Ձեր վստահելի աղբյուրը

80 տարեկանում կյանքից հեռացել է հայկական ֆուտբոլի ամենավառ ներկայացուցիչներից մեկը՝ Սարգիս Հովիվյանը։

Լեգենդար հարձակվողը ծնվել է 1938թ․-ին՝ Սուխում քաղաքում, որտեղ նաև սկսել է ֆուտբոլիստի կարիերան։ Իր առանձնահատուկ խաղը ցուցադրել է Երևանի «Սպարտակում», «Արարատում», Մոսկվայի «Սպարտակում», Քութայիսի «Լոկոմոտիվում»։ Հետագայում մարզել է «Շիրակը», «Լոռին», «Արարատը», Արտաշատի «Օլիմպիան», Հոկտեմբերյանի «Սպարտակը», Հայաստանի պատանեկան հավաքականը։ Ստացել է ԽՍՀՄ սպորտի վարպետի և ՀԽՍՀ վաստակավոր մարզչի կոչում։

ՀՖՖ կայքից տեղեկանում ենք, որ հոգեհանգիստը կայանալու է հուլիսի 9-ին՝ ժամը 18-ից 20-ը` Կոնդի Սուրբ Հովհաննես-Մկրտիչ եկեղեցում: Հուղարկավորությունը հուլիսի 10-ին տեղի է ունենալու Զեյթունի գերեզմանատանը. թափորը ժամը 13:00-ին կշարժվի Սուրբ Հովհաննես-Մկրտիչ եկեղեցուց։

ՀՖՖ նախագահ Արթուր Վանեցյանը ցավակցական ուղերձ է հղել Սարգիս Հովիվյանի մահվան կապակցությամբ, որում մասնավորապես ասված է.

«80 տարեկան հասակում կյանքից հեռացել է լեգենդար ֆուտբոլիստ, մարզիչ, ԽՍՀՄ սպորտի վարպետ, ՀԽՍՀ վաստակավոր մարզիչ Սարգիս Հովիվյանը, որի անունն անքակտելիորեն կապված է հայկական ֆուտբոլի նշանակալի էջերի հետ:

Որպես ֆուտբոլիստ, Սարգիս Հովիվյանը մեծ դերակատարություն է ունեցել 60-ական թվականների հայկական ֆուտբոլում՝ իր հրաշալի, անկրկնելի խաղով ուրախության բազմաթիվ պահեր պարգևելով աշխարհասփյուռ հայությանը:

Հայկական ֆուտբոլը մեծ կորուստ է կրել: Խորապես ցավակցում եմ Սարգիս Հովիվյանի ընտանիքին, մերձավորներին, հայկական ֆուտբոլի բոլոր երկրպագուներին»: