Ձեր վստահելի աղբյուրը

Այսօր մեկնարկում է Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանը, որը կանցկացվի մինչև հունիսի 28-ը։ Նստաշրջանի կարևորագույն քննարկումներից է լինելու որոշումների կայացման գործընթացը՝ կապված հավատարմագրերի ու քվեարկության հետ։ Այս մասին տեղեկանում ենք ԵԽԽՎ կայքից։

Բելգիացի պատգամավոր Պետրա Դե Սուտերի պատրաստած այս բանաձևի ընդունումը կարևոր է, որը կարող է հնարավորություն տալ Ռուսաստանի Դաշնության պատգամավորներին՝ մասնակցել ԵԽԽՎ նիստերին։

Նշենք, որ Ռուսաստանը պատվիրակություն է կազմել ու ուղարկել Ստրասբուրգ, քանի որ պատգամավորների մեծամասնությունը կողմ են այս բանաձևի ընդունմանը։

ԵԽԽՎ այս նստաշրջանում պատգամավորները կընտրեն նաև 70-ամյա կազմակերպության նոր գլխավոր քարտուղար, որը կփոխարինի Թորբյորն Յագլանդին։

Հունիսի 24-ին ԵԽԽՎ-ում Նախարարների կոմիտեի գործունեությունը կներկայացնի Ֆրանսիայի եվրոպական հարցերով պետական նախարար Ամելի Դե Մոնչալինը։ Հունիսի 26-ին ԵԽԽՎ-ում ելույթ կունենա Պորտուգալիայի նախագահ Մարսելո Ռեբելո դե Սուսան:

Օրակարգային հարցերից են լրագրող Դաֆնի Կարուանա Գալիզիայի սպանությունն ու օրենքի գերակայությունը Մալթայում, կանանց նկատմամբ բռնության և գենդերային հավասարության դեմ պայքարի համատեղ քննարկումը երեխաների նկատմամբ դաժան վերաբերմունքի դադարեցումը, ՄԱԿ-ի հատուկ զեկուցողը հանդես կգա երեխաների վաճառքի ու սեռական շահագործման մասին հայտարարությամբ:

Վեհաժողովը կքննարկի նաև Սիրիայում տիրող իրավիճակը, Բուլղարիայի հետ հետմոնիտորինգային երկխոսությունը, Բորիս Նեմցովի սպանությունը, ինչպես նաև Եվրոպայի խորհրդի և ԵԽԽՎ բյուջեն: