Դավիթ Պետրոսյան. Առողջապահության նախարարը մեր մի քիչ շատ երիտասարդ է, որ իր հորդորով գրեմ
Երևանի Պետական Բժշկական համալսարանի աշխատակազմի ղեկավար Շուշան Դանիելյանը ֆեյսբուքյան իր էջում անդրադարձել է ԵՊԲՀ հոգաբարձուների խորհրդի անդամ Դավիթ Պետրոսյանի հարցմանը, դրանց մի մասին պատասխանել է հրապարակային։ Խոստացել է՝ հարցերին կպատասխանեն նաև գրավոր սահմանված ժամկետում։
Պետրոսյանի հարցերը վերաբերում են «Զինվորի տուն» ՀԿ-ին՝ մասնավորապես Ի՞նչ միջոցներով է վերանորոգվել կազմակերպությանը հատկացված տարածքը, ո՞վ է կայացրել այդ որոշումը՝ վերանորոգել տարածքը և տալ ՀԿ-ին անհատույց օգտագործման, համալսարանի ո՞ր կանոնադրական խնդիրների համար է այդ վերանորոգումը իրականացվել և այնուհետև տարածքը հանձնվել է ՀԿ-ին, ինչու՞ նույն ծառայությունը չի մատուցվում հենց համալսարանի կողմից:
Շուշան Դանիելյանն արձագանքել է՝ ԵՊԲՀ-ն իր բյուջեից, որևէ լումա չի տրամադրել Զինվորների տան վերանորոգմանը:Զինվորների տան տարածքը գտնվում է ԵՊԲՀ-ի հաշվեկշռում՝ տեղեկությունը կարելի է ճշտել Պետական գույքի կառավարման վարչությունից, տարածքը հանձնված չէ ՀԿ-ին:
Դավիթ Պետրոսյանից Panorama.am-ը հետաքրքրվեց, ի՞նչ մտահոգություններ են թաքնված գրության հետևում, արդյո՞ք նա դեմ է, որ համալսարանն օգնում է վիրավոր զինծառայողներին։
«Ոչ մի դեպքում դեմ չեմ, որ Երևանի պետական բժշական համալսարանն օգնում է բուժում ստանալ վիրավոր զինվորներին։ Հակառակը կողմ եմ, որ համալսարանում ստեղծված է որոշ չափով յուրահատուկ կենտրոն, որովհետև այնտեղ կան նաև այնպիսի սարքեր, որոնք ուղղված են լուրջ հաշմանդամություն ունեցող զինվորների վերականգնմանը։ Ամեն ինչ պետք է անել, որ այդ կենտրոնը լինի, որ շատանան նման կենտրոնները։ Նման տեսակի բուժօգնություն պետք է լինի բոլոր բուժկենտրոններում՝ հասանելի բոլոր ազատամարտիկներին»,-ասաց նա։
Պետրոսյանը հավատացնում է՝ ոչ մի մտահոգություն չունի, որպես խորհրդի անդամ կարող է հարցեր տալ, կանոնադրությունն էլ սահմանում է՝ խորհրդի անդամները կարող են ամեն ինչ անել աշխատանքը լավացնելու համար. «Ոչ մի մտահոգություն չկա, ուղղակի մտածեցի մի հատ նամակ գրեմ էլի»։
ԵՊԲՀ հոգաբարձուների խորհուրդը երկու օրից նիստ է գումարելու։
«Նիստի ժամանակ մենք կնստենք դեմ դիմաց, հարցերը կտանք։ Արմեն Մուրադյանն էլ է լինելու, փոխնախարարներ, կառավարության անդամներ, ուսանողներ, դասախոսներ։ Մենք կնստենք, կխոսենք իրար հետ և միգուցե գանք այն եզրակացության, որ ամեն ինչ շատ լավ է»,-ասաց նա։
Կասկած կա, որ Պետրոսյանին նման հարցեր ԵՊԲՀ-ին ուղղել հորդորել է առողջապահության նախարարը։ Վերջինի ու համալսարանի ռեկտոր, «Զինվորի տան» ստեղծման ակունքում կանգնած Արմեն Մուրադյանի հարաբերությունները, մեղմ ասած, այնքան էլ լավ չեն։
«Ես հերքում եմ նման լուրերը, նման բան չկա։ Իմ տարիքը գիտե՞ք՝ ինչքանն է, ես մի քիչ մեծ եմ էլի, նախարարը մեր մի քիչ շատ երիտասարդ է, շատ արժանի անձնավորություն է, բայց իմ համար ոչ այդքան ճիշտ կլիներ, որ ես նախարարի հորդորով գրեի, ինքս իմ կարծիքն ունեմ, երկար ժամանակ աշխատել եմ համալսարանում, չորս ռեկտորի հետ եմ աշխատել, այնպես որ ինձ պետք չի ինչ-որ բան անել»,-ասաց Պետրոսյանը։
Զինվորների տան վերաբերյալ հարցերը ուղարկվել է Կենտրոնի տնօրեն Հայկուհի Մինասյանին ևս։ Panorama.am-ի հետ զրույցում Մինասյանն անհասկանալի որակեց հարցադրումը։
«Նման հարցադրում անելուց առաջ մարդը պետք է ծանոթ լինի զինհաշմանդամության խնդիրներին, ոնց որ մարդուն գրություն ուղարկեն՝ ինչո՞ւ է ստեղծվել հեծանիվը, ինչի՞ են մարդիկ հաց ուտում կամ լվացվում։ Հարցերն այդ աստիճանի անտրամաբանական են»,-ասաց Մինասյանն ու հիշեցրեց, որ կենտրոն՝ որպես օրինակելի տեղ գալիս են ոչ միայն հայաստանցի, այլև ռազմական ու բժշկական ոլորտի արտասահմանցի պաշտոնյաները։
Նա հիշեցրեց, որ առաջին գումարը հավաքվել է 2017-ի ապրիլի 7-ին նախորդած կոչի արդյունքում, երբ Արմեն Մուրադյանը հորդորել էր գնել հաշմանդամություն ունեցող զինվորների ձեռքով պատրաստած բացիկները։ Դրան հետևել են բազմաթիվ մարդկանց նվիրավտվությունները, ինչի արդյունքում կարողացել են նաև շենքը վերանորոգել։
«Շենքը գտնվում է ԵՊԲՀ-ի բալանսում, չի պատկանում ՀԿ-ին։ Դավիթ Պետրոսյանը երևի սխալ տեղում է փորձում ինչ-որ բաներ գտնել, այս անգամ շատ սխալ հասցեով է դիմել, զինվորների թեման չի կարելի շահարկել սեփական ցանկությունների կատարման համար»,-ասաց Մինասյանը։
Ըստ մեր տեղեկությունների, Դավիթ Պետրոսյանի այս հարցադրումը վրդովեցրել է կենտրոնում վերականգնողական բուժում անցնող շատ զինվորների ու նրանց ծնողներին, որոնք պատրաստվում են իրենց վրդովմունքը բարձրաձայնել։
Լրահոս
Տեսանյութեր
ԱԺ նիստը մեկնարկեց մեկ րոպե լռությամբ՝ ի հիշատակ պատգամավոր Մհեր Սահակյանի
