«Ոսկե ծիրան». Երբ հավատում են հրաշքի

Մշակույթ 19:51 12/07/2019 Հայաստան

Ռուս ռեժիսոր Կանտեմիր Բալագովի «Լողլողը» ֆիլմն ընդգրկված է Երևանի «Ոսկե ծիրան» միջազգային կինոփառատոնի լիամետրաժ ֆիլմերի մրցույթում։ Ֆիլմի պրեմիերան տեղի է ունեցել «Կաննի» կինոփառատոնի «Հատուկ հայացք» ծրագրում, արժանացել է «Լավագույն ռեժիսորական աշխատանք» մրցանակին։

Լրագրողների հետ հանդիպմանը ֆիլմի գլխավոր դերակատար Վասիլիսա Պերելիգինան ասաց, որ ֆիլմը մարդկային մեծ փոխհարաբերությունների մասին է, ինչպես կարող են մարդիկ իրար օգնել, փրկել, փնտրել, սխալվել։

Խոսելով իր մարմնավորած կերպարի՝ Մաշայի մասին, նա ասաց, որ նա նոր է վերադարձել պատերազմից, փորձում է կյանքը նորովի կառուցել, գտնել այն, ինչին կարող է նորից հավատալ, ապագան ավելի լուսավոր կդարձնի։

«Հավատում է հրաշքի։ Այդպես»,- ասաց Վասիլիսա Պերելիգինան։

Ֆիլմի մասին
1945 թվական, Լենինգրադ: Երկրորդ աշխարհամարտը պատուհասել է քաղաքը՝ ավերելով շինություններն ու բնակիչներին թողնելով բարոյական ու ֆիզիկականսնանկության մեջ: Թեև վերջապես ավարտվել է պաշարումը, որ պատմության մեջ վատթարագույններից էր, կյանքն ու մահը շարունակում են կռիվ տալ քաղաքից մնացած ավերակների վրա: Երկու երիտասարդ կին՝ Իյան ու Մաշան, ավերակների մեջ իրենց կյանքը վերակառուցելու պայքարում իմաստ և հույս են փնտրում:

Հիշեցնենք, որ «Ոսկե ծիրան» կինոփառատոնը մեկնարկել է հուլիսի 7-ին։ Միջազգային կինոփառատոնն աշխարհի տարբեր երկրներից ստացել է մասնակցության ավելի քան 740 հայտ, ինչպես նաև աշխարհի հեղինակավոր կինոփառատոներից՝ Կաննից, Բեռլինից, Ռոտերդամից, ընտրվել են մի շարք կինոնկարներ: Փառատոնն ունի միջազգային լիամետրաժ (խաղարկային և վավերագրական) մրցութային ծրագիր, որը ներառում է 12 ֆիլմ ավելի քան 17 երկրներից և կարճամետրաժ ֆիլմերի տարածաշրջանային մրցույթ, որը ներառում է 25 ֆիլմ՝ Հայաստանից, Թուրքիայից, Իրանից և Վրաստանից:

Հարակից հրապարակումներ`

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: