Ձեր վստահելի աղբյուրը

«Գահերի խաղը» սերիալը 2019 թ. ամերիկյան «Էմմի» հեռուստատեսային մրցանակաբաշխությունում  ընդգրկվել է ռեկորդային՝ 32 անվանակարգում։ Գազետա.ռու կայքը, հղում անելով Associated Press-ին, գրում է, որ սերիալը մրցելու է «Լավագույն դրամատիկ սերիալ», «Լավագույն ռեժիսուրա», «Լավագույն սաունդթրեք» անվանակարգերում հաղթանակի համար։

Բացի այդ, մրցանակներ կարող են ստանալ սերիալի դերասանները։ «Դրամատիկ սերիալում լավագույն դերասան» անվանակարգում մրցանակ ստանալու հնարավորություններ ունի Կիտ Հարինգտոնը, որը խաղացել է Ջոն Սնոուի դերը, իսկ «Դրամատիկ սերիալում լավագույն դերասանուհի» անվանակարգում Էմիլիա Քլարկը՝ Դեյներիս Թարգարիենի դերի համար։

Նշվում է, որ հաղթողները հայտնի կդառնան սեպտեմբերի 22-ին, երբ կայանալու է 71-րդ մրցանակաբաշխությունը։

«Գահերի խաղը» ամերիկյան ֆենտեզի ժանրով դրամատիկ հեռուստասերիալը ստեղծվել է Դեյվիդ Բենիոֆի և Դ. Բ. Ուեյսսի կողմից՝ «HBO» հեռուստաալիքի պատվերով։ Նկարահանուները տեղի են ունեցել Հյուսիսային Իռլանդիայում, Խորվաթիայում, Իսլանդիայում, Մարոկկոյում, Իսպանիայում, Մալթայում, Շոտլանդիայում և ԱՄՆ-ում։ Պրեմիերան ԱՄՆ-ում տեղի է ունեցել 2011 թվականի ապրիլի 17-ին «HBO» ալիքով։ Ութերերոդ՝ վերջին եթերաշրջանը կայացել է  ապրիլի 14-ին։