Ձեր վստահելի աղբյուրը

Երկրների էներգետիկ համակարգերն անջատված չեն, իրենք փոխմիացած են տարածաշրջանում այլ երկրների հետ, ուստի երբ երկրներից մեկում տեղի է ունենում տեխնիկական տատանում, բնականաբար, դա որոշակի ազդեցություն է ունենում հարևան երկրի համակարգի վրա: Այս մասին այսօր խորհրդարանում լրագրողների հետ զրույցում ասաց  ՀՀ փոխվարչապետ Մհեր Գրիգորյանն՝ անդրադառնալով Հայաստանի էներգահամակարգում տեղի ունեցած խափանումներին և դրանց պատճառներին։

Նրա խոսքով՝ կա նախնական վարկած, որ տեխնիկական տատանում է տեղի ունեցել հարևան երկրում, որն ազդել է մեր երկրի էներգահամակարգի վրա: «Բայց ես վերջնական պատասխան հիմա չեմ կարող տալ, քանի որ աշխատանքային խումբ է ստեղծվել, սպասենք եզրակացություններին»,- ասաց փոխվարչապետը։

Հարցին, թե ԱՄՆ-ի՝ Իրանի դեմ պատժամիջոցներ կիրառելու դեպքում հնարավո՞ր է Հայաստանը էներգետիկ խնդիրներ ունենա, Մհեր Գրիգորյաննը նշեց, որ այսօրվա մեր էներգետիկ դիվերսիֆիկացիայի մակարդակն այնպիսին է, որ ցանկացած սցենարի դեպքում ոլորտի պատասխանատուները լուծումներ կգտնեն։

«Իհարկե տեխնիկական ռիսկեր գոյություն ունեն,չի կարելի ասել, որ բացարձակ ռիսկեր չկան, դրանք միշտ կան և որևէ կապ չունեն մեր հարաբերությունների հետ կամ ընդհանուր աշխարհաքաղաքական հարաբերությունների հետ: Այնուամենայնիվ կան մեխանիզմներ, որոնք այդ ռիսկերը զսպում են: Կարծում եմ՝ վերջին իրադարձությունն էլ ցույց տվեց, որ մեր էներգետիկ համակարգը տեխնիկապես բավարար հագեցած է, որ որոշակի տեխնիկական շոկեր չեզոքացնի»,- ընդգծեց փոխվարչապետը։