Ձեր վստահելի աղբյուրը

Սևանա լճում առաջացած խնդիրը նոր չէ, սկսվել է այն ժամանակ, երբ լճի ջրի մակարդակը սկսեց իջեցվել։ «Սևանա լճի խնդիրներն ու լուծման ճանապարհները» թեմայով քննարկմանն ասաց «Սևան» ազգային պարկի տնօրենի տեղակալ Արայիկ Հունանյանը։ Նա նշեց, որ կապտականաչ ջրիմուռներն  այս տարի ավելի շուտ ծաղկեցին, թեև արդեն նկատվում է նվազում։ Արայիկ Հունանյանի խոսքով, երկարատև աշխատանք է պետք խնդիրները լուծելու համար։

ՀՀ Գեղարքունիքի մարզպետարանի Գյուղատնտեսության և բնապահպանության վարչության պետ Համբարձում Համբարձումյանն ասաց, որ ջրի որակի վատացման մի շարք պատճառներ կան, պետք է արվեին մի շարք միջոցառումներ, որոնք չեն արվել։

«Երբ սկսեցին ջրի մակարդակը բարձրացնել, ուրախացանք, բայց մոռացանք ափերը նախապատրաստել։ Անտառապատ տարածքներ մնացին ջրի տակ, շատ տեղերում մաքրման աշխատանքները պատշաճ չեն կատարվել, ինչը մեծ ազդեցություն ունեցավ ջրի որակի վրա»,- նշեց նա։ 

Հ. Համբարձումյանն ընդգծեց, որ ջրի որակն ապահովելու համար պետք է բարձրացնել ջրի մակարդակը, վերականգնել ձկնային պաշարները։ Նա առանձնացրեց  կոյուղաջրերի խնդիրը։

Հ.Համբարձումյանը նշեց, որ պետք է կառուցել մեխանիկական մաքրման կայաններ, նաև կենսաբանական, քիմիական մաքրման կայաններ, որոնք ինչ-որ չափով կվերականգնեն ջրի մաքրությունը։

«Էկոլուր»-ի փորձագետ Վիկտորյա Բուռնազյանն ասաց, որ այսօր ամենագլխավոր պայմանը լճի մակարդակի բարձրացումն է, պետք է միջոցառումներ ձեռնարկել մաքրման կայաններ կառուցել, ափերը նախապատրաստել, Արփա-Սևան թունելն ամբողջությամբ շահագործել, Որոտան-Արփա թունելը շահագործել, դիտարկել Սևանա լճում ցանցավանդակների գոյությունը, ինչքանով է այն ռիսկային։ Նա նշեց, որ միայն մոնիտորինգով չէ, պետք է քայլեր  ձեռնակվեն։

«Մարտունու կանանց համայնքային խորհուրդ» ՀԿ-ի ղեկավար Անահիտ Գևորգյանն ասաց, որ Սևանը գազանաբար խեղվել է՝  կոռուպցիա է, ցանցավանդակները բոլորն անօրինական են, ՀԷԿ-երն անօրինական են, կողակն ընդհնարապես վերացավ։

«Սևանա լիճը հիմա պատժում է բոլոր նրանց, ովքեր այս վիճակին են հասցրել»,- ասաց Ա. Գևորգյանը։

Նա ընդգծեց, որ հենց այսօր ցանցավանդակները պետք է հանվեն, ձկները թողնեն, մի գրամ հորմոն չլցնեն, բոլոր ՀԷԿ-երի ջրերը թողնեն գնան իրենց հունով, ոչ մի լիտր ջուր չմտնի որևէ մի խողովակի մեջ։

«Սրանք հրատապ քայլերն են, որոնք պետք է արվեն»,- ասաց նա։