմից։ Բայց այդ լկտիությունը տեղի ունեցավ։ Համոզված եմ, որ նա նախապես էր պատրաստել այս գործընթացը։ Նա բոլորին լսելուց հետո ասաց՝ «...հիմա դատարանը տեղում խորհրդակցելով իր դիտարկումը ստեղծված իրավիճակի վերաբերյալ կանի 1-2 րոպեից»։  Ընդամենը  5 վայրկյան անց նա գլուխը կախեց ներքև և կարդաց՝ «...հարկ եմ համարում արձանագրել, ...»։ Այսինքն ուներ պատրաստի հինգ տող։ Ե՞րբ էր գրել դրանք։ Իհարկե, վաղօրոք։ Ո՞ւմ հետ էր համագործակցել։ Չեմ կարող բարձրաձայնել, որովհետև չեմ կարող ապացուցել, բայց կարծիքն ունեմ»։

Խոսելով Սահմանադրության մեջ ներառված նորմի մասին, որ հանրապետության նախագահն իր կարգավիճակից բխող գործողությունների համար անձեռնմխելի է, Ռ. Սահակյանն ասաց. «Օրենսդիրը մտցրել է նման դրույթ, ուրեմն սա առանձնացել է։ Կոպիտ թող չհնչի, բայց  ասում է՝ ինչ որ կանես, որոնք բխում են քո կարգավիճակից, առանց վախենալու արա. իրավունք ունես արտակարգ դրություն մտցնել, մտցրու, պատերազմ հայատարարել, հայտարարի, իրավունք ունես զանազան գործողություններ կատարել, որոնք կարող են ինչ-որ բացասական երևույթներ առաջացնել հետագայում, հետո քեզ կմեղադրեն, թե ինչու դու քո այս կարգավիճակից բխող գործողությունները կատարեցիր։ Սա արվել է, որպեսզի նախագահն անկաշկանդ գործի։ Սա միայն մեզ մոտ չէ, Ֆրանսիայում էլ է այսպես։ Պրիմիտիվ բան է, ինչն իր որոշման մեջ կայացրել էր դատավոր Ազարյանը»։

Նրա խոսքով, այս իշխանությունները հենց նեղն են ընկնում, քայլեր են մտածում։

«Չեմ բացառում, որ վաղը Սահմանադրական դատարանի դռները կփակվեն այնպես, որ պարոն Հրայր Թովմասյանը և մյուսները չկարողանան մտնել ՍԴ շենք։ Ո՞ր դեպքերում են  կատարվում այդ քայլերը, երբ որ վտանգ են տեսնում Ռոբերտ Քոչարյանի գործով, վտանգ են տեսնում այն իմաստով, թե՝ ոնց կարող է Քոչարյանը գտնվել ազատության մեջ»,- ասաց Ռ. Սահակյանը։