Ձեր վստահելի աղբյուրը

Միայն Գյումրիում 1988 թվականի աղետալի երկրաշարժի հետևանքով 1500  ընտանիք դեռ անօթևան է. 1100 ընտանիք մնացել է անօթևանների ցուցակում՝ 2008 թվականի նոյեմբերի 1-ին հաշվառված, ևս  400-500 երկրաշարժի հետևանքով անօթևան ընտանիքներ չեն հասցրել հաշվառվել։ Panorama.am-ի հետ զրույցում ասաց «Շիրակ կենտրոն» ՀԿ նախագահ Վահան Թումասյանը։

Նա նշեց, որ պետությունը պետք է անդրադառնա բոլոր խնդիրներին, եթե ուզում է Գյումրին տնակներից մաքրի։ Թումասյանը տեղեկացրեց, որ Շիրակի մարզի գյուղական համայնքներում ևս 200-300 ընտանիք անօթևան է։

Նա ընդգծեց, որ լուրջ ծրագիր է պետք, չի կարող 3 միլիարդ դրամով 30 տարում չլուծված խնդիրը լուծվի։

Վ. Թումասյանն ասաց, որ Հ Քաղաքաշինության կոմիտեի նախագահ Վահագն Վերմիշյանի երեկ արած հայտարարությունն իր բացասական հետևանքները կարող է ունենալ. «Հովանավորները, որոնք պատրաստվում էին  ներդրումներ անել անօթևան ընտանիքների բնակարաններով ապահովման համար,  հարցնում են՝ ի՞նչ ենք անելու հիմա, որոշել էինք ևս մեկ բնակարան նվիրել մյուս ամիս, անո՞ւմ եք, թե՞ պետությունն է իր վրա վերցնում։

Նաև շահառուներն են իրար խառնվել։ Երեկ ասում էին՝ մի դոմիկ ունեի մի քանի տարի առաջ, ափսոս քանդեցի, կարող է հիմա թղթերս բերեմ, որ ցույց տամ։ Ասում եմ՝ ի՞նչ եք ասում։ Ի՞նչ տուն, ի՞նչ բան, 30 տարի է չեն տվել, ինչպե՞ս կարող են մեկ ամսում տալ։ Այսինքն իրենց մոտ էլ բացասական հետևանք կարող է ունենալ, երբ պարզաբանում ենք, ասում են՝ այ նորից խաբեցին, էլ չեն ասի, որ թյուրիմացություն էր, սխալ արտահայտվելու արդյունք էր։

Մի քանի օրից «Հայաստան» հիմնադրամը  Ամերիկայում հեռուստամարաթոն ունի Գյումրիի համար, հովանավորները կասեն՝ կարդում ենք սոցիալական կայքերում,  խնդիրը լուծել եք, եկել փող եք ուզո՞ւմ Գյումրիում անօթևանների խնդիրը լուծելու համար։

PR թեմա չէ։ Եթե PR քայլ է, անհաջող էր, ավելի շատ վտանգներ պարունակող, քան օգտակար։ Հնարավոր չէ մեկ հարվածով խնդիրը լուծել»։

Նա կրկնեց, որ 3 միլիարդը որևէ կապ չունի ընդհանուր աղետի գոտու անօթևան ընտանիքների խնդիրների հետ,  կապ չունի այն հանձնաժողովի հետո, որ ստեղծվել էր Գյումրիում արտագնա նիստի ժամանակ։ Երկու օր առաջ է առաջարկությունների, ուսումնասիրությունները փաթեթը ներկայացվել կառավարություն, որը պետք է նոր քննարկվի՝  անօթևանների խնդիրները լուծելու նոր ծրագի՞ր է ընդունելու,  ո՞ր ընտանիքներն են ճանաչվելու երկրաշարժի հետևանքով անօթևան մնացած և պարտավորություն ստանձնեն այդ ընտանիքների հանդեպ։

«Միայն դրանից հետո պարզ կլինի, թե աղետի գոտում քանի անօթևան ընտանիք ունենք, որոնց հանդեպ պետությունը պարտավորություն կստանձնի»,- ասաց «Շիրակ» կենտրոնի տնօրենը։

Վ. Թումասյանի խոսքով, Վ.Վերմիշյանի ներկայացած 457 ընտանիքն ու 3 միլիարդ դրամը վերաբերում են դեռ 2012 թվականին շահառու ճանաչված հիմնականում Լոռու  մարզի գյուղական բնակավայրերում անհատական բնակարանների կառուցման ծրագրին, որոնք անօթևան են մնացել երկրաշարժի պատճառով։

Հարցին, թե այժմ Գյումրիում քանի՞ տնակ կա, նա ասաց, որ 2830  տնակ, մոտավորապես 2500 ընտանիք տնակներում է ապրում, բայց չպետք է մոռանալ, որ կան վթարային տասնյակ շենքեր, որոնք երկրաշարժից խարխլվել են, խոստացել են շենքերն ամրացնել ու վերադարձնել  հիմնական տերերին, բայց չի արվել։

Նա կրկնեց, որ միայն վերահաշվարկի միջոցով է հնարավոր պարզել, թե քանի անօթևան ընտանիք կա Գյումրիում, բայց իրենց դիտարկումներով՝ 2000 ընտանիք դեռ անօթևան է։

Նշենք, որ Լոռու մարզպետ  Տիգրան Պետրոսյանը ֆեյսբուքայն էջում գրել է. «ՀՀ քաղաքաշինության պետական կոմիտեի նախագահ Վահագն Վերմիշյան խոսքերը 2020թ.-ին 3 մլրդ. դրամով աղետի գոտու անօթևանության խնդրի մեկընդմիշտ լուծման մասին վերաբերվում է հիմնականում գյուղական համայնքներում պետության կողմից տարիներ առաջ շահառու ճանաչված խմբին միայն, մոտ 450 ընտանիք։ Վարչապետի հանձնարարությամբ ստեղծված աշխատանքային խմբի կողմից միայն Գյումրի քաղաքում այս պահի դրությամբ քարտեզագրվել է մոտ 2450 բնակեցված ժամանակավոր կացարաններ, որտեղ բնակվողների հարցի հետ պարոն Վերմիշյանի հայտարարության այդ մասն առնչություն չունի, սակայն որոշ լրատվամիջոցների կողմից թյուրիմացաբար ներկայացվում է որպես անօթևանության ամբողջական խնդրի լուծում։
Առաջ ընկնելով ասեմ, որ շուտով այդ խնդրի լուծման ժամկետները ևս պարզ կլինեն»։