Ձեր վստահելի աղբյուրը

Ճանապարհային երթևեկության նկատմամբ պետք է լինի կրկնակի և եռակի ավելի վերահսկողություն։ Այս մասին այսօր գործադիրի նիստում հայտարարեց վարչապետ Նիկոլ Փաշինյանն՝ անդրադառնալով անցած շաբաթ տեղի ունեցած ողբերգական վթարներին, որոնց հետևանքով մեծ թվով զոհեր ունեցանք։

Վարչապետը նշեց, որ ոստիկանությունը օրենքի նոր նախագիծ է մշակել, որի նպատակը կարգազանց վարորդներին ընդհանրապես երթևեկությունից հեռացնելն է:

«Այսինքն՝ այն վարորդները, որոնք պարբերաբար և չարամիտ խախտումներ են թույլ տալիս, նրանք պետք է  երթևեկությունից  ընդհանրապես հեռացվեն: Նախագիծն Ազգային ժողովում է, կարծում եմ՝  ԱԺ-ի հետ պետք է քննարկենք, թե ինչ ժամկետներում կարող ենք հնարավորինս շուտ այդ նախագիծն ընդունել»,- ասաց Նիկոլ Փաշինյանը։

Վարչապետի խոսքով՝  այդ հարցով կառավարությունն ու ոստիկանությունը պետք է սերտորեն համագործակցեն հասարակական կազմակերպությունների հետ. «Հիշում եք՝ մի անգամ այդ թեմայով խոսակցություն ունեցել ենք իմ ֆեյսբուքյան եթերներից մեկի ժամանակ, երբ  հնարավորություն պիտի ընձեռեինք համապատասխան ծրագրային ապահովումով, որ քաղաքացիները նույնպես երթևեկության կոպիտ խախտում արձանագրել և ոստիկանություն ուղարկել կարողանան։ Ես տեղյակ եմ, որ ԱԺ-ի «Իմ քայլը» խմբակցության ներկայացուցիչները ՀԿ-ների հետ արդեն սկսել են այդ աշխատանքը, ինչին տեղյակ է նաև ոստիկանությունը»: 

Ըստ Փաշինյանի՝ քաղաքական կամքը և որոշումը կա, այստեղ հարցն այդ որոշման տեխնիկական մասը ապահովելն է, ուստի պետք է  համապատասխան ծրագրային ապահովում լինի, որ այդ գործողություններն ինչ-որ ընթացակարգով մտնեն սովորական առօրյայի մեջ:

Նա միաժամանակ ասաց, որ ճանապարհային երթևեկության նկատմամբ պետք է լինի կրկնակի և եռակի ավելի վերահսկողություն։

«Իհարկե հասկանալի է, որ հատկապես 2018-2019թթ. Հայաստանում ավտոմեքենաների քանակի աննախադեպ աճ է արձանագրվել, աներևակայելի թվով ավտոմեքենա կա, մեծ ծավալով ներկրումները շարունակվում են, դա իր հերթին բերում է մարտահրավերներ։ Դրանց արձագանքը պետք է լինի այն, որ ոստիկանությունն ամենակոշտ միջոցները ձեռնարկի կարգազանց վարորդների նկատմամբ:  Վերջին դեպքերը ցույց տվեցին՝ այդտեղ որևէ հանդուրժողականություն չի կարելի ցուցաբերել, որովհետև խոսքը մեր երեխաների, մեր հայրենակիցների անվտանգության և առողջության մասին է»,- ասաց Նիկոլ Փաշինյանը։

ՀՀ ոստիկանապետ Վալերիյ Օսիպյանն իր հերթին հիշեցրեց նախկինում տեղի ունեցած նմանատիպ վթարների մասին՝ վստահեցնելով, որ բոլոր դեպքերով ուսումնասիրություններ են իրականացվում:

Նա չբացառեց, որ իրենց գործողություններում կան թերացումներ։

Անդրադառնալով Զոդի կամրջի վրա տեղի ունենցած ողբերգական վթարին՝ ոստիկանապետն ասաց, որ կամրջի վրա անթույլատրելի է վազանց կատարել։

Վալերիյ Օսիպյանը նաև թվեր ներկայացրեց՝ նշելով, որ վերջին տասը տարում վթարների և զոհերի թիվն ավելանում է. «Օրինակ՝ 2018 թվականի ապրիլի 10-ի դրությամբ՝ գրանցվել է 1861 ՃՏՊ, 150 զոհ, 2736 վիրավոր, իսկ 2019 թվականի նույն ժամանակահատվածում գրանցվել է 2203 ՃՏՊ, 169 զոհ, 3212 վիրավոր»:

Նա նույնպես փաստեց, որ Հայաստան մեքենաների աննախադեպ հոսք կա: Մասնավորապես, որ 2017թ-ին ներկրվել է 38 հազար տրանսպորտային միջոց, 2018-ին՝ 73562, 2018թ-ի վեց ամիսներին՝ 28 954, իսկ 2019 թվականի վեց ամիսներին՝ 54216 տրասնպորտային միջոց:

Օսիպյանի խոսքով՝ Հայաստանում տեղի ունեցող ավտովթարների պատճառներից է նաև ճանապարհների վատ լուսավորվածությունը, տեխզննության ձևական բնույթ կրող համակարգը:

«Դա կրում է ձևական բնույթ, կարելի է ասել տեխզննում չի իրականացվում: Այսօր մարդիկ փայլեցնում են մեքենաներն արտաքնապես, բայց բոլոր մասերը հնամաշ են: Իսկ նախկինում տեխզննումը պարտադիր էր»,- նշեց ոստիկանապետը:

Նրա խոսքով՝ միակ փրկությունը բալային համակարգը կյանքի կոչելն է:

Նիկոլ Փաշինյանը նույնպես նշեց, որ բալային համակարգը լավն է. «Իմ համոզմունքն այն է, որ տուգանելու քաղաքականությունը ոչ մի էֆեկտի չի բերում, եթե բերում է, ընդամենը տեղային էֆեկտի»:

Վարչապետը հանձնարարեց շարունակել ուժեղացված ծառայությունը ճանապարհներին, հայտնաբերել ոչ սթափ վարորդներին, հայտնաբերել գերբեռնված մեքենաները:

Փոխավարչապետ Մհեր Գրիգորյանն էլ ասաց՝ ժամանակն է, որ տեխզննման ու ԱՊՊԱ-ի գործընթացը սինխրոնիզացնել, ինչը կլինի ամենաարդյունավետ միջոցը: Այսինքն՝ այն մեքենան, որ չունի նորմալ տեխնիկական վիճակ, պետք է ապահովագրություն չստանա: 

Փաշինյանին այս առաջարկը դուր եկավ և Տարածքաին կառավարման ու ենթակառուցվածքների նախարար Սուրեն Պապիկյանին հանձնարարեց Կենտրոնական բանկի նախագահի հետ քննարկել փոխվարչապետի առաջարկը: