ՀՀ ԱԳ նախարար․ Հնարավոր չէ մեկ ձեռքով բանակցել, մյուսով՝ կրակել
«Վաշինգտոնում Մամեդյարովի հետ քննարկել ենք հարցերի բավականին լայն շրջանակ, որոնք կառուցվում են այն ամբողջ երկխոսության վրա, որ տեղի է ունեցել մինչև վաշինգտոնյան հանդիպումը»,- այսօր ԱԳՆ-ում Մալթայի ԱԳ նախարարի հետ մամուլի ասուլիսի ժամանակ ասաց ՀՀ արտաքին գործերի նախարար Զոհրաբ Մնացականյանը՝ պատասխանելով Ադրբեջանի ԱԳ նախարար Մամեդյարովի հարցազրույցին, որում նա ասել էր, որ կողմերին փաստաթղթեր են ներկայացվել։
Մնացականյանը կարևորեց, որ վաշինգտոնյան հանդիպումը տեղի էր ունենում պայմաններում, երբ առկա էր լարվածության աճ, որը չէր կարող իր ազդեցությունը չունենար, և բավականին տեղ է հատկացվել քննարկումներում այդ իրողությանը։
«Մենք քննարկեցինք այն բոլոր անհրաժեշտ քայլերը, որպեսզի մենք լարվածությունը նվազեցնենք, խուսափենք լրացուցիչ զարգացումներից, որոնք էլ ավելի կսրեն իրավիճակը։ Մեզ անհրաժեշտ է վերադառնալ իրավիճակի, որը մինչև լարումն էր, դա շատ մեծ նշանակություն ունի։ Մենք ունենք մի քանի նախաձեռնություններ, որոնք առաջ են բերվել համանախագահների կողմից։ Կարծում եմ, կկարողանանք հասնել իրավիճակի, որ մինչև հաջորդ հանդիպումը կարողանանք գրանցել, որ կարողանում ենք պահպանել միջավայր, որը նպաստում է խաղաղ գործընթացին»,-ասաց Զոհրաբ Մնացականյանը։
Նախարարը շեշտեց, որ խաղաղությանը նպաստող միջավայրը Հայաստանի համար չափազանց կարևոր, գերակա խնդիր է, որը պարունակում է 2 բաղադրիչ՝ մարդկային շփումներին, հռետորաբանության նվազզեցմանը ու այն միջավայրին, որտեղ ատելության մթնոլորտը զարգացում չի ստանում։ Մյուս բաղադրիչն էլ այն է, որ պետք է աշխատել էսկալացիայի ռիսկերի նվազեցման ուղղությամբ։
«Ունեինք իրավիճակ, որը պահպանվում էր Դուշանբեի պայմանավորվածությունների հիման վրա, և սա մնում է գերակա խնդիր մեզ համար։ Դուշանբեն պետք է դառնա նաև Դուշանբե պլյուս, որովհետև իրադրությունը և լարվածությունն ի ցույց բերեց, որ մենք կարող ենք ամբողջովին սխալ ուղղությամբ գնալ։ Այդ առումով, երբ ունենք զոհեր և ունենք զինադադարի խախտումներ, բնականաբար, ընդգծվում է կարևորությունն այնպիսի գործառույթների, ինչպիսին է զինադադարի խախտման հետաքննության մեխանիզմը և մոնիտորինգի կարողությունների ուժեղացումը։ Սանկտ Պետերբուրգն ու Վիեննան եղել են սրանց մասին», - ասաց Զոհրաբ Մնացականյանը՝ ընդգծելով, որ չեն հավատում, որ կարելի է արդյունավետ առաջընթաց խաղաղ գործընթացում, երբ տեղում իրավիճակը լարվում է։
«Մենք չենք հավատում, որ հնարավոր է մեկ ձեռքով բանակցել, մյուսով՝ կրակել։ Այդ մոտեցումն ապագա չի ունենա։ Բազմիցս ասել ենք ու կրկնեմ, որ բանակցություններում սպասռնալիքի լեզուն չի աշխատելու»,-ասաց ՀՀ ԱԳ նախարարը։
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
