Ձեր վստահելի աղբյուրը

«Ստեղծվել է հակաօրինական, ամբողջությամբ  օրենքի կարգավորման շրջանակներից դուրս, օրենքով չնախատեսված, անգամ տրամաբանությանը  հակասող իրավիճակ»,- լրագրողների հետ հանդիպմանն ասաց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը՝  խոսելով ՀՀ երկրորդ նախագահ Ռոբերտ Քոչարյանի, Արմեն Գևորգյանի, Սեյրան Օհանյանի և Յուրի Խաչատուրովի վերաբերյալ քրեական գործով վարույթն առաջին ատյանի դատարանի որոշմամբ կասեցվելու և Սահմանադրական դատարան դիմելու մասին:

«Առաջին ատյանի դատարանը որոշել էր դիմել Սահմանադրական դատարան և այդ հիմքով կասցնել գործի քննությունը։ Առաջին ատյանի դատարանը համապատասխան դիմումն ուղարկել է Սահմանադրական դատարան։ Վերաքննիչ դատարանը բեկանել է առաջին ատյանի դատարանի որոշումը, մենք պատրաստվում ենք գնալ Վճռաբեկ դատարան, մեր գնալու ժամկետները, հնարավորությունները սպառված չեն»,- ասաց պաշտպանը։

Նման իրավիճակում ի՞նչ պետք է անի Սահմանադրական դատարանը հարցին ի պատասխան Հ.Ալումյանը նշեց. «Օրենքով այս հարցին պատասխան չկա, բայց ինչ էլ որ անի,  իր արածը պետք է ստանա ինչ- որ մի նյութեղեն տեսք՝ որոշման տեսք, գրության տեսք։ Չի կարող ուղղակի ոչինչ չանել, կամ պետք է որոշում կայացնի՝  ընդունել քննության, կամ որոշի մերժել քննության ընդունումը։  Չի կարող դատարանի գործողությունները կամ դատարանի կողմից որևէ գործողություն անելուց հրաժարվելը չունենալ նյութեղեն ձևակերպում»,- նշեց Հայկ Ալումյանը։

Հիշեցնենք, որ Վերաքննիչ քրեական  դատարանը՝ նախագահությամբ Արմեն Դանիելյանի, հունիսի 25-ին բավարարել էր ՀՀ երկրորդ նախագահ Ռոբերտ Քոչարյանի,  Սեյրան Օհանյանի, Յուրի Խաչատուրովի և Արմեն Գևորգյանի գործով դատախազության, տուժողների ներկայացուցիչ Սեդա Սաֆարյանի բողոքները։Նրանք բողոքարկել էին մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20-ի՝ քրեական գործի վարույթը կասեցնելու և Սահմանադրական դատարան դիմելու որոշումը: