Ձեր վստահելի աղբյուրը

1988 թվականի երկրաշարժից տուժած 5396 ընտանիք բնակարանային խնդիրները պետք է լուծվեին 2008-2020 թվականներին։ 2008-2017 թվականներին 4839 շահառուի բնակարանային խնդիրը լուծվել է, ծախսվել է 65 միլիարդ դրամ։ 2018 թվականին բյուջեից հատկացվել է 460 միլիոն դրամ, բնակարանով ապահովվել է 44 ընտանիք։ Այս տարի բյուջեից 560 միլիոն դրամ է  նախատեսված Շիրակի, Լոռու, Արագածոտնի  մարզերի գյուղերի 60 ընտանիքի համար։ Տվյալները լրագրողների հետ հանդիպմանը ներկայացրեց ՀՀ Քաղաքաշինության կոմիտեի նախագահ Վահագն Վերմիշյանը։

Նրա խոսքով, վարչապետի հանձնարարականով 2020 թվականին մնացած 457 ընտանիքի բնակարանով ապահովելու համար հատկացվելու է 3 միլիարդ դրամ ու այս հարցը մեկընդմիշտ լուծվելու է։

Ինչ վերաբերում է տնակներում բնակվողներին՝ նա նշեց, որ մոտ 13 կատեգորիայի են բաժանում  տնակներում բնակվողներին, օրինակ՝ գյուղում ունեն սեփականություն, բայց եկել են Գյումրիում կամ Վանաձորում բնակվում են տնակներում։  Քաղաքաշինության կոմիտեն հունիսի 28-ի դրությամբ,  Շիրակի, Լոռու, Արագածոտնի մարզերից հավաքագրել է 7219 ընտանիքի (մոտ 25 հազար անձի) ոչ հիմնական շինությունների վերաբերյալ տեղեկատվության. Շիրակում՝ 3530, Լոռում՝ 3531, Արագածատոնի՝ 158։

Հարցի լուծումը Վ. Վերմիշյանը տեսնում է սոցիալական բնակարաններ կառուցելով։

«Շատ զարգացած երկրներում կա այդ կատեգորիան։ Տարբեր երկրներում տարբեր տոկոսներ են կազմում։ Նորվեգիան բավականին լուրջ զարգացած երկիր է սոցիալական առումով, բնակչության մոտ 20 տոկոսը բնակվում է  սոցիալական բնակարաններում․ դա մինիմալ սանիտարահիգիենիկ պայմանները ապահովող բնակարան է, որևէ ճոխություն չկա, բայց միևնույն ժամանակ ունի ամեն ինչ՝ սանհանգույց, լոգարան։ Պետությունը կառուցում է ու տալիս է մինիմալ վարձով։ Միևնույն ժամանակ այդտեղ բնակվողներն իրավունք չունեն որևէ նորարարություն անել տանը, փոխել պատերի գույնը։ Առաջարկում են կառավարությանը, որ այս ծրագիրն ընդունի, կառավարությունը որոշում կկայացնի, միգուցե այլ ճանապարհ ընտրվի։ Այս ամենն արվում է, որպեսզի բնակիչները չդառնան անօթևան»,- ասաց Վ. Վերմիշյանը։

Նա նշեց, որ սոցիալական բնակարանաշինությունը 20 տոկով ավելի էժան է, քան այն բնակարանները, որ  ավանդաբար պատկերացնում են, միաժամանակ դրանք բավականին արժանապատիվ, արժանի շինություններ են։

Հարցին, թե ինչի՞ հիման վրա եք ասում, որ շինարարական բում է սպասվում առաջիկայում, նա նշեց, որ բավականին լուրջ անալիզ է արված, բավականին մեծ ներուժ կա, որն այս ընթացքում  ինչ-ինչ պատճառներով չի օգտագործվել։

Քաղաքաշինության կոմիտեի նախագահը նաև նշեց, որ երրորդ կատեգորիայի վթարային բավականին մեծ քանակի շինություններ կան. «Մենք պարտավոր ենք որպես 3 միլիոն ազգաբնակչություն ունեցող երկիր, ամեն տարի որոշակի քանակի քառակուսի մետր կառուցենք, որպեսզի թարմացվի մեր բնակարանային ֆոնդը»։

Նրա խոսքով, մինչև հիմա վերջնականապես հստակ չի եղել բազմաբնակարան շենքերի հետ կապված քաղաքականությունը, այս ոլորտը տրվել է համայնքին, իրենք էլ ամեն մեկը համապատասխան իրենց դաստիարակության, գիտելիքների մակարդակի, այդ հարցը լուծել են։

Վ. Վերմիշյանն ասաց, որ բոլոր բնակավայրերը պետք է ունենան ավագանու կողմից հաստատված կառուցապատման, հողօգտագործման կանոնակարգեր։

Քաղաքաշինության կոմիտեի նախագահը նաև տեղեկացրեց, որ նամակներ են ուղարկել աշխարհի բոլոր ուղղություններով հայկական  գիտական ներուժը Հայաստանում օգտագործելու համար, բավականին մեծ արձագանք են ստացել։

Նա նշեց, որ հանդիպում են ունեցել Հարվարդի համալսարանից մի խումբ հայ մասնագետների, ճարտարապետների հետ, որոնք պատրաստ են ոչ միայն գալ, մասնակցել այստեղի գործընթացներին, այլև Հարվարդի բազայի հիման վրա տարեկան 5 հայ ուսանողի համար հնարավորություն ստեղծել՝ մասնակցելու վերապատրաստման:

«Դա մեզ համար շատ մեծ օգնություն է, կունենանք միջազգային մակարդակի մասնագետներ»,- նշեց նա։