Ձեր վստահելի աղբյուրը

Արդեն 13 օր է, ինչ առաջին ատյանի դատարանը չի քննում ՀՀ երկրորդ նախագահ Ռոբերտ Քոչարյանի պաշտպանների ներկայացրած միջնորդությունը՝ գրավի դիմաց Քոչարյանի խափանման միջոց կալանքը փոխելու վերաբերյալ: Լրագրողների հետ հանդիպմանն հայտնեց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը:

«Առաջին ատյանի դատարանը պատճառաբանում  է, որ չի կարող քննել մեր միջնորդությունը, քանի որ գործը գտնվում է Վերաքննիչում, իսկ Վերաքննիչը պատճառաբանում է, որ չի կարող գործն ուղարկել առաջին ատյանի դատարանին, քանի դեռ Վերաքննիչ դատարանի որոշման բողոքարկման ժամկետը չի լրացել»,-ասաց պաշտպանը:

Նրա գնահատմամբ, իհարկե, հիմնված օրենքի վրա, երկու փաստարկներն էլ ոչ մի ընդհանուր բան չունեն օրենքի հետ։ Պաշտպանի խոսքով, այդ միջնորդությունը հենց հունիսի 28-ին պետք է քննվեր ու դրա վերաբերյալ արդեն պետք է որոշում կայացվեր։ 

Հայկ Ալումյանը դիմեց Մարդու իրավունքների պաշտպան Արման Թաթոյանին՝ անհապաղ միջամտել, տեղի է ունենում բացահայտ ու կոպիտ խախտում:  Նա նշեց, որ Քրեական դատավարության օրենսգրքով նախատեսում է, որ միջնորդությունները և պահանջները պետք է քննվեն անհապաղ, սակայն եթե նույնիսկ դատարանը գտնում է, որ պետք է միջնորդության քննությունը հետաձգվի կամ միջնորդությունը թողնվի առանց քննության, նույնպես պետք է արվի որոշմամբ։

«Վերաքննիչ քրեական դատարանի դատավոր  Արմեն Դանիելյանն արել է և անում է ամեն ինչ, որպեսզի հնարավորինս շատ խախտի պարոն Քոչարյանի իրավունքները: Պետք չէ զարմանալ, որ պարոն Դանիելյանը գործը չի ուղարկում առաջին ատյանի դատարան, թեև դրանով կոպիտ խախտում է օրենքը, բայց սա այս գրծով պարոն Դանիելյանի կողմից օրենքը կոպիտ խախելու առաջին  դեպքը չէ, սպասելի էր, որ իրենից կապված ամեն բան կանի, որպեսզի պարոն Քոչարյանի իրարվունքները հնարավորինս չափ շատ  խախտվեն, դրա համար գործը Վերաքննիչ դատարանից չի ուղարկվում առաջին ատյանի դատարան»,- ասաց նա։

Հ. Ալումյանի խոսքով, գործը հիմա ընդհանրապես Վերաքննիչ դատարանում չպետք է գտնվեր, այլ գտնվեր ատաջին ատյանի դատարանում։

«Գործը  չուղարկելը, պահելը Վերաքննիչ դատարանում, առաջին ատյանի դատարանում էլ մեր միջնորդությունը չքննելը այն պատրվակով, որ գործը գտնվում է Վերաքննիչ դատարանում,  սրանք բոլորը օրենքից չբխող պատրվակներ են, բոլորը պարոն Քոչարյանի իրավունքի խախտում են»,- ասաց Ռ. Քոչարյանի պաշտպանը։

Հ. Ալումյանը նշեց, որ այսօր լրանում է Վերաքննիչ  քրեական դատարանի կայացրած վճիռը բողոքարկելու ժամանակը, և դատավորը գործը պետք է ուղարկի առաջին ատյանի դատարան։

Հիշեցնենք, որ Վերաքննիչ քրեական  դատարանը՝ նախագահությամբ Արմեն Դանիելյանի, հունիսի 25-ին բավարարել էր ՀՀ երկրորդ նախագահ Ռոբերտ Քոչարյանի,  Սեյրան Օհանյանի, Յուրի Խաչատուրովի և Արմեն Գևորգյանի գործով դատախազության, տուժողների ներկայացուցիչ Սեդա Սաֆարյանի բողոքները։Նրանք բողոքարկել էին մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20-ի՝ քրեական գործի վարույթը կասեցնելու և Սահմանադրական դատարան դիմելու որոշումը:

ՀՀ երկրորդ նախագահ Ռոբերտ Քոչարյանի պաշտպանական թիմը հունիսի 27-ին Երևանի առաջին ատյանի դատարանի դատավոր Դավիթ Գրիգորյանին կալանավորումն այլընտրանքային խափանման միջոց գրավով փոխարինելու վերաբերյալ միջնորդություն է ներկայացրել։