Ձեր վստահելի աղբյուրը

Էլեկտրաէներգիայի մասայական անջատումների հետևանքով հանրապետության շատ բնակավայրերում,  Երևանի փողոցներում հատկապես կաթվածահար իրավիճակ է առաջացել։ Լուսացույցները չաշխատելու հետևանքով մեծ խցանումներ են, չեն աշխատում տերմինալները, դրամարկղները, կասեցված է մետրոպոլիտենի աշխատանքը։

Ստեղծված իրավիճակում բաժանորդներին, քաղաքացիներին որևէ պետական մարմին տեղեկատվություն չի տրամադրել վթարի պատճառների, տևողության, հնարավոր հետևանքների ու դրանցից խուսափելու վերաբերյալ։

ՀԷՑ-ի էջում որևէ բան չկա, ՃՈ-ն լուռ է, ԱԻՆ-ը՝ նույնպես, Տարածքային կառավարման և ենթակառուցվածքների նախարարությունից էլ ասացին՝ հաղորդագրություն կտարածեն, ավելի ուշ հայտնի դարձավ՝ շտապ ասուլիս են հրավիրում։

Panorama.am-ը ոստիկանությունից հետաքրքրվեց, ի՞նչ է անում ՃՈ-ն ստեղծված իրավիճակում։

«Բոլոր միջոցները ձեռնարկվում են երթևեկության անվտանգության ապահովման համար»,-ասացին ոստիկանությունից։

Ավելի վաղ փոխվարչապետ Տիգրան Ավինյանն իր էջում գրել էր. «Այս պահին ունենք վթար էներգետիկ համակարգում։ Երևանի ՋԷԿ-ը և Հրազդանի 5-րդ բլոկը անջատված են։ Հանրապետությունով մեկ հնարավոր են անջատումներ։

Աշխատանքներ են տարվում, որպեսզի խնդիրը մինչև երեկոյան ժամը 7-ը կարգավորվի»։