Ձեր վստահելի աղբյուրը

Վճռաբեկ դատարանի դատավոր Նախշուն Տավարացյանն այսօր երդում կտա որպես Բարձրագույն դատական խորհրդի անդամ։ Նա 9 ամիս առաջ գրավոր դիմումով Բարձրագույն դատական խորհրդի  անդամ դառնալուց հրաժարել էր։

«Ես արդեն օրենքի ուժով ընտրված անդամ եմ, իմ իրավունքից օգտվում եմ է և պատրաստ եմ երդում տալ»,- լրագրողների հետ զրույցում ասաց Նախշուն Տավարացյանը, որը մասնակցում էր Դատավորների ընդհանուր ժողովին, որի ժամանակ էլ կտա իր երդումը։

Դատավորն ասաց, որ ժամանակին դիմել է ԲԴԽ-ին, պաշտոնական պատասխանել են, որ կարող է պաշտոնը ստանձնել  միայն Ընդհանուր ժողովում երդվելուց հետո։

«Դրանից հետո մեկ ժողով է եղել, որի ժամանակ արձակուրդում եմ եղել, դրան չեմ մասնակցել, սա էլ հաջորդ ժողովն է»,- նշեց Նախշուն Տավարացյանը։

Այսօր ժողովի ընթացքում ընտրվելու են նաև ԲԴԽ մյուս անդամները, որից հետո  կկայանա երդման արարողությունը։

Հարցին, թե ձեր գործընկերներն առարկություններ ունե՞ն այս մասով, որ դուք միայն 9 ամիս անց եք երդում տալիս, որոշ իրավաբանների անօրինական է համարում այժմ ձեր՝ ԲԴԽ անդամ դառնալը, Նախշուն Տավարացյանը պատասխանեց. «Ըստ էության, ես չեմ տեսնում։ Իմ գործընկերներից միայն Սիմիզար Հովսեփյանն է, բայց որևէ ձևով չեմ կարող ասել, որ նրա հիմնավորումները շատ հստակ են կամ հիմնավորված։ Պարզապես մարդը չի ցանկանում, որ Նախշուն Տավարացյանը երդում տա։ Ինքը հղում է անում որոշ իրավաբանների մեկնաբանություններին։ Ես չեմ ուզում նրանց մեկնաբանություններին գնահատական տալ որպես օրենքի ճիշտ մեկնաբանություն։ Այդ իրավաբանների մեկնաբանությունն էլ ինչ-ինչ նպատակների համար են»։

Հարցին, թե արդարադատության նախկին նախարար Արփինե Հովհաննիսյանը հայտարարել էր, որ եթե Ն. Տավարացյանը իր հրաժարականի գրավոր դիմումից 9 ամիս հետո երդվեց, ապա դա նշանակում է, որ Վճռաբեկ դատարանի նախագահը և առհասարակ դատական համակարգն ու բոլոր նրանք, ովքեր կհանդուրժեն այդ աղաղակող ապօրինությունը, առաջինը պետք է վեթթինգի ենթարկվեն, և լավ կլինի հրաժարվեն իրենց իրավաբանի կոչումից, ինչպե՞ս կմեկնաբանեք, նա ասաց. «Ցավում եմ, որ տիկին Հովհաննիսյանն է նման հայտարարությամբ հանդես եկել, ես նրան որպես իրավաբանի միշտ բարձր եմ գնահատել։ Այսօր էլ բարձր եմ գնահատում։ Նրա հայտարարությունը պայմանավորված է մարդկանց ինչ-ինչ անձնական նպատակներ բարելավելու համար։ Ես չգիտեմ՝ ում հետ ինչ կապերի մեջ կլինի, կոնկրետ ինձ հետ մրցակցող կամ պայքարող դատավորներից որ մեկի հետ ինչ կապերի մեջ կարող է լինել։ Ամեն դեպքում ինձ չափազանց զարմացրել է նրա հայտարարությունը»։

Հարցին, թե պատրաստ եք վեթթինգի ենթարկվել, նա կարճ պատասխանեց. «Իհարկե»։

Հարցին, թե ԲԴԽ-ին է վերապահվելու վեթթինգի որոշ գարծիքակազմեր, ձեր տեսակետն այդ մասին, դատավորն ասաց. «ԲԴԽ  դերակատարումը էական է դարձնում, բայց բոլոր պարագայում ԲԴԽ գործընթացը պետք է լինի օբյեկտիվ, միայն օրենքի սահմաններում»։