Ձեր վստահելի աղբյուրը

Երրորդ երկրներից ավտոմեքենաների ներմուծման դեպքում մաքսատուրքերը չբարձրացնելու վերաբերյալ քննարկումներ գնում են, բայց դրանք շատ ակտիվ չեն: Այս մասին այսօր լրագրողների հետ հանդիպման ժամանակ ասաց Պետական եկամուտների կոմիտեի նախագահ Դավիթ Անանյանը:

Նրա խոսքով, ԵԱՏՄ-ին  անդամակցելուց հետո Հայաստանի համար ավելի քան 800 անուն ապրանքատեսակների մասով գործում  է ներկրման մաքսային արտոնյալ ռեժիմ, սակայն աստիճանաբար՝ մինչև 2022 թվականի հունվարի 1-ը, այդ բացառությունները չեն գործելու:

Դավիթ Անանյանը նշեց, որ մեքենաների համար մաքսատուրքերը կբարձրանան  2020 թվականի հունվարի 1-ից:

«Մենք նախապես բանակցել ենք և 5 տարով հետաձգել ենք: Հիմա նորից պետք է բանակցենք որոշ ժամանակով հետաձգելու համար: Այդպիսի տրամադրվածություն կա կառավարությունում, բայց ես չգիտեմ, թե դա հաջողությամբ կպսակվի, թե ոչ: Ես բանակցություններին, քննարկումներին չեմ մասնակցում»,- ընդգծեց ՊԵԿ նախագահը:

Նրա խոսքով՝  2020 թվականի հունվարի 1-ից  որոշ մեքենաների մաքսատուրքը կբարձրանա մինչև 48 տոկոս:

«Օրինակ, ֆիսկալ առումով Ռուսաստանին ձեռնտու չէ մաքսատուրքի նվազումը: Եթե մենք մաքսատուրքերի ընդհանուր ծավալից 1,22 տոկոսն ենք բերում որպես մեր երկրի եկամուտ, Ռուսաստանին գնում է ավելի քան 80 տոկոսը: Ցանկացած բացառություն, որ մենք անում ենք, ընդհանուրի մեջ իր մասնակցության չափով Ռուսաստանը կորուստ է կրում: Եւ ինքը պետք է հասկանա, թե կորուստն ինչի համար է կրում: Եթե տնտեսական կամ քաղաքական առումով՝ ըստ իրենց, դա կլինի արդարացված, բնականաբար, իրենք կգնան այդ քայլին»,- ասաց Դավիթ Անանյանը: