Մարուքյանի «սիրուն աղջիկն» ու ԱԺ-ն
«Լուսավոր Հայաստան» խմբակցության ղեկավար Էդմոն Մարուքյանը կոչ էր արել «Քաղաքացիական ավիացիայի պետ, շատ գեղեցիկ աղջկան և մեր փայլուն աշխատող կառավարությանը» շատ արագ միջոցներ ձեռնարկել Գյումրիի օդակայանն ակտիվացնելու համար։
Ազգային Ժողովում այսօր պատգամավորները կենտրոնացան ոչ թե բուն առաջարկի, այլ «սիրուն աղջիկ» արտահայտության վրա։
«Ազգային ժողովի պատգամավորները պետք է պատգամավորին հարիր վարքագիծ դրսևորեն՝ հատկապես իրենց հանրային ելույթներում և հանրային վայրերում։ Ոչ քաղաքական, անհիմն և, ինչու ոչ, այդպիսի գռեհիկ ձևակերպումները հենց Ազգային ժողովում կստանան արժանի պատասխան։ Ես հուսով եմ, որ այդպիսի վարքագծից մեր գործընկերները այսուհետ կհրաժարվեն»,-ասաց «Իմ քայլը» խմբակցության անդամ Գևորգ Պապոյանը։
«Ինձ մոտ տպավորություն է, որ պարոն Մարուքյանը իրենց բակի բեսետկայում պպզած ռեպլիկ էր թողնում բակով անցնող գեղեցկադեմ աղջկա հետևից։ Ես ուզում եմ հիշեցնել, որ պարոն Մարուքյանը պատգամավոր է, և որ խոսում է Քաղավիացիայի պետի մասին։ Կոչ եմ անում հարգել պատգամավորի մանդատը և իրեն դրսևորել կլասիկ և ոչ ռաբիզ պատգամավորի պես»,- ասաց նույն խմբակցությունից Արեն Մկրտչյանը։
«Իմ քայլը» խմբակցության պատգամավոր Սուրեն Գրիգորյանի համար էլ անհասկանալի է, թե ինչու իրենց քննադատելիս ընդդիմությունը կոռեկտ չէ։
«Պարտադի՞ր էր այդ քննադատության համար ասել «փայլուն կառավարություն» և «սիրուն աղջիկ»: Եթե նեղվելու չի, սրանից հետո մենք էլ կասենք՝ «փայլուն ընդդիմություն» և «սիրուն աղջիկ»։ Եվ խնդրում եմ, տիկին Սամսոնյան, դրանից չնեղվեք»,-ասաց Գրիգորյանը։
Իշխանական պատգամավորներին արձագանքեց «Լուսավոր Հայաստան» խմբակցությունից Անի Սամսոնյանը։ Հիշեցնենք, որ Էդմոն Մարուքյանն այսօր նիստին չէր մասնակցում։
«Հիմա գոնե դուք կենտրոնանաք բուն առաջարկի վրա, կենտրոնացել եք ոճաբանության վրա։ Նախ առաջինը չեմ հասկանում, թե ինչու եք մտոհոգվել «փայլուն կառավարություն» արտահայտությունից, դա ձեր արտահայտությունն է։ Եվ ես չեմ հասկանում, թե ինչու եք ոգևորվել «սիրուն աղջիկ» արտահայտությունից, որն ընդամենը կոմպլիմենտ է։ Եկեք օբյեկտիվ լինենք, և հասկանանք, որ մինչև հիմա այդ սիրուն աղջիկը գործ չի արել ու որևէ արդյունք չի տվել»,-ասաց Սամսոնյանը։
Նա նաև ասաց, նման ելույթներով իշխանության ներկայացուցիչները փորձում են թաքցնել իրենց անգործությունը, ինչի հետևանքով տրանզիտ չվերթներ իրականացնող կդառնա ոչ թե Գյումրու, այլ օրինակ Բաքվի կամ Անկարայի օդանավակայանը։
Նիստը վարող Ալեն Սիմոնյանը կոչ արեց չիջնել մյուսների մակարդակի, ասաց՝ Սամսոնյանին ամբիոնի մոտ հրավիրելիս իրեն իրավունք չի վերապահի ասել՝ սիրուն աղջիկ, քանի որ դա նրա միակ արժանիքը չէ։
ԲՀԿ-ական Գևորգ Պետրոսյանն էլ կարծիք հայտնեց, տղամարդու կողմից սիրուն աղջկա գովեստն այնքան վտանգավոր չէ, ինչքան տղամարդու կողմից սիրուն տղամարդու գովեստը։
«Եկեք, հարգենք մեր ժողովրդին։ Ինչ է նշանակում սեփական դարդն ու ցավը գալ ու այստեղից հնչեցնել, սեփական սխալները այստեղ խմբագրել։ Մենք հիմնական օրենսդիր աշխատանքը թողել ենք, եկել ընկել ենք ՍԴ անդամ և դատավոր եզրույթներով։ Պարոն Բաղդասարյան, եթե այդ հարցը Ձեզ շատ է հետաքրքրում, երեկոները հրավիրեք մարդկանց ու քննարկումներ անցկացրեք»,-ասաց Պետրոսյանը՝ դիմելով «Իմ քայլ»-ից Նիկոլայ Բաղդասարյանին։
«Լուսավոր Հայաստան» խմբակցության պատգամավոր Կարեն Սիմոնյանն էլ նկատեց, ՔԱԳՎ պետը Հայաստանում ամենաշատ գործուղման մեկնած պաշտոնյաներից մեկն է։
«Բայց արդյունք մենք դեռևս չենք տեսել։ Քանի՞ նոր չվերթ է բացվել, քանի՞ նոր ավիաընկերություն է մուտք գործել Հայաստան, ազգային փոխադրող ստեղծվե՞լ է, թե՞ չի ստեղծվել, ի՞նչ հնարավորություններ են ստեղծվել փոքր օդանավակայանների՝ Գյումրիի, Կապանի համար, կա՞ն ծրագրեր, թե քննարկումներից այն կողմ չեն անցել»,-ասաց Սիմոնյանը։
Ինչ վերաբերում է Արեն Մկրտչյանի հայտարարությանը, թե Մարուքյանը պետք է հիշի, որ պատգամավոր է, Սիմոնյանը պատասխանեց. «Պարոն Մարուքյանը հիշում է, որ ինքը պատգամավոր է, դուք հիշեք։ Եվ կարևորը, եթե սիրում եք կոչերով դիմել, դիմեք ձեր կառավարությանը, որպեսզի աշխատեն ու արդյունք ցույց տան։ Ու թողեք այդ ամբարտավան տոնը։ Շնորհակալություն»։
Հարակից հրապարակումներ`
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
