Ձեր վստահելի աղբյուրը

«Իմ քայլը» խմբակցությունից Արման Եղոյանն Աժ-ում առաջարկեց՝ 4-5 տարի արգելել Սևանից ձկան ու խեցգետնի որսը։

«Ի՞նչ եք կարծում, այս գաղափարի վերաբերյալ։ Իսկ սոցիալապես խոցելի խավերը, որոնք զբաղվում են այդ գործով ու այնքան էլ մեծ եկամուտ չեն ստանում, պետությունը նրանց փոխհատուցի»,-ասաց պատգամավորը։

«Բարգավաճ Հայաստան» խմբակցությունից Նաիրա Զոհրաբյանն էլ անդրադարձավ  Սևանա լճի կանաչելուն, ասաց, խնդիրը վերաբերում է  ազգային անվտանգությանը։

«Սա այլևս պետք է ազգային անվտանգության խնդիր համարել ու ոչ թե բավարարվել Սևանի կանաչելու մասին լալահառաչ գրառումներ անելով։ Սա պետք է լինի կառավարության կարևորագույն ու առաջնային խնդիրը, իսկ այս պահին, կրկնում եմ, բացի լալահառաչ այս տիպի գրառումներից՝ «Սևանը, ախ մեր Սևանը», ոչինչ չենք տեսնում»,-ասաց Զոհրաբյանը։

«Իմ քայլը» խմբակցությունից  Թագուհի Թովմասյանն էլ հայտարարեց, որ հանգստյան օրերին մեկնել է այն համայնքներ, որտեղ կովեր են անկել, խոսել է անասնաբույժների հետ, վերջինները հավատացրել են՝ կովերը սատկել են առվույտից։

«Մենք խոսում ենք Սևանի կանաչելու մասին, բայց մինչև հիմա չունենք մասնագիտական եզրակացություն, արդյո՞ք Սևանի ձուկը, որը ցավոք, անարգել վաճառվում է փողոցներում, կամ խեցգետինը ևս թունավո՞ր են։ Սրանց վերաբերյալ չկա մասնագիտական եզրակավություն։ Սննդի տեսչությունը սպասում է, որ առողջապահության նախարարությունը հայտարարություն կանի, առողջապահության նախարարությունն էլ ասում է՝ էսօր, վաղը կտանք։ Կանաչը հասկացանք, բայց ինչքա՞նով են թունավորում ջուրը այդ տոքսիկ նյութերը»,-ասաց Գեղարքունիքից ընտրված պատգամավորը ու հետաքրքրվեց՝ ինքն օրինակ ի՞նչ կարող է անել որպես կամավոր Սևանը փրկելու համար։

Նաիրիա Զոհրաբյանն էլ իր ելույթում անդրադարձավ քննարկվող նախագծերի փաթեթին, նշեց՝ մի քանի ամիս առաջ նույնաբավոնադակ նախագիծ է ներկայացրել, առաջարկելով Քրեական օրենսգրքում փոփոխություններ կատարել,  ապօրինի ծառահատումների ու անտառահատումների համար քրեական պատժաչափերը խստացնել։

«Ինձ պատասխանեցին՝ առաջարկները կառավարության համար ընդունելի են, առաջարկեցին աշխատել միասին։ Այնուհետև կառավարությունը «միասին» հատվածը մոռանում է ու ներկայացնում է  սեփականը։ Սա ճիշտ աշխատաոճ չէ։ Բայց կարևոր է, որ այս նախագիծը վերջապես բերվեց»,-ասաց Զոհրաբյանը։

Հիշեցնենք, որ ԱԺ արտահերթ նիստի օրակարգում  ընդգրկված է ՀՀ քրեական օրենսգրքում լրացում կատարելու մասին, Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ կատարելու մասին, «Բնապահպանական իրավախախտումների հետեւանքով կենդանական և բուսական աշխարհին պատճառված վնասի հատուցման սակագների մասին» ՀՀ օրենքում փոփոխոխություններ կատարելու նախագծերի փաթեթը։

«Փաթեթն առավելագույնս ուղղված է օրենսդրական սողանքները փակելուն և համարժեք պատիժ նախատեսելուն անտառահատումների հետ կապված։ Կարգավորումներ են եղել նաև Վարչական իրավախախտումների մասին օրենսգրքու, որոշ գործողությունների պատասխանատվության մասով։ Մյուս նախագծով, առաջարկվում է կովկասյան ընձառյուծի մասով տուգանքը 3 մլն դրամից դարձնել 100 մլն դրամ»,-մանրամասնեց Շրջակա միջավայրի նախարար Էրիկ Գրիգորյանը։

«Լուսավոր Հայաստան» խմբակցության ղեկավար Էդմոն Մարուքյանին հետաքրքրեց, թե՞ ով է բռնելու կովկասյան ընձառյուծ որսացողի ձեռքը։

«Էն մարդը, ով պետք է բռնի ընձառյուծ որսացողին ինչքա՞ն աշխատավարձ է ստանում։ Անտառապահների խնդիրը լուրջ է, հեկտարներով անտառ են տալիս հսկելու, մեքենա են տալիս կամ չեն տալիս, ասում են՝ դե հսկի։ Էդ 80 հազար դրամ ստացողն է բռնելու ու 100 մլն դրամով տուգանելու ընձառյուծ որսացողին, էս ոլորտը պետք է վերանայվի, նույն տեմպերով հիմա էլ անտառներ են հատվում»,-ասաց նա։

Մարուքյանն առաջարկեց ուշադրություն դարձնել աշխատավարձերի բարձրացմանը, տրանսպորտային միջոցների տրամադրմանն ու այլ հարցերին։

Նախարար Գրիգորյանը հնչեցրած  հարցերի մասին ասաց՝ չի կարող ասել, թե երբ կլինեն  մաքրման կայաններ, Սևանա լճում մոտ 3 հազար տոննա ձկնապաշար կա, վերահսկողությունն ուժեղացվելու է դեպի անտառ տանող ճանապարհներին, աշխատողների թիվը չի ավելանա, կավելացնեն տեխնիկական միջոցների թիվը։

«Պարոն Մարուքյանի ասածի հետ համաձայն ենք, բարձրացրել ենք աշխատավարձը, նախկինում 70 հազար դրամ էր, հիմա 150-170 հազար։ Հայանտառում էլ պետք է բարձրացվեն։ Բայց ձեր հարցին, թե 80 հազար դրամ աշխատավարձ ստացողը ո՞նց պիտի բռնի ու 100 մլն դրամ տուգանի կովկասյսն ընձառյուծ որսացողին, նույն կերպ կարող ենք պատասխանել, 500 հազար դրամ ստացող դատավորը 10 մլրդ դրամ գողացող չինովնիկին ո՞նց կբռնի»,-ասաց նա։