Ձեր վստահելի աղբյուրը

Արդարադատության նախարարությունն արձագանքել է իր կողմից  www.e-draft.am հարթակում հանրային քննարկման  ներկայացրած մի շարք օրենքներում՝ այդ թվում նաև ԶԼՄ մասին օրենքում, փոփոխություններ և լրացումներ կատարելու մասին նախագծի շուրջ հնչած մտահոգություններին։

Նախարարությունից նշում են, որ նախագծի նպատակը Իրավաբանական անձանց պետական ռեգիստրի տվյալների բազան լրագրողների համար ԱՆՎՃԱՐ դարձնելն է:

«Հնարավոր թյուրըմբռնումներից խուսափելու նպատակով պարզաբանեմ, որ e-draft.am-ը ստեղծվել է պետական մարմինների մշակած նախագծերը ՀԱՆՐԱՅԻՆ քննարկման ներկայացնելու համար, որը ենթադրում է, որ սպասում ենք մեր գործընկեր քաղհասարակության, ոլորտում գործունեություն ծավալող կազմակերպությունների՝ Նախագիծն ավելի լավը դարձնելուն միտված առաջարկներին:

Բացի այդ, այն առաջիկայում առանձին ուղարկվելու է ԶԼՄ-ների ղեկավարներին, ՀԿ-ներին, ինչպես նաև նախատեսում ենք շահագրգիռ կողմերի հետ հանրային քննարկման ձևաչափով հանդիպում կազմակերպել: Ոչ ոք այս հարցում Չի շտապում, ոչ ոք ցանկություն Չունի գործող իրավակարգավորումները վատթարացնող նորմեր առաջարկել:

Միակ նպատակը ԶԼՄ գործընկերների կողմից երկար ժամանակ բարձրաձայնվող խնդրին լուծում տալն է՝ նորից եմ կրկնում՝ Իրավաբանական անձանց պետական ռեգիստրի տվյալների բազան լրագրողների համար ԱՆՎՃԱՐ դարձնելն է: Սիրով կսպասենք Ձեր առաջարկներին»,-գրել է ԱՆ մամուլի խոսնակ Լուսինե Մարտիրոսյանը։